1
Ifa lojo Yesu atuhok rori innafa lawak inyia ŋelimak hiyyo, atta inyia ajiŋak a Kapernauma.
2
Owuon ifa lobo lettok lo oseŋer lo Roma ho pit lohonyie lo lomuno inyia binno. Ati oŋuai ifa pit lia man le emimohita la awak ye.
3
Ifa lojo lettok lia etiru sayye inno Yesu, atta inyia ŋefahak maruak illo Yudei adia to Yesu, anyar lefi inyia ha awoŋ etiluahu pit lohonyie to ye.
4
Ifa ejio isia lafanu aŋati hto Yesu, atta isia tanna Yesu hijo, "Osiru tohoi haluahari ettok lia,
5
nyo omuno inyia doŋe nohoi binno, atta hidofe ŋaduhok te iyyohoi sinagog."
6
Atta Yesu ŋeno he isia a hosiere. Ati ifa leliaha inyie to oger na haŋ nyia, atta lettok efahak motiarak hotojio to Yesu, "Habu, baŋa etigiem wan nohoi jia.
7
Nyo obe naŋ lasiru hijo anyar ejiŋak iyye a haji hanaŋ. Obe hidofe losiru ta hanaŋ ŋawoŋ tohoi to wan hanaŋ, ati irara to hutuk to nohoi hijo atta inyia libe, ojio pit leti atta libe.
8
Ara naŋ tuŋani la awuon ta fau ho golon, ojio hidofe oseŋer illeti owuon aŋolon hanaŋ. Ajo naŋ hijo to lobo, 'Ino', atta inyia ŋeno, ajo to lobo, 'Woŋ', atta inyie ŋawoŋ, ajo naŋ to pit, 'Igiama inna', atta inyie higiem."
9
Ifa etiru Yesu rori inia, atta inyia hililiha to honyie, atta fiala te iluluŋ nafa lejufuta inyia atta hijo, "Ajo naŋ ta hatai, holobe naŋ arrumu lobo heruhoni lo lobolo hiruk iyya ille ta fau he Israile."
10
Atta illafa lefahak lettok ha sayye aciahari a haŋ atta ruma pit lia olibe.
11
Ta halu atta Yesu ŋeno abore gala nafa lara Nain, ojo heyiyanak illohonyie atta efie he inyia iko iluluŋ no hiyyo.
12
Ifa le eliaha inyia he ikat no bore gala, atta inyia hiboŋ ho hiyyo akafari hayoni, ara ifa hayoni lia hiito lobotie to hotonye honyie na lara ihidak lafanu he iluluŋ no hiyyo to hotwe bore gala.
13
Ifa ewolo Yesu ihidak nia, atta inyia amehini to tuŋani nia atta hijo to honyie, "Baŋa heyio".
14
Atta inyia boto atta hitany ikafit, atta hiyyo illafa lakafita ibala wueta. Ojo inyia atta hijo, "Illa, ajo naŋ tohoi, tette."
15
Atta hayoni li diote a hide atta hiro. Atta Yesu hisio inyia to hotonye.
16
Atta baŋi hifut to hiyyo daŋ. Odule ifa isia hitihabuo Hollum, hijo, "Ebur hekilani lettok to hiji hohoi." Atta hidofe isia hijo, "Aŋawoŋ Hollum oriŋari hiyyo illohonyie."
17
Atta sayye inno Yesu esarik afau ho Yudea iko masik innafa aŋati daŋ.
18
Ifa ejio heyiyanak illo Yoani elimak inyia rori inne daŋ.
19
Atta Yoani hilloloŋ heyiyanak illohonyie lohorik atta efahak isia ade ta Habu hotojo, "Hira iyye lafa ojo ottu iso, kuyya annyar etila iyyohoi lobo tuŋani hame?"
20
Ifa ejio isia afanu hiba aŋati to Yesu, atta isia hijo, "Yoani Batista lefahu iyyohoi tohoi hijo, 'Hira iyye lafa ojo hiyyo ottu iso, anyar etila iyyohoi lobo tuŋani hame?'"
21
To holoŋ nyie etilib ifa Yesu hiyyo inno loluŋa he iŋweti ojo idiehiti iko tara miniaŋa, atta hidofe inyia hisio hiyyo haŋodok inno loluŋa hotoriŋe.
22
Atta Yesu hitiraŋ isia hijo, "Lefi itai ikoi nahatai, ifeti ilimak Yoani rori inne etiru itai he inne ewolo itai. Oriŋe haŋodok, oloton haŋurak, olibe hiyyo illo loŋwai ha talulu, etira hatuhok, owuaran hayok, elimahini sayye inno olibo to hiyyo illafa lawak luaha.
23
Tuŋani lo obe etiwet hiruk no honyie ta hanaŋ to higiemita innanaŋ orrum iso inyia jaha."
24
Ifa efie heyiyanak illo Yoani, atta Yesu hitiara hiro te iluluŋ rori inno Yoani hijo, "Efuo ifa itai oriŋari nyo a waha te iciala?
Loyyami nia letadiho hujiti?
