¹ Abe naya awak hijo anyar ebe itai eyen, halasira, hijo monyie hohoi owon ifa tafau holohidis atta isia hilaŋ to hiji hahari nettok. ² Ebatiso ifa isia daŋ to hidis no Muse iko thahari nettok. ³ Anya ifa isia ŋiria no oyiri. ⁴ Daŋ mata isia amatat ino oyiri. Nyo amat ifa isia tara morio no oyiri nafa ejufari isia, ojo moruo nia inya Kristo. ⁵ Ati obe ifa Hollum omuno isia bedaŋ, atta watye inohosie etisarrik to tim. ⁶ inyania ara hiro huna hitiriamita tohoi, anyar ebe iyohoi ejufuta hiro ino sitan iyya nafa hosia. ⁷ Hotobiaŋa era hetihabuok, horijorihien iya ehuma ifa illohosie. Ara ina iya egiorohini, "Ettole hiyo atta daha ojo amata, atta diote atta cia". ⁸ Hotobiaŋa iyohoi eyau tosomon, iya nafa ehumari isia. Toholoŋ tonobotie, oye ifa isia alif tomwana arik hohunic hiyo olo oyee to hiram nia. ⁹ Hotobiaŋa iyohoi ehuma Kristo tocama, iyya ehuma ifa ilohosie atta munok attohe isia. ¹⁰ idofe hotobiaŋa iyohoi hiŋuŋunita, iya ehuma isia ifa atta anjilo lo ye atohe isia. ¹¹ Iyania, edoŋ hirro hunna to hosie ahitihuta te iyyohoi. Ati egiorohini isia esiŋari iyyohoi, lia eliaha hisidi na awaŋ. ¹² Tonia isiara tuŋani legigilo hijo awueta inyi hehuma hirira hijo hotobiaŋa inyia ohuye. ¹³ Obe ciama oremik awaŋ tahatai na no obe owuon to hiyo. Ati olibo Hollum. Obe inya oremik ebusak nobo hisusuta nottu ta hatai na agalik golon nahatai, lawoŋ nobo hisusuta esio iso inyia ta hatai nobo hikoi no efuho itai hijo anyar edihu itai inya. ¹⁴ Tonia, itai huna amuno naŋ, irwuata ade tara hitihabwo no rijorihien. ¹⁵ Ero naŋ ta hatai iyya hiyyo hullo etira. Itiŋot hiro innanaŋ to wati te innahatai. ¹⁶ Ikobo inna ejahari iyyohoi, obe ati nia ara bwanya no hoto no Kristo? Imune no ebwanya iyyohoi, obe ati inya ara bwanya no wan to Kristo? ¹⁷ Nyo owuon imune nobotie, era iyyohoi nobotie emonya ida hido iyyohoi. Edaha iyohoi imune nobotie daŋ arabotie. ¹⁸ Itiwolo to hiyo ino Isarail. Obe ara isia ila adaha hibulucita ojoegiama ta altari? ¹⁹ Nyo nia ero naya ania? Ara rijori iya nobo sihinai asai? Hoŋiria nya esio hiyo to rijori ara sihinai asai? ²⁰ Ati ajo naŋ hero ino esio paganohien hihumita to johin, esio isia to johin obe ara to Hollum. Abe naŋ awak itai hotorriahai iko johin. ²¹ Ebe itai eremik himat to ikobo na Habu iko te ikobo no johin. Ebe itai eremik daha to teremeja na Habu iko to teremeja no meniaŋa. ²² Etijoria iyohoi Habu hijo hatahaino? Egol iyohoi agalik inyia? ²³ "Hero daŋ odwaa,'' ati obe are hiro inia olwuak isia. "Hero daŋ odwaa,'' Obe ara hiro naŋ etibolo hiyo ahide". ²⁴ Hotobiaŋa lobo osiaha libe nohinye. ati anyar losiahai inya libe no onyihari lohonyie. ²⁵ eheder itai daha hiro huna etinyiaŋa hiyo to suk, ibaŋa efia higigilita inahatai. ²⁶ Nyo "Ara fau na Habu iko hirro daŋ inno owuon dia". ²⁷ Lellilloŋu lobo lobe ara heruhoni itai to nobo ŋiria, eijo itai ewak efi, itidihai hirro ino esio isia to hosiere hatai eijo itai ebe efia hifiita inno higigilita. ²⁸ Ati lojo lobo tuŋani ta hatai, "Ara daha ina ne esio hiyo to rijori," ibaŋa adaha, ara nia to hiram no tuŋani lelimak itai, ojo to hiram no higigilo. ²⁹ Abe naŋ ero to hiram to higigilo, ati to hiram no lobo. To hiram no nyo eŋot itai hiram no loboto higigilo na hati? ³⁰ Ladaha naŋ to mune, no nyo omoro hiyo naya to hiram nia ajo naŋ esio humo? ³¹ Tonia kuyya edaha itai eijo hidofe emata, ati to hirro ino egiama itai, igiama daŋ to ohwo no Hollum. ³² Itiwania bolioŋ to Yudea iko to Grik, ojo to Kelesia ho Hollum. ³³ Iticiem iyya aciem naŋ hitumuno Hollum to hirro bi daŋ. Abe naŋ asiaha iwahiti innanaŋ, ati inne iluluŋ. Egiama naŋ hijo anyar etilohini isia.