1
Ati halarasa Saulo hiro hitibaŋita ino toho no hejufutak, ilo Habu, eno to fadiri lettok
2
ata hifi inya waragaha ino sinagogi ino Damaska, hijo arumu iso inya lobo la lara lekoi nia, kuya hito loliawa kuya hidofe hito noŋoruo, ata inya efitak iso isia to Yerusalem.
3
Ifa holot inya, ifa awoŋ inya aŋati ho Damaska, att nobo calai hidie inya bino te ido;
4
ata inya ahuyik ta fau ojo nobo hirori ata awoŋ te ido no ojo to honye, "Saulo, Saulo, no nyo etigiama iye naya?"
5
Etiraŋ Saulo, "ŋai iye Habu?" Ejo Habu, "Naya Yesu lia ile etigiema iye;
6
ati tete to jiŋai abore gala, elimak iso naya to hoi nyo hiro ino ewu iye higem."
7
Oweta hiyo ilafa olot ha Saulo lokwai, etira hutuk, ati obe egonyu lobo tuŋani.
8
Odiote Saulo ta fau, ifa eŋa honyehite ino honye, obe ifa inya egonyu nobo sehin, orihori hiyo inya ta hani ata eyari inya a Damaska.
9
holoŋitek hunik ino obe inya oriŋari, obe ifa inya adaha ojo obe amat inak hiro.
10
Dia to Damaska owuon ifa lobo hejufutani la ara fure nohonye Ananias. Ata Habu hijo to honye to rigai hijo, Ananias!''
11
Ata inya hijo, "Towolo, ilo hoi naya teni, Habu." Ejo Habu to honye, "To diote, ino a hikoi eliloŋo hijo Bisan, ojo ta haji ho Yudas ifia lobo la ara fure nohonye Saulo, tuŋani lo Tarasis; nyo omojo inya iyania.
12
Ata inya egonyu to hosiere honye tuŋani lara fure Annania otu ata atirok has inohonye te inya, hijo anyar orumu inya riŋa nohonye."
13
Ati etiraŋ Anania, "Habu, etiru naya hiram no tuŋani lia tara hiyo iluluŋ, hijo etihar inya igem nohoi iko to hiyo ilohoi ilo odua to Yerusalem.
14
Owuon inya ho golon no efitahini hiyo bidaŋ ini ilo eliloŋo to fure to no hoi.
15
Ati ejio Habu to honye, ino, ara inya onyimoti te igem nanaŋ, hata kafari fure nanaŋ a hosiere ho Jentail ojo habuok iko to dure ile Isarail;
16
Niya etihutek iso naya hijo jai oremik inya arumu hitigiama to fure nanaŋ.''
17
Ata Anania eno, ata ajiŋak ahotwai haji. Ata atirok has inohonye to honye, hijo, "Ilasi nanaŋ, Saulo, Habu Yesu, lafa olieu to hoi te hikoi nafa etuni iye, efahak naya hijo anyar erumu iye riŋai ojo to wuana ho Oyiri."
18
Kokwak odou ilak hiro ilo owuon ahabohol to honyehite ho saulo, ata inya arumu riŋai no honye; odioto inya ata omoju batisimo;
19
ata inya daha ata agolini. Etole he hejufutak ta Damaska holoŋitek ariaii.
20
Teya etihabwo inya Yesu to sinagog, hijo ara inya Onyi Hollum.
21
Eliliha ilafa etira inya bidaŋ ata hijo, "Obe ara tuŋani lafa letihar ilafa to Yerusalem leliloŋo fure no honye? Otu inya a ini hijo eyani isia efitari to etaha ilo hetimojok."
22
Ati obolo ifa golon no Saulo to holoŋitek niya ojo etudwek inya Yudei ilo amanya to Damaska hetuhutehini to hosie hijo ara Yesu kristo.
23
Ta halu ho holoŋitek ariaiii, egigilo Yudei hijo ettohe inya.
