1
Ifa eba far no Pentekoste, otubahini isia daŋ ta mai nobotie.
2
Kwak awoŋ hitir te ido iya hutan no oyami ina lefiriwa, ata etufutak haji bi daŋ nafa etolojori isia.
3
Olieu to hosie ŋadiafa ino aciala iya ŋadiafa ino hima, aharahini to hosie, ata isia hitole aŋati ho wati ino hosie.
4
Efut ifa isia bi daŋ ho oyiri lo Olibo ata isia hitiara hiro te inak hirorita iya esio Oyiri lo Olibo isia herara.
5
Iyania owuon ifa Yudei ilafa amanya to Yerusalem hiyo ilo Hollum, to fau daŋ.
6
Nafa etiru isia hitir, ata iluluŋ afanu ara nobotie ata isia hibunyutta to hetiru no hosie hirorita ino hirori no hosie.
7
"Ata isia hikikiro ojo hidofe omuno, ojo isia, "Dede, obe ilia ile ero bi daŋ ara Galilea?
8
Nyo ati etiru iyohoi isia, lobo to hirorik nohoi nafa lesiuni iyohoi?
9
Paratia ojo Medes ojo Elam, ojo ila amanya to Mesopotomia, to hotwai ho Yudea, ojo Kappadocia, to hotwai ho Pontu iko Asia.
10
Phrygia ho Pamfilia, to Masir ho kal no Libya ho Cyrene, ojo hatamonok iloRoma,
11
Yudea ojo Proselyte, Krete ojo Arabia, etiru iyohoi isia lero to hirorita inohoi etihabwo hiro ino egiem Hollum.''
12
Ata isia daŋ hililiha ojo hidofe etihabwo; ojo isia to wati inohosie, "Ojo hiro inia jai?"
13
ati ojo ilak hitifitaŋa ojo, "Efut isia balu ŋejuk".
14
Ati odioto Peturu iko efahat, tomon holobotie, ata hikaf hiro nohonye a hide, ata elimak to hosie, "Hiyo ilo Yudea he itaii daŋ hulo emanya to Yerusalem, anyar eyen itai, itira hirorita inanaŋ.
15
Obe hiyy huloŋ ebuoto iya nia egigilo itai, iyania ara far inaŋ hitahunihi no holoŋ.
16
Ara hunnaŋ hirorita inafa ero hekilani Joel:
17
'Ara iso to hisidi no holoŋitek niya ojo Hollum, "Ejuhok iso naya Oyiri nanaŋ to hiyo daŋ, onyirok iko ŋaniok hatai ekila iso, nyar halu ilahatai egonyu iso rejorihen, ojo maruak ilahatai eriga rigia.
18
Dede te hegiamak ilalaŋ, iko to hegiemak ino ŋorwo to holoŋitek niya esio iso naya Oyiri nanaŋ, ata iso isia hikila.
19
Etuhutek iso naya igaliti to hide iko hituhutita ta fau, hoto, hima, ojo furo.
20
Eloito iso holoŋ no oriok ojo yafa a hoto, holobe hawoŋ no holoŋ netok na Habu.
21
Etilohini iso tuŋani le elilloŋ fure na Habu."
22
Hiyo iloIsarail, itiru hiro hunna: Yesu lo Nasarit, tuŋani lafa etuhutek Hollum ta hatai hatara hegiamani lo hiro ino olibo iko hutuhutita ino egiem Hollum te inya to hiji hatai, iya eyen itai to wati innahatai.
23
Esiarahini ifa tuŋani lia to hiyen no Hollum iko higigilo nohonye; ejo itai ta has ino hiyo hulo obe oyen hifahi, atohe inya ejo esiok inya to kuruce.
24
Ati etidiet Hollum inya ahide, ata ebusak inya to diahai no ye, nyo ogol to ye heniafahini inya ta fau.
25
Ero Davide te inya, "Egonyu naya Habu holoŋitek daŋ to hosiere nanaŋ, owuon inya ta hani he inyat nanaŋ abe naya abaŋ.
26
Ati omuno taji nanaŋ ojo ŋadief nanaŋ etahuo, ojo wan nanaŋ amanya iko heyik.
27
Obe isoiye ebusak loholio nanaŋ to ye, kuya eruk iye ebusak haduarani lohoi hotowolo murai.
28
Etuhutek iye naya hikoi no wuaran; Etuhutek iso iye ta nanaŋ mune netok to hosiere nanaŋ.
29
Halasira, ero naya ta hatai obe baŋi to hiram no hiyo ilo Davide: Oye ifa inya ata onuhahini, ojo illume nohonye owuon he iyohoi man ena.
30
Ati, ara ifa inya hekilani ojo oyen hijo elifo ifa Hollum to honye hijo, emak iso inya lobo haŋeri lo wan nohonye hetolojo to hitoloji nohonye.
31
Owolo inya ina ata hiro hiram no hebuhu no Kristo, Obe ifa inya ebusahini to ye, obe wan nohonye egonyu murai.'
32
Yesu ile- etubuhu Hollum, ile era iyohoi daŋ asutin.
33
Ati, akafafahini nohonye ta hani he inyat no Hollum ojo hamoju no icorit no Oyiri no Olibo tara Monye, esio inya inia ewolo itai ejo etiru.
34
Obe Davide orek a ido, ati ojo inya, ojo Habu ta Habu lalaŋ, itolojo ta hani ne inyat nanaŋ,
35
Man ehumak naya miorok ilohoi hatara hejek ino hara nohoi.'''
36
Ati, isiara daŋ haŋ ne Isarail hotoyen hijo ehumak Hollum inya hatara Habu iko Kristo,Yesu lafa esihok itai.''
37
Iya ifa etiru isia, ata taja inohosie diahai, ata isia hijo to Peturu he ilak efahat, "Ilasira, hehum iso iyohoi nyo?"
38
Ata Peturu hijo to hosie, "Ibusak iruti itimoju batisimo, itai daŋ to fure no Yesu Kristo hatara hebusahini no hiyata inahatai, ejio iso itai emoju hisiori no Oyiri lo Olibo.
39
Owuon itierit ta hatai iko to durre ilahatai, ojo to liya ila alama to iya Eliloŋ Habu Hollum lohoi."
40
To hiro ariaii; elimak inya isia, ata hijo, "Italahu wati inahatai tara irruti no hilahaji ina."
41
Ata isia emoju hiram nohonye ata emoju batisimo, ofonihini oholiohien ta far nia ilak alifi hunik.
42
Odule ifa isia to hitiyana ne efahat, ojo otuba ta mai nobotie to daha nohosie imune ojo omojo nobotie.
43
Abaŋi hiyo daŋ, efut ifa mune ta tajia inohosie ata hituhutita inafa ehum efahat aliew.
44
Etole ifa heruhok daŋ ta mai nobotie,ojo higigilo nohosie owuon nobotie
45
etinyaŋak isia hiro inohosie he ibariti daŋ ata aharak isia daŋ iya awak ilak tara hosie.
46
Holoŋitek daŋ odule ifa isia to higigilo nobotie ta haji imojit, ata daha imuniaha ta hajik inohosie, eŋiŋara daha tomune iko to libe na tajia.
47
Etahuo isia Hollum lo wuon ho wahan no hiyo. Ofonik Habu to hosie iluluŋ no hiyo ile etilohini.