¹ Iyania to holoŋ nya atirok Erode has inohonye te ilak ilo owuon to kelesia hijo anyar etigiama isia. ² attohe inya Yakobo ilasi Yoani to demi. ³ Ifa ewolo inya ahalu hijo etumuno nia Yudea, eno inya efitak Peturu daŋ. Ara ifa to holoŋitek niya adahari hiyo imune. ⁴ Tahalu he heniefu inya, efitak ifa inya ta babus, ehumak ifa oseŋer ariaii heriria inya ; awak ifa inya eyani inya to hiyo ta halu ha Laŋan. ⁵ Ati efita ifa Peturu ta babus , ati omojo iluluŋ bi no to Hollum te inya. ⁶ Ta far nya holobe Erode eno eyani inya abali, ta harie nia ofer ifa Peturu to hiji ho oseŋer lohorik, ile efita ta haririk arik; ojo haririak to hosiere he ikat oriŋa ababus. ⁷ Oweta anjilo la Habu kwak ata, hicala inya to hiji ha babus. Ebak inya Peturu ta mari ata hitidet inya hijo, "Todiote kwak." Ata bileta inohonye ahori ade ta has inohonye. ⁸ Ojo anjilo to honye, "Iciefok wan nohoi iko hamuha inohoi." Ehum Peturu inia daŋ. Ojo anjilo to honye, "Ihumak boŋo nohoi no hide ijufuni naya." ⁹ Ata Peturu ejufari anjilo ata eno a bali. Enyiei holoyen hiro inia egiem anjilo hijo ara dede. Egigilo ifa inya hijo egonyu mahu inya rigiai. ¹⁰ Ifa elaŋ heririani hosiere ho hitarihi, afanu isia te ikat ho bilet nia owu a bore gala; aŋa isia to watie ino hosie hamai. Efie isia a bali ata efie aŋolon ho hikoi, ojo anjilo ata ebusak inya dia. ¹¹ Agilu Peturu to wan nohonye, ata hijo "Iyania nayen naya hijo efahu Habu anjilo lohonye hetiluahu naya ta hani ne Erode, ojo tara ewahiti daŋ ino hiyo iloYudea. ¹² "Ifa ta halu owolo inya nia, otu inya a haji ho Mariai hotonyie Yoani lafa ara fure Marko; Otubahini ifa heruhok ariaii dia omojori. ¹³ Ifa ejio inya lekukuk ikat na bali, ata hodwoti hegiemani na lara fure Roda awoŋ huruk. ¹⁴ Ifa ahieru inya hutuk no Peturu, to mune obe inya aŋa ikat; Teya, awoŋ no onyeru a hotwai haji; elimak inya hijo oweta Peturu te ikat. ¹⁵ Ati ejo isia to honye, "Adaha iye tim." Ata inya adule efudak, hijo, "Ara dede.'' Ata isia hijo, "Ara anjilo lia lohonye." ¹⁶ Ati odule Peturu ikukuho, ifa ejio isia leŋa ikat, owolo isia inya ata isia daŋ hililiha. ¹⁷ Ata Peturu hiriŋ isia hotodwai, ojo inya ata elimak isia libe na Habu iko heyani nohonye inya ade ta babus. Ojo inya, "Ilimak rori inia to Yakobo iko ilasira." Ata inya ebusak ata eno anobo mai. ¹⁸ Iya nafa era far, enyiei ifa mune nobo tara ho oseŋer, to hiro inafa edoŋ to Peturu. ¹⁹ Ifa ta halu esok Erode hisiak inya man obe orumu. Ata inya hifia heririak ata efahak isia anyar otohe hiyo isia. Ata inya eno a fau ho Yudea to Kesariai ata hitole dia. ²⁰ Iyania ejoria ifa Erode bino to hiyo ilo Tire ho Sidon. Efie isia te inya ara botie. Awak ifa isia Blasto, haluahani la Habu, hotoluak isia. Ata isia afanu hifia humwara, nyo omoju ifa doŋe nohosie ŋiria tara doŋe naba habu. ²¹ Ta far nobo eciefok Erode wan nohonye to ahabuore no lobie nohonye : ata inya hiro to hosie. ²² Eyoro hiyo, "Ara nia hirori no jok, enyiei hara no tuŋani!" ²³ Kokwak anjilo lo Hollum ebak inya, nyo obe esio Hollum hitahuo; ata huru daha inya man oyori. ²⁴ Ati obolo ifa hiram no Hollum bino. ²⁵ Ifa esahak Barnaba ho Saulo igem nafa efahak hiyo isia a Yerusalem, ata isia aciohini teya; eyari isia he isia Yoani, lafa ara fure no honye Marko.