1
Iyya nafa etiarari Yesu ellutari to doŋiok inno bore gala iko missihi, etito ojo hidofe etiyana sayye inno olibo inno Obie no Hollum iko heyiyanak illo honyie hullo tomon harik efie he inyia.
2
Owuon ifa ŋorwo innak innafa efuhai inyia miniaŋa tara hosie he iŋweiti.
Ara ifa nobo Maria nara Madalina nafa efuhai hiyyo miniaŋa hattarik tara honyie ade.
3
Ojo Juana, noŋorwo Kusa eittok lafa orriŋa habwore ne Erode, ojo Susanna, ho ŋorwo arria, innafa esio to hosie ibariti inno hosie.
4
Iyyania, ifa leba iluluŋ no hiyyo da mai nobotie, ho hiyyo innafa lafanu to honyie ta massik inno oluŋa. Ero inyia to hosie hitiriamita.
5
"Ohu ifa lobo hayani layari hinyiomo. Ifa layek inyia hinyiomo, ohuyek ifa hinnak hinyiomo to hikoi, ojo hiyyo atta hirie isia, ojo cieŋ inno hide atta hisok ŋahurru isia.
6
Ohuyek ifa hinnak hinyiomo to morwari, ifa obolo isie ojo holoŋ atta ŋattohe nyo obe ifa mai nohosie elik.
7
Arrasa hinyiomo innak ŋahuyek to hiji ho hukwa, atta hukwa ŋesuru daŋ ho ŋama ojo miyaŋ nyie atta attohe isia.
8
Ati ohuyek ifa hinyiomo ilamuk to huron illo olibo atta ŋasuari ŋama hisihai nobotie nala galik". Ifa esahak Yesu hiro hirro hunna, atta etisidok hiram nohonyie to hosie hijo, "Itira, Lewuon itai ho yohe inne etira, isiara hetiru."
9
Niya atta heyiyanak illohonyie hifi inyia hojo hetuhutek hitiriamita inia nyo.
10
Atta Yesu hitiraŋ to hosie hijo, "Ewuon itai ho ofioroho no hiyyen hirro inno Obie no Hollum, ati etiyana iso hiyyo iluluŋ te hitiriamita, 'nyo oriŋa isia ojo isia obe loremik egonyu, ojo to riŋa obe oremik hiyyen.'
11
Iyyania, ojo hitiriamita hunna hijo. Ara hinyiomoti Hiram no Hollum.
12
Ara hinyiomo hullo lohuyek to hikoi isia hiyyo hullo etiru Hiram no Hollum, ati kwak atta Sitan ŋawoŋ akwarari ade Hiram no Hollum ta tajia innohosie, hijo hotobiaŋa isia eruk atta hitillohini.
13
Ojo iliaa lohuyek to morwari ara hiyyo, letiru hiram, efotu hiram to mune, ojo innak hade obe tara hosie; eruk isia do kai, ojo lara ta far no ciama ojo isia atta ŋahuye ade.
14
Ojo hinyiomo ilia lohuyek to hiji ho hukwa isia hiyyo ille etiru Hiram no Hollum, ati lefie isia te ikoi nohosie, ojo iwahiti, ibariti he imuniti inno manya nia ta fau atta higor isia man obiaŋari isia oremik aŋerik innak haŋer inno ogol.
15
Ojo hinyiomo ilia lohuyek to huron inna lanyar ara hiyyo hullo lowuon ho tajia inno obis ho inno olibo, letiru Hiram, atta hinief tid no oremik eyyani dihan.
16
Iyyania obe lobo oremik hidie hima atta emuhok to moti, kuyya hidofe atta erutok aŋolon ho ŋeref. Ati ehumak iso inyia to hide filili hijo anyar illo ojiŋu ahotwai egonyu cialai.
17
Obe iso innak hirro eŋofohini obe oremik ŋalew, kuyya hidofe ne emuho, no lobe iso oremik alew atta wuana te iciala.
18
Ihuma hitira nalanyar, nyo tuŋani loyita, ofonihini iso aria, ojo tuŋani lo lobe oyita, odumuni iso tara honyie daŋ ho nyia ne eyyik inyia hijo ayita inyie."