25
Ati efuo ifa itai oriŋari nyo, tuŋani le eciefo boŋojin inna lanyar ewolo itai hiyyo ille eciefo boŋojin inne olibo, amanya to hitidara amanya to lobie na habu.
26
Ati efuo ifa itai oriŋari nyo, hekilani? Ee, ajo naŋ ta hatai, agalik ati hekilani.
27
Inyia ati lia lafa egioro hijo, 'Itiwolo efahak naŋ lefahati hanaŋ a hosiere hatai, lo ottu iso etibisak ikoi nahatai a hosiere hatai.'
28
Ajo naŋ ta hatai tara ilia lesiu to hiji ho ŋoruo, obe lobo lagalik Yoani, ati tuŋani asai to lobie ho Hollum lara ettok tara honyie."
29
Ifa etiru hiyyo rori inia, ho hiyyo iko heduduhak ho musuru, hijo obis Hollum. Ara isia illafa loruma batisimo tara ho Yoani.
30
Ati ebo ifa Farisei iko hetiyanak ho hifahita illo Yudei, obe ifa lorumu batisimo no Yoani, ebo isia lofioroho inno Hollum to wati hosie.
31
Atta Yesu hijo, "Hetirijik iso naŋ hiyyo inno hilahaji inna ho nyo?
32
Ociala isia ho nyo? Ociala isia iyya durre ille lerramita to suk, ettole atta hillilloŋo wati inno hosie hijo, ehuta iyyohoi hatar da hatai obe itai ecia. Etariha iyyohoi obe itai eyio.'
33
Nyo obe ifa Yoani Batista ottu adahari imune hidofe obe ottu amatari fino, ati ejo itai, 'Owuon inyia ho miniaŋa.'
34
Ottu Lonyi tuŋani daha ojio hidofe amata, eijo itai hijo, 'Itiwolo, laŋaru iko harumani lia, motte heduduhak ho musuru iko heyyak!'
35
Ati oliew lofioroho to durre illohonyie daŋ."
36
Elilloŋo ifa lobo lo Farisei Yesu anyar lotu daha honyie ŋiria. Ifa laŋajiŋak Yesu a haji ha Farisei, atta inyia ŋahunyie to terefeja atta daha.
37
Ati owuon nobo hiito noŋoruo to bore gala nyie na lara heyyani. Ifa etiru tuŋani nia hijo owuon Yesu ta haji ha Farisei to terefeja, atta inyia eyyani riaa ta jak no logol hinyiai nohonyie no.
38
Atta rigoŋo to hosiere hejek inno Yesu ojio hidofe oyio binno. Atta hifufus hejek inno Yesu to hidenya honyie, atta inyia hipot hejek inno Yesu to hofir, atta hidofe hijujur hejek atta hedo fe eyalak hejek inno Yesu to hiyali nia.
39
Atta Farisei lafa elliloŋu Yesu a haŋ honyie lowolo rori inia atta inyia higigillo to wan nohonyie hijo, "Lara ida tuŋani ille hekilani, noyyen ida inyia hijo nari hiito noŋoruo nia letitiro inyia nyo ara inyia aheyyani."
40
Atta Yesu hitiraŋ inyia hijo, "Simone, awuon naŋ he inak hirro inna lawak naŋ elimak tohoi," Atta inyia hijo, "Ilimak hoi Hetiyanani!"
41
Atta Yesu hijo, "Owuon ifa lohorosi hilak lohorik illo lobo tuŋani. Owuon lobotie ha arobia hisihet miyet, Ojo lobo ha arobiya tomwana miyet.
42
Ati obe hiyyo liyya owuon ha arobiyaha inno odumari, atta monye horosi ŋebusak horosi nuhe daŋ ararik.
Iyyania, to hiji hosie, lari tara hosie iso lomuno inyia binno?"
43
Atta Simone hitiraŋ inyia hijo, "Agil naŋ lafa le ebusak hiyyo inno loluŋa." Atta Yesu hijo to honyie, "Iten iyye na lanyar."
44
Atta Yesu fiala to hiito noŋuruo nyia atta hijo to Simone, "Towolo hiito noŋoruo inna, ajiŋak naŋ ahaji hoi, obe iyye esio nayya hifioŋ hilleta inno hejek, ati ellilla inyia hejek innanaŋ to hidenya honyie atta hidofe hifufus to hofir honyie.
45
To lotuni hanaŋ ahaji hoi, obe iyye ejur nayya, ati odulei tuŋani nia hijujura hejek innanaŋ.
46
Obe iyye eyalak hoo nanaŋ to hiyali, ati tuŋani inna eyol inyia hejek innanaŋ to riaa.
47
To hirro inia, ajo naŋ to hoi hijo hiyyata inno tuŋani inna innafa loluŋa, ebusahini atta inyia wuana ho mune binno. Ati to tuŋani ne ebusahini innohonyie kai, odicio iso mune nohonyie."
48
Atta inyia hijo to tuŋani nia, "Ebusahini hiyyata innohoi."
49
Atta hiyyo illafa lowuon to terefeja hiŋuŋunuta to wati hijo, "ŋai hidofe le loremikŋ ahek hiyyata?"
50
Atta Yesu hijo to tuŋani nia, "Etilahu hiruk nohoi iyye. Ino bolioŋ."