¹ Ijufutai naya, iya ejufuta naŋ Kristo. ² Iyania amuno naŋ itai nyo egigilu itai naya to hiro inafa etiyana naŋ ta hatai. Amuno naŋ itai nyo aweta itai to amanyiti iya inafa ebusak naya tahatai ³ Iyania awak naŋ anyaa eyen itai hijo ara Kristo hito loliawa lo hiyo daŋ, ojo hito loliawa ara letok toro hito noŋoruo, ojo Hollum ahosiere ho Kristo. ⁴ Lomojo lobo tuŋani ojo hoo nohonyie emuho eyani iyya irri tohoo honyie. ⁵ Ati lomojo nobo hiito noŋoruo kuyya ekila ojo hoo nohonyie obe emuho eyyani inyia irri to hoo honyie. Nyo ara sihin nia iya ogita hoo nohonyie. ⁶ Lobe hito noŋoruo etihok hoo no honyie, anyar ogit hofir ino honyie hotosuho. Kuyya ara eri to hito noŋoruo hagitini hofir ade kuyya to honye hesusumari hoo no honyie, tojo hemuho inyia hoo no honyie. ⁷ Hotobiaŋa hiito oliawa emuhok hoo no honyie, nyo ara inyia rijori iko ohuo no Hollum. Ati hiito noŋoruo ara ohuo no hiito loliawa. ⁸ Obe ifa hiito oliawa oyyeni tara hiito noŋoruo, ati oyeni hito noŋoruo tara hito loliawa. ⁹ Obe ifa hiito oliawa oyyeni to hito noŋoruo, ati hito noŋoruo to hito loliawa. ¹⁰ Inya nia owuon hito noŋoruo ho hutuhuti no hilohitok to hoo honyie, nyo ta anilohien. ¹¹ Ati, ta Habu, obe hiito noŋoruo ettole hamai tara hiito loliawa, hidofe obe hiito oliawa ettole hamai tara hiito noŋoruo. ¹² Iyya ottu hiito noŋoruo tara hiito oliawa, ottu hidofe hiito oliawa tara hiito noŋoruo. Ojo hirro bidaŋ afanu tara Hollum. ¹³ Toŋot to wan nohoi: olibo to hiito noŋoruo hotomoje Hollum ojo hoo no honyie obe emuho? ¹⁴ Ebe itai emijak hijo esaga hofir ino hito oliawa eyyani irri to honyie? ¹⁵ Obe itai etiyenu hijo lowana hito noŋoruo ho hofir ino esaga, ara ohuo? Ara hofir innohonye hitihita. ¹⁶ Ati lawak lobo tuŋani hitirisa tonia, obe iyyohoi ewuon iko innak hitiyenitaiko to Kelesiahien ho Hollum. ¹⁷ To hiram nia, abe naŋ etahwo itai, nyo latubai itai aranobotie, obe ara to libe ati to run. ¹⁸ To hitieri, etiru naŋ hijo latubahini itai to kelesia, owuon higigiala to hiji hatai, ajo naŋ eruk hijo ara dede. ¹⁹ Anyar owuon ŋasio to hiji hatai, anyar orumuni hijo ilo olibo tara hatai. ²⁰ Lafanu itai arabotie, obe ara ŋiria na Habu nya edaha itai. ²¹ Ladaha itai, anyar adaha lobo ŋiria nohonyie holobeŋ ilara ilak anaha inohosie. Owodo lobo, ojo illak oruma. ²² Ebe itai ewuon hahajik ino edahari itai ejio hidofe ematari dia? Etifittaŋa itai Kelesia no Hollum ejo hidofe etifittaŋa itai lia ilo obe owuon hohiro? Ajo iso naŋ nyo ta hatai? Anyar amuno naŋ itai? Abe naŋ aremik mune itai to nia! ²³ Amoju naŋ tara Habu hiro ino etuculak naŋ ta hatai, hijo Habu Yesu, ta harie nafa etinyiaŋari hiyo inya, odumu imune. ²⁴ Ati nafa esio inyia humo, ata inya hibun ata hijo, "Wan nanaŋ innaŋ, na ara nahatai. igiamai inna anyar egigilori nayya". ²⁵ Iyania nia atta inya odumu ikobo, atta hijo, "Ikobo ina ara himwara ŋejuk to hoto nanaŋ. Itudule higiama ina iya egigilu itai, egigilori ta nayya." ²⁶ Nyo to holoŋ ne edahari itai imune ejo hidofe emata to ikobo ina, atta itai hitiyana ye no Habu man ociohini inyia. ²⁷ La anya lobo imune atta himat te ikobo na Habu to hikoi no obe osiru, owu hira heyyani to wan iko to hoto na Habu. ²⁸ Isiara tuŋani hotohier wan nohonyie do, to hikoi to nia isiara inyia hatanya imune ojo hidofe amat to ikobo. ²⁹ To tuŋani la anya ojo hidofe amat ojo inyia obe oher wan nohonyie, anya ojo hidofe amat ŋoto to wan nohonye. ³⁰ Inya nia elik illak ojo oŋwai to hiji hatai, ojo illak tara hatai ojoto. ³¹ Ati le eher iyyohoi wati innohoi obe iso ŋoto tara hohoi. ³² Ati leŋot Habu iyyohoi, etiniŋ iyyohoi, hijo anyar ebe iyyohoi eye iko fau nobotie. ³³ Ati, halasirak, lafanu itai daha arabotie, itilai wati innahatai. ³⁴ Lowodo lobo, isiara inyia hatadahai ta haŋ, anyar afanu itai nobotie hotobiaŋa ara ŋoto. Iko innak hiro ino egiorok iyye, attu naŋ etuhutek la awoŋ naŋ.