1
Ifa efi iyohoi ade tara hosie ata iyohoi arek babur, ata iyohoi hibot man abore gala no Kos, ifa motie nohonye ata iyohoi boto abore gala no Rodes, ojo Teya abore gala no Patara.
2
Ifa arumu iyohoi babur na allaŋ a Fonisia, errek iyohoi ata iyohoi hilaŋ.
3
Nafa ewolo iyohoi Sipro, ne egonyu iyohoi inya to oko hani ne ihorroŋ no babur, ata iyohoi efie a Siria man eweta iyohoi to Tire, ta mai nafa no owu babur ebusari inak hiro.
4
Ta halu na arumu nohoi hejufutak, ata iyohoi hitole dia holoŋitek hatarik. Odule ifa hiyo niya hifia Paulo to Loyiri hijo hotobiaŋa owu a Yerusalem.
5
Ifa esaha holoŋitek inohoi dia, ata iyohoi ebusari mai nya, ata iyohoi efie ade ata isia daŋ ho ŋoruo iko dure inohosie enyamari iyohoi ade to bore gala nya. Ata iyohoi rigoŋo aŋati hari hamojori,
6
ata iyohoi hijo to hosie humo to hiro bidaŋ ino ehum isia te iyohoi. Ata iyohoi arrek babur ojo isia ata aciahari ahaŋ.
7
Nafa esahak iyohoi hilluta man to Tire, ata iyohoi hiba to Ptolemais. Dia ata iyohoi hifonya iko halasira ejo hidofe ettole dia he isia far lobotie.
8
To motie nohonye, ata iyohoi efi a Kesariai. Ata iyohoi ajiŋak nobo haji no Filipo, herarani le kelesia, lafa ara hitahatarihi, ata iyohoi hitole he inya.
9
Owuon ifa tuŋani lia iko hoduo aŋwan ino ekila.
10
Ata iyohoi hitole dia to holoŋitek inak, ata lobo tuŋani lo Yudea awoŋ la ara hekilani, ara ifa fure nohonye Agabu.
11
Otu ifa inya te iyohoi ata adumu hittodit no boŋo no Paulo. Ata efitari hejek inohonye iko ha inohonye ata hio, "Ojo Loyiri lo Olibo hijo, 'Ofu iso Judei iloYerusalem hifit monyie ittodit ina daŋ tiji, ata hisio inya ta has ho etaha iloJentails.'''
12
Ifa etiru iyohoi hiro niya, ata iyohoi iko hiyo daŋ ina amanya ta mai nya tana to Paulo hijo hotobiaŋa owu a Yerusalem.
13
Ata Paulo hitiraŋ, "Nyo nia egiama itai, ile eyio ejo hidofe ewuro taji nanaŋ? Awuon naya la nayen hijo ahu naya hifita, obe ara hidofe hifita hamai, ati ahu hidofe naya ye to Yerusalem to fure na Habu Yesu.''
14
To hibo na Paulo hiro, ata iyohoi ebusak inya ata hidofe hijo, ''Isiara wahan no Hollum hegiamai.''
15
Ta halu ho holoŋitek niya, ata iyohoi adumu siwali inohoi ata iyohoi efie a Yerusalem. Ata ilakhetiyanak to doŋe no Kesariai ejufari iyohoi.
16
Ata isia eyani iko lobo tuŋani lohosie la ara fure nohonye Mnason, tuŋani lo Sipro, hetiyanani lafa howiti, lafa ewak iyohoi hitole daŋ he inya.
17
Nafa eba iyohoi to Yerusalem, ata halasira omoju iyohoi to mune.
18
To motie nohonye ata Paulo efie ikohoi to Yakobo, owuon ifa etaha ile kelesia daŋ dia.
19
Ifa efony inya isia, ata inya hitiara hilima to hosie hiro daŋ inafa egiem Hollum to hiji ho Jential te igem nohonye.
20
Ifa etiru isia, ata isia daŋ hitihabwo Hollum, ata isia hijo to honye, "Toriŋe ini halasik, hara hiyo to ino eruk to hiji ho Judei alif jai. Awak isia daŋ adule hiriria hifahi.
