¹ Ijufutai mune ojo anyar ahayin to isorio ino oyiri, agalik nya aheder itai hekilari. ² Tuŋani le ero ta ŋadief obe inyia ero to hiyyo ati ero inyia to Hollum. Ati obe iso lobo tuŋani oremik hiyyen inyia le ero inyia, nyo ero inyia hirro hunna eŋofo to Oyiri. ³ Ati to tuŋani le ekila, ero inya to hiyyo oduk isia na anyar, hijo anyar etigol inya isia ojio hidofe ettito isia. ⁴ Tuŋani le ero to ŋadief, oduho inyia wan nohonyie, ati tuŋani le ekila, oduho inyia ikelesia. ⁵ Iyyania, egigilo idda nayya hijo ne ero ida itai daŋ to ŋaadiefa. Ati na agalik nia, awak ida nayya hijo ne ekila ida itai. Agalik tuŋani le ekila tuŋani le ero to ŋadiefa (olibo ida le eloito lobo hiro nohonyie anyar eyiyenu kelesia tara honyie). ⁶ Ati iyyania, halasira, la awoŋ nayya ta hatai atta nayya hiro ta hatai to ŋadiefa, ho luak iso hiro nanaŋ itai jai? Abe nayya aremik hiluak itai, man etuhutahini nayya ta hatai hirro inne ero nayya, kuyya to ofioroho, hikila, iko to hitiyana. ⁷ Ledolo hitidolita no olibo-iya ciwali, iko hodori, obe isia oremik ehumu nobo hidoli no olufa, horemik iso lobo tuŋani hiyen hijo olufa tara hodori? ⁸ Lohuto furuju to nobo ihutut no olufa, hoyen iso lobo tuŋani jai hijo eba saye? ⁹ Ara daŋ ania ta hatai. Le eroru itai inak hiro ino obe obis, jai iso oremik lobo tuŋani hiyen hirro inne eroru iye? Ero iso iye, ojo hijo obe etiru hiram nohoi. ¹⁰ Owuon hirorita ino hiyo ta fau aria, obe hirorita inia owuon obe hamana nohosie. ¹¹ Ojio la abe nayya ayyen imana no hirori nyia, atta iso nayya hira ahatamononi to herarani, ojio herarani ara hidofe ahatamononi ta hanaŋ. ¹² Eri ikatai. Iyya esiaha itai igemita inno Oyiri, itisiahai inno oremik huluak ikelesia atta higol itai bi daŋ. ¹³ Lamojo lobo to ŋadief no olufa, isia inyia heloito ta halu ho mojo nohonyie. ¹⁴ Ojio la amojo naya ta ŋadief no olufa, omojo hidofe oyiri nanaŋ, ojio higigilo nanaŋ obe egigilu hiro niya. ¹⁵ Hegiem iso nayya nyo? Amojo iso nayya to loyiri nanaŋ, ati ojo naŋ hidofe amojo tohegigilo nanaŋ. Edolo iso naya to loyiri nanaŋ, ajo naya hidofe edolo to higigilo nanaŋ. ¹⁶ Ati letihahuo iye Hollum to Loyiri, hojo iso hiyo ilo olufa jai "Amen" le esiara iye humo ojo inya obe oyyen hiro ino ero iyye? ¹⁷ Eremik iyye hisio humo binno na anyar, ojio tuŋani lara obe eyiyenu tara hoi obe oduhohini. ¹⁸ Esio nayya humo to Hollum hijo ero nayya ta ŋadiefa inno olufa agalik itai bi daŋ. ¹⁹ Ati to kelesia, aremik naya ero hirorita miet iya ahiyen naŋ anyar etuhutek nayya te ilak, agalik hirorita hisihai tomon ta ŋadief ²⁰ Halasira, hotobiaŋa itai era iyya durre to higigilita innahatai. Ati to hiram no run, ituwuana iyya idoliaha. Ati to higigilo nahatai, igigile iyya maruak. ²¹ Egioro to hifahita hijo, "To hiyo ilo olufa iko to ŋadiefa ojo to hutuhe inno hatamonok, ero iso nayya to hiyyo hullo. Ati obe isia oremik etiru nayya,'' ojio Habu. ²² Ati, ara ŋadiafa ahituhutita, obe ara te heruhok, ati ara to hiyo ilo obe eruk. Ati ara hikila no hituhuti, obe ara no hiyo ilo obe ara heruhok, ati nohiyo heruhok. ²³ Ati, tonia, kelesia bi daŋ anya afanu arabotie atta hiro ta ŋadiefaa, ojo hatamonok iko hiyo ino obe eruk hafanu ahotwai, obe iso isia ofu hijo ebolit itai? ²⁴ Ati lekila itai daŋ ta mai, atta ati tuŋani lo obe eruk awoŋ kuyya hidofe lobo lo olufa ottu, oremik iso inyia ta wan nohonyie huruk to hirro inne etiru inyia. Oremik iso inyia hiŋot hirro ino etiru inya atta huruk hiram nahatai. ²⁵ Oliew iso hiro ino eŋofo ta taji honyie. To hiro ino etiru inyia, oremik iso inyia ahuyek ta fau atta hitihabuo Hollum. Oremik inyia hiŋut ta wan nohonyie hijo owuon hada Hollum to hiji hatai. ²⁶ Iyyania, halasira hanaŋ, la afanu itai nobotie, oremik lobo hidol fure, hitiyyen, etuhutek hirro inno oliew, hiro ta ŋadief ojo hidofe lobo oremik hiloito hirorita. Igiamai hirro inia daŋ anyar etigolori kelesia. ²⁷ Lero lobo ta ŋadief, isiara ilak ohorik kuyya ohuhnik, anyar eloit lobo hiro no ero isia. ²⁸ Ati obe lobo oremik hiloit, isia hotoduehini to kelesia. Isiara lobo herara to wan nohonyie hamai to Hollum. ²⁹ Isiara hekilak lohorik kuyya lohunik herara, ojo ilak daŋ etira to herorita hijo ero hiyo nya. ³⁰ Ojio owuana lobo iko hiro ino eitiru inyia tara Loyiri ojo inyia ettole to hiji ho igem no kelesia, isiara lara ero wan hotoduehini. ³¹ Eremik itai bi daŋ hikila obotie obotie anyar oremik lobo tara hatai daŋ eyiyenu atta hiyyo daŋ arrumu golon. ³² Owuon oyiri no hekilani daŋ to hekilak. ³³ Obe Hollum ara Hollum le etihara, ati ara inya lo humwara. ³⁴ Isiara ŋoruo hotoduehini to kelesiaha daŋ. Hotobiaŋa isia ero. Ati isiara hotoduehini ta baŋi, iyya ojio hidofe hifahita. ³⁵ Lowuon nobo sihin na awak isia hiyyen, isiara isia hefia to liawa hosie ta haŋ. Ara irri to hiito noŋoruo herarari te ikelesia. ³⁶ Ottu ifa hiro no Hollum tara hatai? ara itai hamai otir hiram no Hollum? ³⁷ Le egigilo lobo ta wan nohonyie hijo ara inya ahekilani kuyya hidofe a tuŋani lo oyiri, isiara heruho hijo ara hirro inia egiorok nayya inno Habu. ³⁸ Ati lobe lobo tuŋani oheru ina, hotobiaŋa hidofe oheru inyia. ³⁹ Itai halasira, itisiahai hijo anyar ekila itai, hotobiaŋa itai eyyumo lobo tuŋani herara to ŋadiefa. ⁴⁰ Ati anyar egiama itai hirro inno obis iko to bsan.