24
Ati eyen Saulo higigilo no hosie. Eriria ifa isia ikatin ta far ojo ta harie hijo anyar ettohe inya.
25
Ati eyari hejufutak ilohonye inya ta tari ata etiluai inya a fau iko ohitir, to gufa.
26
Ifa awoŋ inya a Yerusalem, eciem Saulo hijo awak inyi hira lobo efahat, ati abaŋ ifa isia bidaŋ inya, holobe ifa isia eruk hijo ara inya hetiyanani.
27
Ati odumu Barnaba inya ata eyari to hejufutak. Ata elimak isia hijo jiai lowolo Saulo Habu to hikoi ata Habu hiro to honye, ojo hitiyana no Saulo dede to Damaska to fure no Yesu.
28
Ata inya hiboŋ iko isia te ikat to hajiŋari nohosie ahotwai iko abali ho Yeruselem. ero inya no logol to fure to no Habu Yesu.
29
Ata hitirisa ho Grasiahen ilo Yudea; ati odule isia ciama hijo ettohe inya.
30
Ifa eyen halasira etiru ania, eyani inya aŋolon a Kasiria ata efahak inya ade ho Tarasis.
31
Ata, kelesia bidaŋ to Yudea, Galilea, ojo Samariai ata wuana bolioŋ obolo ojo odiote a hide; ojo, egiema ta baŋi to no Habu ojo hifonyita to ino Oyiri, obolo iluluŋ te kelesia.
32
Iyania awoŋ inya, ara iya nafa elurori Peturu masik inia daŋ, otu inya to hiyo ilo Hollum ilafa amanya to bore gala ho Lidia.
33
Dia arumek inya lobo tuŋani lara fure nohonye Aina, lafa ofer te ijotit honye ŋasi hotowunik, nyo oŋura ifa inya.
34
Ojo Peturu to honye, "Aina, etilibo Yesu Kristo iye. Tete a hide itihumak ijotit no hoi." Ojo inya ata diote hide.
35
Nyo egonyu hiyo daŋ ilafa amanya to Lidia ojo to Saron tuŋani lia ata isia yite ta Habu.
36
Dia owuon ifa nobo to Jopa hejufutani na lara fure Tabitha, no eloitok hijo Dorkas." Efut ifa tuŋani nia he igiemita ino olibo ojo higiemita ino hamaihini ino egiem inya to lociaŋa.
37
to holoŋitek inafa nia oŋwai inya ata ye; nafa etiru isia hijo inya nya, etiferik isia inya ta haji nya to hide.
38
Nyo eliaha ifa Lidia ho Joppa, ata hejufutak etiru hijo owuon ifa Peturu dia, ata isia efahak hiyo lohorik to honye, haliari to honye, "Woŋ te iyohoi kokwak.
39
Odioto Peturu ata eno iko isia. Ifa eba inya, eyari isia inya ahaji nya to hide. Ojo ihidahi ino ŋorwo oweta bidaŋ ino oyo aŋati honey, etuhuta to honye kabuti ojo bongojin inafa egiem Dorkas nafa holowuon inya iko isia.
40
Ata Peturu efuhai isia bidaŋ ade ta haji, origoŋo to fau, ata mojo, ati, ata inya yite to wan ha hayoni, ata inya hijo, "Tabitha, tete," ata inya hiŋa honyehite inohonye, ifa ewolo inya Peturu ata inya hitidiet inya ahide.
41
Esio Peturu hani no honye te inya ata hikaf inya ahide; ifa eliloŋ inya heruhok iko ihidahi, ata hisio inya no lolowar to hosie.
42
Eyen ifa hiyo ino joppa hiram nia bidaŋ, ata hiyo ariaii hiruk to Hollum.
43
Dia etole Peturu to Joppa holoŋitek ariaii ho lobo tuŋani la lara fure Simone, hegiemani lo muhunyon.