¹ Tanafa lotubai iluluŋ no hiyyo alif nobobotie, binno man eririo hejek inno hosie, etiara inyia hijo to heyiyanak illohonyie to hitieri, “Ihuma riŋa bula inno Farisei, na ara hinyiaba ² Ati obe iso nobo sihin eŋofa, nolobe iso oremik aliew, obe iso lobo sihin leleŋofahini, obe egonyuni. ³ Hirro inne ero itai te idumele etirini iso te iciala, ojo hirro inne ehahayak iyye to yohe to hotwai haji, etikwat iso hiyyo to hide ha haji. ⁴ Ajo naŋ ta hatai motiarak hanaŋ, ibaŋa labaŋ illo ottohe wan, ojo ta halu enyiei isia enyiak higem innak hirro. ⁵ Ati asar iso naŋ itai to tuŋani leremik itai baŋi, itibaŋ lia lotohoi, lowuon ho golon he ebirohini iyye to hima, ajo naŋ ta hatai, itibaŋ inyia. ⁶ Obe ati kibosien miet letinyiaŋari ta arobiyaha hullo kai? Obe ati lobo hidonye tara hosie oremik aguori to hosiere Hollum. ⁷ Ehenuni hofir innia to hosie hatai. Baŋa ebaŋ. Egalik itai kibosen arria. ⁸ Ajo naŋ ta hatai, tuŋani loremik eruhok nayya to hosiere ho hiyyo, eruhok iso hidofe Lonyi Tuŋani inyia to hosiere ha anjilohien illo Hollum, ⁹ ati lia lorisa naŋ to hosiere ho hiyyo arisa iso hidofe naŋ inyia to hosiere ha anjilohien illo Hollum. ¹⁰ Tuŋani le ero hirro inno lorru to Lonyi Tuŋani, ebusahini iso inyia, ati to lia lero no lorru to Loyiri Lolibo, obe iso inyia ebusahini. ¹¹ Leyyani isia itai ahosiere ho Sinagogi, ta haŋotok, iko te ettaha, ibaŋa elafuho hijo efie iso itai hirro jai to wati innahatai, kuya hijo iso itai jai, ¹² Etiyenik iso Loyiri lo Olibo hirro inne efie itai hiro ta sa nyia.” ¹³ Niya eijo lobo tuŋani to hiji he iluluŋ to honyie, “Hetiyanani, ilimak ilasi hanaŋ hotobwany ika naŋ lorutat.” ¹⁴ Atta Yesu hijo to honyie, “Illeŋ, ŋai lojo ara naŋ haŋotoni iko alohe la hatai?” ¹⁵ Atta inyia hijo to hosie daŋ, “Ihuma riŋa hotobiaŋa hiŋaru ojiŋak ta tajia innahatai. Nyo obe manya no tuŋani ara himunyia ne ibariti innohonyie.” ¹⁶ Atta Yesu elimak to hosie hitiriamita hijo, “Odon ifa mana no lobo tuŋani hasamani binno, ¹⁷ Atta inyie higigil to wan to no honyie hijo, ‘Ehum iso naŋ jai nyo abe naŋ lawuon ha mai na lattunari ŋama?’ ¹⁸ Ejio inyia, ‘Ahu naŋ higem tiji. Ahu iso naŋ anitok ŋahafu ibatiha inna hanaŋ a fau atta hinyiak aduhok hatarai inno hittaha, ajo naŋ teyya attunahini ŋama innanaŋ daŋ ha saŋ. ¹⁹ Ajo iso naŋ to oholio hanaŋ, “Oholio, iwuon iyye ho hirro iluluŋ inno ottuna ŋasi aria. Toyiria bolioŋ, tadahai, tamattai, tomune.”' ²⁰ Ati ejio Hollum to honyie, 'Lobolit illeŋ, Awak oholio nohoi adumuni ade ta harie te inna. Hirro inne etunak iyye, hara iso hirro inia inna ŋai?’ ²¹ Ara iso nia iyya tuŋani lotunak to wan to no honyie ibariti inno obe ara ibariti to Hollum.“ ²² Eijo Yesu to heyiyanak illo honyie, “Ajo naŋ ta hatai, ibaŋa elafuho manya nahatai iko hirro inne efu itai daha iko wati innahatai- hijo hara iso hirro inne eciefo itai nyo. ²³ Agalik manya ŋiria, ojo wan agalik boŋojin. ²⁴ Itogil ohurrahi, hunna obe oyek hinyomo obe hidofe odieŋu innak ŋama. Obe lowuon ho mugu ati etama Hollum isia. Elibo itai bi no egalik cieŋ! ²⁵ ŋai lobo lahatai lo oremik ŋafonik far no honyie no wuaran! ²⁶ Ati lobe itai eremik higem ille hittiŋ no nyo elafuho itai to hirro arria? ²⁷ Itogil turren no yani ne elahaman, hobolo isia jai. Obe isia egiama, obe enyiaŋa, ajo naŋ ta hatai amara hido Solomone ta lamanyari honyie daŋ obe ifa eciofo boŋojin iyya inia. ²⁸ Iyya leticiefo Hollum hidofe miyaŋ nyie to hotwai ha mana, inna lowuon ena, ojo motie ebirohini ta mai noloswahari haranyanya, hiticef iso inyia itai, Itai hulloŋ lodico huruk! ²⁹ Ibaŋa osiaha hirro inne efie itai daha he inne efuo itai himat, baŋa elafuho. ³⁰ Osiaha hiyyo ta fau daŋ hirro hunna ojio Monye hatai oyyen hijo ewak itai hirro hunna. ³¹ Ati itisiahai