¹ Ta halu ho hirro hunna, atta Habu anyimu illamuk tomwana hattarik atta efahak isia lohorik lohorik a hosiere honyie amasik daŋ inno lawak inyia ahuye. ² Atta hijo to hosie, “Odon mana, ati oduhuco heigiamak. Kokwak itimoje ta Habu la mana, anyar lefahak hegiamak illohonyie a mana lodioŋori. ³ Ifeti hikoi nahatai. Itiwolo, efahak naŋ itai iyya huloho to hiji he ewuoho. ⁴ Ibaŋa eyari innamuk arobia, kullo, hamuha, eijo itai ibe lifony lobo to hikoi. ⁵ Ta masik inne ejiŋak itai hosiere Itijo, ⁶ ‘Hotowuana himwara ta haŋ inna,’ Lowuon tuŋani lo himwara dia, owuon iso himwara to honyie. Ojo lobe, ociohini iso ta hatai. ⁷ Itudule ta haŋ nyie daha, itimat hirro inne esio isie ta hatai, nyo awak hegiamani idumuti innohonyie. Ibaŋa ofwo ta haji ade nobo. ⁸ Itinya hirro inne eba to hosiere hatai ta masik inne efuye itai, ⁹ itilibo haŋwak inno lowuon dia. Ilimak to hosie hijo, 'Eliaha obie no Hollum ta hatai.' ¹⁰ Ati lefwo itai ajiŋak to nobo bore gala, ojo isia obe efwotu itai, ifeti ahikoi atta itai hijo, ¹¹ ‘Ara ida hido tuduha nahatai ediho ta hamuha innohooi, etuturok iyyohoi daŋ hatai! Anyar liyyen hijo, eliaha obie no Hollum.' ¹² Iyya ajo naŋ ta hatai hijo, ta far nyie obolo iso ŋoto nahatai agalik no Sodoma ta far no ŋoto. ¹³ Orru iso ta hatai Korasin! Orru iso ta hatai Betasaida! Lowuon ifa hirro inno olibo ta Tiyre ho Sidona ta hatai, noyite ifa isia beren, atta ŋahunye to siwali. ¹⁴ Ati eyyak iso to Tiyre iko Sidona ta far no ŋoto, atta run ta hatai. ¹⁵ Itai Kapernauma, egigilo iso mahu itai hijo eba iso itai te ido? Obe, efwo iso itai ahima. ¹⁶ Lia le letira ta hatai, etira ta hanaŋ, ojo lia lebo itai, ebo nayya, ojo lia lebo nayya, ebo lia lefahu nayya.” ¹⁷ Atta liyya tomwana hatarik ha arik ŋacohini ho mune atta hijo, “Habu, origoŋo miniaŋa to hoi to fure to nohoi.” ¹⁸ Atta Yesu hijo to hosie, "Ariŋa ida naŋ Sitan lohuyu te ido iyya hila. ¹⁹ Itiwolo, esio naŋ ta hatai golon ne eriori itai munok, tosi, golon na lagalik mioroni, obe iso nobo sihin eriafu itai. ²⁰ Hotobiaŋa itai emuno hijo origoŋo oyirihien ta hatai, ati itimunoi binno hijo egioro fureta innahatai te ido.” ²¹ Ta far nyie, omuno ifa inyia to Loyiri lo Olibo, atta hijo, “Etihabwo nayya iyye, Monye, Habu la fau he ido, nyo eŋofok iyye hirro hunna tara ferejok, atta isia aliew to hiyyo illo obe elofere, iyya iŋeyyaha. Ee Monye, isiara hotowuana iyya ewak iyye.” ²² “Esio ifa Monye hanaŋ ta hanaŋ hirro, obe lobo tuŋani loyyen Lonyi aracie Monye, obe hidofe lobo tuŋani oyyen Monye aracie Lonyi, ojo to tuŋani lawak Lonyi, etuhutek iso inyia.” ²³ Atta inyia hijo to heyiyanak