21
Elimak ifa hiyo isia daŋ hiram nohoi man beren, hijo etiyanaiye hiyo iloJudei ila amanya to hiji ho Jentail anyar obusak hitiyana no Musa, ejo hidofeiye elimak to hosie hijo hotobiaŋa ogot dure ilohosie, hijo hotobiaŋa hidofe ejufuta imohiti maruahi.
22
Anyar egiem iyohoi nyo? Ofu luŋa isia etiru hijo ebaiye.
23
Igiamai hiro ino elimak iyohoiiye. Ewuon iyohoi iko hiyok ilafa elifo.
24
Iyari hiyo hulo ino itilibo wan nohoi he isia, ataiye adumak hiro inohosie to hosie, anyar ogit isia hosie inohosie. Anyar oyen hiyo hijo oteler hiro inafa elimak hiyo te isia. Anyar oyen isia hijo ejufutaiye hifahita.
25
Ati to hirm no halufak ile eruk, egiorok ifa iyohoi ejo hidofe esio to hosie hituhutita hijo hotobiaŋa isia ehutok aŋati to hibulucita ino esiarahini to rijorihien, tara hotojin ino ciaŋi ino obunak hiyo iko tara hiro ino somon.''
26
Ata Paulo eyari hiyo liya, to motie nohonye, ata inya hitilibo wan nohonye daŋ he isia, ata eno ahatwai haji imojit, ata elimak holoŋitek ino etilibori hiyo, man esiarahini hisiori te isia daŋ lobotie lobotie.
27
Ifa efi holoŋitek hatarik niya hisaha, egonyu ifa ilakhiyo iloAsia ojo isia ara iloJudei Paulo owuon ta haji imojit, ata isia daŋ hitidiet iluluŋ nettok bino ata hilum inya.
28
Eyoro ifa isia hijo, "Itai hiyo ile Isarail, ituluak iyohoi. Illohoi tuŋani le etiyana hiyo daŋ ta masik ariaii hiro ino oru, obe awak hifahita iko mai inna. Ojo hidofe inya eyani hiyo iloGirik ahatwai haji imojit nohoi man etibwot mai ina no odua.''
29
Egonyu hafa isia beren Trofimo le Efisa he inya to hotwe bore na gala nya, egigilo ifa isia hijo eyani mahu Paulo inya daŋ ahatwai haji imojit.
30
Omune ifa hiyo daŋ ino bore gala nya, ata hiyo hinyior to honye ata lumo Paulo. Orihori ifa isia inya ade ta haji imojit, ata esionok ikatin daŋ ino haji imojit kokwak.
31
Ta nafa awahari isia attohe isia, ata sayye nohonye hiba to habu la mai nya hijo owuon ifa Yerusalem to jore no oru.
32
Eyari ifa ettok lia loseŋer iko etaha ilohosie ata hinyior te iluluŋ nya. Ifa ewolo hiyo habu iko loseŋer ilohonye, ata ebusak lumo Paulo.
33
Ata habu lia hinief Paulo, ata elimak to hiyo hefita inya ta haririk arik. Ata hifi inya iko hiro inafa egiem inya no oru.
34
Eyoro ifa inak tara iluluŋ inak ojo hidofe inak hiram nohosie. Obe ifa inya etiru hiro ino ero isia to hiyoro nohosie, ata elimak hijo heyani hiyo Paulo ahosiere ho haŋotok.
35
Ifa eba isia to osiloŋi ino ikat, ata loseŋer hikaf inya, nyo ehum ifa isia hilum inya bino.
36
Ejufari ifa iluluŋ halu nohonye ojo hidofe odule hiyoro, "Itittohe inya ade!''
37
Ifa eliaha isia aŋati ta mai no oŋotori, ata inya hijo ta habu hijo, "Awak naya hiro nobo sihin to hoi?'' Ata ettok lia hijo, "Eroiye to hutuk no Grik?"
38
Obe mahuiye era la Masir, lafa eyari hiyo alif aŋwan awaha etiriomori imiri nya?''
39
Ata Paulo hijo, Ara naya lo Judei, to bore gala no Tarsus no Silisia. Ara naya tuŋani lo bore gala na agalik bino. Efia nayaiye hijo ibusak naya herara to hiyo.''
40
Ifa ebusak ettok inya herara, Oweta Paulo te irret ne ikat ata hifal ta hani nohonye to hiyo. Ifa aduehini hiyo daŋ, ata inya hiro to hosie to hirori ne Ebrei. Ata hijo,