19
Atta hotonye ho hilasira Yesu ŋawoŋ to honyie, ati obe ifa isia onyiha to honyie nyo oluŋa ifa hiyyo.
20
Elimak ifa lobo tuŋani inyia hijo "Owueta hotonyohoi iko ilasira hoi ta bali, awak hiwolo iyye."
21
Ati ojo Yesu atta hitiriŋak to hosie hijo, "Ara hotonye hanaŋ ho ilasira hanaŋ hiyyo ille letira Hiram no Hollum, atta egiamari."
22
Owuon ifa to holoŋitek niyya ta nafa lohuye Yesu he heyiyanak illohonyie ajiŋahini to nobo togoli, atta hijo to hosie, "Efie do oko kal ho hari tololo." Atta isia ebusari mai nyie.
23
Atti nafa ayirok isia togoli ahotwai hari, atta Yesu ajiotori, ojo nobo oyyami na hari nologol atta ŋawoŋ to hosie etiara hifioŋ ebulari ahotwai ho togoli nia, owuana ifa isia to run.
24
Niya afanu heyiyanak illo Yesu to honyie atta hiticieŋ inyia ahide, hijo "Lettok, ettok, efie iyyohoi ye!" Odioto inyia atta hitiwet oyyami ho hifoliaha no hifioŋ man owuetari.
25
Atta inyia hijo to hosie, "Tahu hiruk nahatai?" Ta baŋi nohosie atta isia hililiha binno ero to wati innohosie, "ŋai illeŋ, lo oriemik hitiwet oyyami ho hifioŋ, atta isia daŋ hiruk inyia?"
26
Ifa leba isia ta fau ho Gerasenes nafa to holoroŋ na Galilea.
27
Ifa lojo Yesu aliew abali, eboŋ ifa inyia ho lobo tuŋani lo doŋe nyie.
Owuon ifa tuŋani lia ho miniaŋa. Holobe ifa inyia eciefok boŋojin man beren, obe hidofe amanya ta haŋ, ati amanya ifa inyia te ilumioho.
28
Ifa ewolo inyia Yesu, oyyo inyia binno atta ŋarwaŋak wan ta fau to hosiere honyie. leyyorrita atta hijo, "Awuon naŋ nyo ko hoi, Yesu, Lonyi Hollum le Hittok, attana naŋ iyye, baŋa etigem nayya,
29
"Efuhuta ifa Yesu oyiri ne ibot hebusak tuŋani lia, nyo eniefita ifa inyia hinyiahita arria. Kuyya efit da hido inyia to ririk ho bileta, eriria ida hido hiyyo inyia, arrasa ŋafutori ojo miniaŋa atta eyari ahotwai tim.
30
Nia atta Yesu hifi inyia, "ŋai fure nohoi?" Ojo inyia atta hitiraŋ, "Oseŋer," nyo ajiŋak ifa miniaŋa to honyie arria.
31
Arrasa ifa miniaŋa ŋadule tana Yesu hijo hotobiaŋa efuhak isia a hotwe iwudo.
32
Owuon ifa innak bataha inne etidaha to doŋe. Niya atta miniaŋa niya tana Yesu hefuhak isia hijo ewak isi ta bataha niyya. Atta Yesu aŋatak isia heifie.
33
Afanu miniaŋa tara tuŋani atta ajiŋak ta bataha, ojo bataha ta mai atta efie a doŋe atta ŋebirok wati innohosie ta hari na hittok atta isia adiori.
34
Ifa egonyu hiyyo illafa eribita bataha hirro innafa lowuon, enyior isia ofwo elimak to hiyyo to bore gala iko te inno lowuon to hotwe haŋ.
35
Afanu hiyyo illafa letiru oriŋari hirro innafa edoŋ, atta ŋafanu to Yesu orruma tuŋani lafa ebusak miniaŋa. Eciofok boŋojin ojo hoo owuon no lobis, le letole to hejek inno Yesu, atta isia baŋi.