illohonyie kaikai, “Hotomune ilia lowolo hirro inne lewolo itai. ²⁴ Ajo nayya ta hatai, hijo oluŋa hekilak ille lawak egonyu hirro inne egonyu itai, ati obe isia oremik egonyu, awak hidofe hitira hirro inne etira itai, ojo isia obe oremik hitira isia.” ²⁵ Odioto ifa lobo lo Yudea hetiyanani lo ifahita atta hiciem Yesu hijo, “Hetiyanani, hehum iso nayya nyo hijo anyar arrumu wuaran no losio fur?” Atta ²⁶ Yesu hijo to honyie, “Hojo ifahita nyo? Ihiana iyye isia jai?” ²⁷ Atta inyia hitiraŋ hijo, “Tomune Hollum Habu lohoi ta taji nohoi daŋ, to Oholio nohoi daŋ, to golon nohoi daŋ, ojo to higigillo nohoi daŋ, iko lonyihari hoi iyya wan nohoi.” ²⁸ Atta Yesu hijo to honyie, “Etiraŋak iyye no lobis. Igiama inne ejio iyye atta manya.” ²⁹ Ati awak ifa hetiyanani etibisak wan nohonyie, atta hijo to Yesu, “Ŋai ara Lonyihari hanaŋ?” ³⁰ Atta Yesu etiraŋak hijo, “Owu ifa lobo tuŋani aŋolon to Yerusalem a Yeriko. Atta inyeia ŋahuyek to hiji ho hahalak illafa esohu ahorru hirro innohonyie, atta hillum inyia, atta ebusak inyia to hikoi ahayoni. ³¹ Ojo lobo fadiri owu hidofe to hikoi nyia, ati ifa lewolo inyia haŋwani, atta hillaŋ to nobo hikoi. ³² Atta hidofe lobo hegiamani le Iklesia ŋawoŋ. Ifa egonyu inyia, atta hillaŋ ta nobo hikoi. ³³ Ati ohu ifa lobo Samaritani hikoi nohonyie, atta ŋawoŋ amai nyie nafa owuanari inyia. Ifa ewolo inyia omehini ifa inyia to honyie. Atta ehutok to honyie, atta hififit horroŋon innohonyie, epot, atta ŋejuhok hiyali ho balu to hosie. ³⁴ Atta ŋakafak inyia ahide ho ciaŋ, atta ŋeyyani inyia a hotwai kulub, atta ehuhumak inyia. ³⁵ To hitarrihi na far nohonyie, atta ŋadumu arobiya innohonyie arik atta hisio isia to tuŋani lafa oriŋa inyia atta hijo, 'Iyari ino toriŋai inyia, lowuon innak hirro inne esio iyye to honyie, attu iso nayya ŋadumak iyye laciohini nayya.' ³⁶ Lari tuŋani ara onyihari lo tuŋani lohuyek to hahalak ille lohunik?” ³⁷ Atta hetiyanani hijo, “Lara omehini to honyie.“ Atta Yesu hijo to honyie, “Ino igiama ania.” ³⁸ Niyya, ofwo ifa isia hikoi nohosie, atta ajiŋak anobo doŋe ojo nobo hiito noŋorwo nara fure Marta hiŋa to hosie ikat nohonyie to hosie. ³⁹ Owuon ifa inyia he inasi nara fure Maria nafa etole to hicuŋi no hejek inno Yesu ne etira hiram nohonyie. ⁴⁰ Attati Marta nafa egigiama awoŋ to Yesu atta hijo, “Habu, ebe ati iyye ewolo inasi hanaŋ ebusak nayya hehuma igiem hame, “Tojo to honyie woŋ hotolwak nayya.” ⁴¹ Attati Habu hitiraŋ, atta hijo to honyie, “Marta, Marta, elafuho iyye hirro aria, ⁴² Ati owuon sihin nobotie nala galik. Anyimu Maria no olibo to honyie, nolobe iso eyari ade tara honyie.”