¹ Nafa ebe iyyohoi eremik hidi, eruk iyyohoi hijo edek isia iyyohoi ta Athene hame. ² Atta iyyohoi efahak Timoteo halasi ojo ara hidofe hegiamani iko hoi to sayye inno Yesu Kristo, ³ hijo hetigolo inyia huruk nahatai, hijo hotobiaŋa lobo tara hatai orrwa to hitigemita inia. Eyyen itai to wati innahatai hijo ara isia innohoi. ⁴ Dede, nafa helewuon iyyohoi he itai, elimak ifa iyyohoi itai beren hijo efu iso iyyohoi arrumu hitigemita iyya owuanari isia iyya egonyu itai eijo itai eyyen. ⁵ To hiram to nia, ifa ewolo nayya hijo enyei iso nayya aremik hidi ahosiere, atta nayya efahak hijo anyar layyien nayya huruk nahatai, egigilo nayya ifa hijo enyiob mahu henyiabani itai atta igem nohoi eno assai. ⁶ Heletek Timoteo awoŋ te iyyohoi tara hatai atta hidofe eyyani te iyyohoi sayye inno olibo no huruk ojo mune nahatai. Elimak hidofe inyia iyyohoi hijo edule itai higigilo iyyohoi nalanyar, ojo ewak itai egonyu iyyohoi iyya nia ewahari hidofe iyyohoi egonyu itai daŋ. ⁷ Halasira, to hitigemita innohoi daŋ, egol ifa iyyohoi te itai ojo to huruk ta nahatai. ⁸ Emanya iyyohoi iyyania to weuta ta nahatai no ta Habu. ⁹ Hesio iso iyyohoi to Hollum humo tetai jai to mune nohoi nolowuon to hosiere ho Hollum. ¹⁰ Emojo iyyohoi to far iko te iŋalio hijo anyar egonyu iyyohoi itai eijo hidofe eremik hitigol huruk nahatai. ¹¹ Iyyania, isiara Hollum Monye hohoi to wan nohonyie Habu lohoi Yesu hehuhumak toohoi hikoi neremik iyyohoi afanini ta hatai. ¹² Hotofonik Habu mune nahatai hotoloŋori te illak ojo to hiyyo daŋ ta mai iyya ara nohoi ta hatai daŋ. ¹³ Isiara inyia hetigolo tajia innahatai anyar obe nobo hipali ta hatai to hosiere ho Hollum Monye hohoi laciohini Habu lohoi Yesu iko halibok illohonyie daŋ.