obie no Hollum ojo iso hirro inia daŋ ofonihini ta hatai. ³² Ibaŋa ebaŋ, kioro hullo hitiŋi, nyo omuno Monye hatai hesiarari ta hatai obie. ³³ Itinyiaŋak ibariti inna hatai atta itai hisio to lociaŋak. Ihuhumak kullosien to wati inna hatai inno lobe iso oremik guasa etunari ibariti inne ido inno lobe oremik hiruat. Inno lobe hahalak lafanu aŋati, ojo hido inno lobe ittoŋ oremik hiturru. ³⁴ Mai nolowuanari ibariti innohoi, owuon iso taji nohoi dia. ³⁵ Ititodok boŋojin innahatai te ittodit ahotuai, isiara lomohien inna hatai hotodule wulei, ³⁶ Itiwuana iyya hiyyo ille letila lettok lohosie, lacohini teyya ho hiyama, lojo inyia lottu hikukuk ikat, anyar honyie losony isia hiŋa ikat to honyie. ³⁷ Hotomune hegiamak, hullo ottu ettok lohosie arrumu loriŋa lawoŋ inyia. Dede elimak naŋ ta hatai hijo otodok iso inyia boŋojin inno honyie, atta elimak isia hotohunyie ta fau, atta iso inyia ŋawoŋ hisio to hosie ŋiria hatadahai. ³⁸ Lottu lettok ta tari te iriŋit hitarihi, kuya hidofe te iriŋit hitahunihi, ottu arumu isia loriŋa, hotowuana jaha to hegiamak ilia. ³⁹ Loyyen monye haji saa no lottuni lohoho, no obe inyia ebusak haji no honyie esiahari lohoho dia. ⁴⁰ Iririai hidofe itai, nyo obe itai eyyen saa no lottuni Lonyi tuŋani.“ ⁴¹ Ejio Peturu, Habu, ero iyye hitiriamita innia te iyyohoi hame iko to hiyyo daŋ?" ⁴² Atta Habu hijo, “Ŋai iso ati lia leruk ojo hidofe ara a heririani lo ottu Habu lohonyie hihaf ahide tara liyya ille egiama he inyia hesiara to hosie ŋiria nohosie ta far ta awahari hosie?” ⁴³ Hotomune hegiemani lia, lolodule higiama te letok man orrumuni inyia aciohini lettok. ⁴⁴ Dede, elimak naŋ itai hijo ehumak iso inyie inyia daŋ a hosiere hose. ⁴⁵ Ati lejio hegiemani lia ta taji honyie, ‘Etiliŋa habu hanaŋ aciohini no honyie,’ atta hitiara baha hegiemak liawa iko ŋorwo niyya, hijo adaha, amata man oruma, ⁴⁶ Ottu iso habu lo hegiemani lia to nobo holoŋ inna lemiŋari inyia obe leriria, ojo to nobo sa no obiaŋari inyie loyyen, atta iso hiŋoŋot inyia a illo hitiŋi atta ŋahutak mai to honyie iko illo lobe eruk. ⁴⁷ Hegiamani lia, nafa eyyen higiemita inna Habu, ojo to biaŋan hiriria kuya egiem to higiemita te inno honyie, abaha iso te ibahiti iluluŋ. ⁴⁸ Ati lia lobe loyyen, atta higem hirro inno olibo, abaha iso te ibahiti te inno odicio. Ille emiatahini iluluŋ to hosie, emieta iso inno awak hiyyo tara honyie. Ojo lia le esio hiyyo igem nettok, awak iso hido isia nettok tara honyie. ⁴⁹ Attu naŋ ebirok hima ta fau, ajo nayya hijo aswahahini mahu hafa beren. ⁵⁰ Ati ta awon naŋ ha batisimo ta hanaŋ iyya awak naŋ hibatiso, ojo te hitaban ta hanaŋ man esahari. ⁵¹ Hegigilo itai hijo attu nayya hisio himwara ta fau? Obe, elimak naŋ itai, eyyani nayya bwanya. ⁵² Ena man ahosiere owuon iso hibibwanya ta haji nobotie, man ena owuon iso miyet ta haji, hiyyo lohunik oliwari ohorik kuya lohorik oliwari hiyyo lohunik. ⁵³ Obwanya iso isia, oliwari monye ho hiito, ojo hiito oliwari ho monye, oliwari honye ha ŋani, ojo ŋani oliwari ho honye; oliwari homoni ho homoni.” ⁵⁴ Ero ifa Yesu te iluluŋ, ”Lejo itai ewolo itiran to aswori ho holoŋ, kokwak ijio itai 'awoŋ hai.' kuya hidofe ohu hai san. ⁵⁵ Ojo legonyu itai loyyami lohutuni takal ho ŋolon, atta itai hijo 'Eno holoŋ nohon atta hidoŋ. ⁵⁶ Hetimiyahak, eyyen itai hahieru hirro inne edoŋ ta fau ojo de ido, jai ati ebe itai eremik hilloit hirro inna ena? ⁵⁷ Nyo ebe itai eŋotok hirro inno olibo ta hatai? ⁵⁸ Lejo itai efwo iko hebalahani lohoi ahosiere ha haŋotoni, to hikoi, itibisak honyie hiram nyie, hotobiaŋa inyia eyari iyye ahosiere ho lokiko hijo hotobiaŋa ofuo ehumak iyye a hotuai Babus. ⁵⁹ Ajo naŋ ta hatai, ibe iso itai eremik hafanu ade man edumari itai arobiya illo loduhucio.”