36
Atta hiyyo illafa egonyu hirro innafa lowuon efie elimak illamuk hijo olibe tuŋani lafa ottoŋita miniaŋa.
37
Awahan hiyyo illo Gerasenes ho onyihari hosie hifi Yesu he'no tara hosie. Abaŋi ifa isia atta inyia ajiŋak to togoli, atta isia aciahari.
38
Atta tuŋani lafa ebusak miniaŋa tana to Yesu hijo "Awak naŋ eno daŋ hoi." Ojo Yesu atta efahak inyia hijo,
39
"Aciahari ahaŋ hoi, ihiena hirro daŋ inno olibo inne legiem Hollum to hoi.'' Eno tuŋani lia ahikoi nohonyie, ohu hiro to bore gala hirro daŋ arria inne legiem Hollum to honyie.
40
Ifa aciohini Yesu, atta iluluŋ no hiyyo ta mai efwotu inyia, nyo etila ifa isia daŋ inyia.
41
Niya, aŋawoŋ lobo tuŋani lara fure nohonyie Jairo, ara ifa inyia lettok lo Sinnagog. Ohuyek ifa Jairo to hejek inno Yesu nyo awak ifa inyia Yesu he'no ahaŋ honyie.
42
Owuon ifa inyia ho ŋani honyie nobotie, nara ŋasi innohonyie tomon harik, erwahita ifa inyia binno. Te heno nohonyie, efuduni ifa iluluŋ no hiyyo to honyie.
43
Owuon ifa nobo hiito noŋorwo dia nafa odule hosehe nohonyie pulo man ŋasi tomon harik, esahak ifa inyia arobia innohonyie daŋ te ibwana, obe orrumu libe tara lobo hosie.
44
Atta ŋawoŋ okohorwoŋ no Yesu atta hitir hucuŋi no boŋo no Yesu, kwak ta mai nyie atta pule nohonyie weta.
45
Atta Yesu hijo, "ŋai nia lotir nayya?" Nafa orrisai isia, ojo Peturu atta hijo, "Ettok, etufuda ilululŋ no hiyyo iyye."
46
Atta Yesu hijo, "Etir nayya nobo tuŋani dede, ayyen naŋ hijo ohu ida golon nyia tara nayya."
47
Ifa egonyu hiito noŋorwo hijo enyiei inyia henyiak hiŋofita hirro innara egem inyie, awoŋ daŋ nekikiro, Ahuyek to hosiere ho Yesu, atta asalak to hosiere he iluluŋ no hiyyo daŋ, egiem inyie hirro inne arrumuni inyie lwaha nohonyie kwak tara Yesu.
48
Niyya, eijo inyia to honyie, "Hiito, etilibo hiruk nohoi iyye. Ino to bolioŋ."
49
Ojo inyia harrasa hiro, awoŋ lobo tuŋani ta haŋ he ettok lo Sinagog, atta hijo, "Oye ŋanni hoi, baŋa etigiema hetiyanani."
50
Ifa etiru Yesu, atta inyia hitiraŋ inyia, "Baŋa la baŋ. Iruho ania, ojo iso inyia orrumu hetilohini."
51
Ifa leba Yesu ta haŋ ho Jairo, obe ifa inyia lawak lobo tuŋani hotojiŋak daŋ ho inyia, atta inyia ebusak, Peturu, Yoani, Yakobo, ojo monye iko hotonye ho hiito.
52
Oyio ifa hiyyo innafa lowuon ojo innak atariha inyia, attati inyia hijo, "Ibaŋa loyyo. Holobe inyie oye, ati ofer inyia bi."
53
Ati ellohitari ifa isia Yesu, to hiyyen nohosie hijo oye hiito nyia.
54
Attati inyia hitidet hiito nia ta hani, atta hillilloŋ hijo, “Hiito, tette."
55
Atta oyiri nohonyie, aciohini atta diote ahide kwak. Atta Yesu elimak to hosie hesiara inyia nobo daha.
56
Eliliha ifa haŋ hose, ati ojo ifa inyia hotobiaŋa isia ogiofok lobo tuŋani hirro inia.