1
Ejio Yesu to heyiyanak illo honyie, ‘’Ara dede hijo afanu iso hirro inne eyyani hiyyau, ati orru to honyie lia lafanini tara honyie!
2
Olibo to honyie lefitahini moru to murut atta ebirok inyia a hotwei hari nettok, hijo hotobiaŋa inyia esio lobo ille hitiŋ te iyyau.
3
Iririe wati inna hatai. Leyyau halasi hoi iriŋa inyia, ojo leruk inyia hiloito tara hiyyata inno honyie, tomelehini inyia.
4
Leyyau inyia do hoi hinyahita hattarik tafar nobotie, atta ŋacohini to hoi hinyahita hattarik, hijo, 'Eloit naŋ hiyyata innanaŋ,' anyar emelehini iyye inyia!“
5
Atta lefahat hijo ta Habu, ’’Tofonik huruk nohoi.’’
6
Ejio Habu, ’’Lewuon ida itai ho huruk lo lodicio iyya hinyomoti letiŋ, ne eremik itai hijo to yani torutuni ade, atta iyye edulahini ta hari nettok, ojo inyie atta baŋi itai.
7
Lari tara hatai, lowuon iko hegiamani lo loromo kuya eriria kioro, oremik hijo to honyie lawoŋ inyia ta mana, ’Woŋ kokwak tohunyei ta fau atta daha.’
8
Obe iso inyia ojo to honyie, ’Ituhumak ta hanaŋ ilak hirro la adahat, ejio hidofe ituhumak etodok to boŋojin innohoi, igiamai ta hanaŋ many attohu naŋ daha iko mata. Tahalu edaha iso iyye ejio hidofe emata.
9
Obe inyia esio humo to hegiemani nyo egiem ifa inyia hirro inno elimahini to honyie, Obe ara dede?
10
Iyye daŋ, lejio iyye egiem hirro inne elimahini, ne ejio iyye, 'Ebe iyyohoi era hegiamak illa anyar. Egiem iyyohoi innafa elimahini te iyyohoi.'''
11
Nafa eno inyia Yerusalem, ohu ifa inyia tolohori Samariya iko Galilea.
12
Ifa ajiŋak inyia a haŋ nobo, dia atta inyia hiiboŋ ho hiyyo tomon illo talulu. Oweta isia alamarai tara honyie
13
atta isia hiyyorro wuoŋ, wuoŋ a hide hijo, “Yesu, lettok tomehini iyyohoi.’’
14
Ifa ewolo inyia isia, ejio inyia to hosie, ’’Ifeti itihutek wati innahatai ta fadirihien.’’ Ifa efie isia, atta isia libe.
15
Ifa ewolo lobo lohosie hijo alibe inyia, ofiala inyie ahalu, leyyorro wuoŋ wuoŋ letihabwo Hollum.
16
Olluro inyia a fau a hejek inno Yesu, lesiara to honyie humo. Ara ifa inyia lo Samaria.
17
Atta Yesu hijo, ’’Obe ifa tomon olibe? Tahu ati hottoŋwan?
18
Obe ifa ilak illo ociohini etihabwori Hollum, aracie hatamononi ille?"
19
Ejio inyia to honyie, “Tetei, ino. Etilibo huruk nohoi iyye.“
20
Efi Farisei inyia hijo anu iso ottu lobie no Hollum, etiraŋ Yesu isia hijo. “Obe obie no Hollum ara nobo sihin inna eremik egonyuni. Obe hidofe isia oremik hijo,
21
‘Toriŋe enni!‘ Kuya, ‘Toriŋei a dede!’ Nyo owuon lobie no Hollum to hiji hatai.’’
22
Ojio Yesu to heyiyanak “Afanu iso holoŋi ejio itai ewak hiwolo holoŋitek inno Lonyi Tuŋani, ati ebe iso itai ewolo inyia.
23
Ojio iso isia ta hatai, ‘Itiwolo, dede! Itiwolo, inni!‘ Ati ibaŋa efwo asiahari isia.
24
Iyya emedek hila man onit ido kal nobotie iko kal nobotie ne ido, Howuon iso Lonyi Tuŋani ta far honyie.
25
Ati to hosiere anyar lorumu inyia hitigiemita arria ojo hidofe anyar ebo hilahaji inna inyia.
26
Iyya nafa owuanari to holoŋitek inno Noah, egiema iso hiyyo hirro to Lonyi Tuŋani to holoŋitek innohonyie.
27
Adaha isia, amata isia, ayama isia, ojo hidofe esio isia to hiyama man ta far nyie ojiŋahini Noah a hotwei ho togoli-ojo igura atta awoŋ attohe isia daŋ.
28
Iyya hidofe nafa lowuanari do holoŋitek innafa ho Lot, adaha isia, amata, enyiaŋa, etinyiaŋai, edula ojo hidofe isia oduho.
29
Ati ta far to nyie ta nafa lohuye Loto to Sodoma, ohuyu hima iko moru inno lowulo a hima te ido iyya asa hai atta hitihar isia daŋ.
30
Ta halu iyya inia owuon iso far no oliew Lonyi Tuŋani.
31
Ta far nyia, ibaŋa ebusak lia lowuon to hide haji hawoŋ afau he yari saŋ inno honyie ta haji. Ibaŋa ebusak lia lolowuon ta mana hotociohini.
32
Itigil noŋorwo loto.
33
Lawak lobo etiluahu wuaran no honyie etilitek iso, ati lia letilitek wuaran no honyie etiluahu iso.
34
Elimak nayya itai hijo, ta tari to nyia owuon iso hiyyo lohorik te ijotit nobotie. Eyari iso nobotie, ojo nobotie ebusahini.
35
Eria iso ŋorwo arik. Eyari iso nobotie, ojo nobotie arasa.''
36
Owuon iso arik ta mana, eyari iso nobotie, ojo nobotie arasa.
37
Atta isia hifi inyia, "Tahu, Habu?" atta inyia hijo to hosie, "Ta mai no owuanari wan, ottuba iso taruha ta mai nyia.''