1
Ata Paulo hidofe awoŋ a Derbe man a Listra; ati dia, owuon ifa lobo efahati dia lara fure no honye Timoteo, onyi hito noŋorwo lo Judei lafa ara heruhoni, ojo monye honye ifa ara lo Grik.
2
Ero ifa halasirak honye dede to honye ilafa owuon to Listra iko to Ikoniom.
3
Awak ifa Paulo inya hijo anyar owu iko nyie ati eyari ifa inya ata higot inya Judei ilafa owuon to masik inia, ojo isia daŋ oyen hijo ara ifa monye lo Grik.
4
Iya nafa ofuyeri isia hikoi no hosie iko botin ino gala, esio isia to klesiaha hitimanyita to hosie anyar abaŋ, hitimanyita inafa egiorok efahat iko marwak ilo Yerusalem.
5
Niya, ogolon klesiaha to huruk no hosie ojo iluluŋ ata afonihini holoŋitek daŋ.
6
Ofu ifa Paulo iko henyamitak ilohonye amisihi ino Prigia iko Galatia, iya nafa obiaŋari oyiri lo Olibo awahari isia he etiyanai hirorita ta ŋati asia.
7
Nafa afanu isia aŋati ho Mysia, ocem isia efie a Bithinia, ati etik Oyiri no Yesu isia.
8
Ifa efi isia to Misaia, afanu isia afau abore gala netok no Troas.
9
Ta harie to nya, olieu ifa lobo tuŋani lo Masedonia to Paulo arigai, eliloŋo ifa inya ata hijo, "Woŋ a Masedonia to olwak iyohoi."
10
Nafa egonyu Paulo rigai, teya Teya ata iyohoi efie a Masedonia, eyen ifa iyohoi hijo eliloŋo Hollum iyohoi ade etiyanari sayye ino olibo to hosie.
11
Teya, ata iyohoi boto a Troas man a Samotrace ta babur, ati to holoŋ no botie, ata iyohoi afanu a Neapolis;
12
Niya ata iyohoi efie a Filipi ina ara bore gala netok no Masedonia, bore gala ne elahaman bi no no to doŋe nya, nafa ara to mosulia no okuma no Roma, ata iyohoi hitole to bore gala netok man holoŋitek ariaii.
13
Ta far na Sabato efie iyohoi abali ne ikat ta ŋati na hari, nafa egigilori iyohoi hijo owuon mahu lobo mai omojori. Ata iyohoi ahunyie ta fau ata hiro to ŋoruo inafa afanu daŋ.
14
Owuon ifa nobo hito noŋorwo nara fure no honye Lidia, hetinyaŋani no boŋojin to bore gala netok no Thiatira, nafa ara hamojoni to Hollum, etira te iyohoi. Aŋa Hollum taji nohonye anyar etira hiro inafa ero Paulo.
15
Nafa ebaptiso inya iko hiyo ina haŋ nohonye, ata hifi iyohoi hijo, "Iya eŋot itai hijo ara naya aheruhoni to Hollum, ifanu ahaŋ nanaŋ, anyar efu hitole dia." Ata inya etitanu iyohoi.
16
Efi ifa iyohoi amai ho omojori, ata nobo hito no ŋorwo netiŋ no owuon iko Oyiri no oru hirwaŋ iko hoi - eyani inya ikonyi etaha ila ara habahak ho mwaŋa.
17
Ejufari hiito noŋworo nia halu no Paulo iko iyohoi ata hiyoro, hijo, "Ara hiyo hulo hegiamak ilo Hollum etok. Etiyenak isia itai hikoi nettok no wuaran."
18
Egiem inya ina holoŋitek ariaii. Ata Paulo hijoria bino to honye, oyito ata hijo, to oyirri "Elimak naŋiye to fure no Yesu Kristo woŋ ade tara honye. Ata oyiri no oru awaŋ ade tara honye.
19
Nafa egonyu etaha ilohonye hijo eno obie nohose, ata isia hinief Paulo iko Sila ata epihori isia ahiji to suk ahoserie he etaha.
20
Nafa eyani isia ahosiere he etaha, ata hijo, "Ara hiyo hulo Judei ojo egiama iruti to bore gala nohoi.
21
Etiyana isia iyohoi hiro ino obe ara imanyiti tohoi hiyo ile Roma."
22
Ata iluluŋ no hiyo diote nobotie ahide to Paulo iko Sila; ata hekumok illohosie hugugwas boŋojin ade to wati hose, ata elimak hatabak isia to kurufati.
23
Nafa elum hiyo isia, ata ebirok isia ahotwai babus ata elimak etifitak heririak isia na anyar.
24
Ifa arumu isia golon nia, ata hetifitani ebirok isia ahotwai ho babus ata esionok hejek inohosie to bileta.
25
To tiŋ na harie, ata Paulo iko Sila mojo ojo edolo fureta to Hollum, ojo ilak hefitak etira to hosie.
26
Kokwak, owuon ifa okitik netok, no etaniŋa fau no babus; kwak aŋa ifa ikatin daŋ, ata haririk ino hiyo daŋ futo.
27
Ata hetifitani diote to ofirie egonyu ikatin aŋa; ata adumu demi nohonye ojo awak atohe wan nohonye, nyo egigilo ifa inya hijo eruata babusi.
28
Ati eyoro Paulo to hutuk no okwat hijo, "Baŋa otohe wan nohoi, hewuon iyohoi bi daŋ."
29
Ata hetifitani hililoŋ cialai ata aruhari ahotwai ojo inya okikiro iko baŋi, ata ahuyik to hosiere ho Paulo iko Sila.
30
Ata eyani isia abali ata hijo, "Etok, egiem iso naya nyo anyar etilohini naŋ?"
31
Ata isia hijo, "Iruho ta Habu Yesu, ejio iso iye etilohini, iye iko haŋ nohoi."
32
Ata isia elimak hiram no Hollum o honye, bi daŋ iko hiyo ilafa owuon ta haŋ honye.
33
Teya, ata hetifitak eyari isia to harie no tari nya, ata hilila horoŋon inohosie, teya ata inya iko hilahaŋ hi baptiso ta far nya.
34
Eyani inya Paulo iko Sila ahaji honye ata hisio ŋiria to hose. Omuno inya bii nono iko hilahaŋ inohonye daŋ, nyo, eruk ifa isia daŋ to Hollum.
35
Ifa era motie, efahu hekumok hiram to heririak hijo, "Isiara hiyo ilia he efi."
36
Elimak heririani la babus hiram nya to Paulo hijo, "Efahu hekumok hiram ta nanaŋ hijo anyar efu itai; Iyania ifanu abali, ati ifeti to bolioŋ."
37
Ati ojo Paulo to hosie hijo, "Ebak isia iyohoi to hiji ho hiyo, hiyo ilafa obe ara ilo Roma, ata asulak iyohoi ahotwai babus; ati enyak isia efuhai iyohoi dia? Dede obe, isiara isia ha afanu to wati te ilohosie anyar afanu eyari iyohoi abali."
38
Elimak heririak hiro niya to hekumok; abaŋi hekumok iya nafa etiru isia hijo ara Paulo iko Sila ilo Roma.
39
Ata hekumok liya afanu luaha to hosie; iya nafa eyanini isia ade a babus, ata isia hifi Paulo iko Sila he ediahari bore gala nya.
40
Teya ata Paulo iko Sila afanu abali to babus afanu ahaji ho Lidia. Nafa egonyu Paulo iko Sila halasirak, ata hitigol isia ata ture to bore gala ata efie to bore gala nya ade.