¹ Iyyania to hiram to no hiduduha no gurusi innahatai efahu to hiyyo illo, ehumari iyya efahak inyia te ikelesiaha inno Galatia. ² To holoŋ no hitieri inne isabit, isiara hiyyo daŋ hototunak gurusi ati iyya opocu isia te isabit to niyya. To nia awoŋ naŋ arrumu iso naŋ gurusi daŋ etutubahini. ³ Ati leba naŋ ta hatai, esio iso naŋ waraga to hiyyo ille enyimu itai ebo hisiorita innahatai Yerusalem. ⁴ Kuyya olibo ta hanaŋ, ahu iso naŋ ati lolibo hidofe, ofu iso isia hanaŋ. ⁵ Ati attu iso naŋ ta hatai laciohini naŋ ta Masedonia, nyo ahu iso naŋ eno a Masedonia to. ⁶ Kuyya ettole iso naŋ he itai ta hameyu, anyar elwak nayya to loton nanaŋ ta massiok inna ahuyere naŋ. ⁷ Nyo abe naŋ awak wueta he itai iyya nia nyo eculak iso nayya. Ati kuyya laŋatak Habu nayya, ettole iso nayya daŋ he itai. ⁸ Ati arasa iso naŋ te Efisa man to holoŋ no Pentekoste. ⁹ Nyo aŋa ikat nalat no osiru ta hanaŋ hegiamari, ati obore miorok illallaŋ binno. ¹⁰ Lawoŋ Timoteo ihuma efwotu inyia, itiwolo hijo hotobiaŋa inyia ettole ta hatai ta baŋi nyo egiama inyia igem na Habu iyya inna ehuma naŋ. ¹¹ Hebusak lobo tuŋani hotomianai inyia. Ati itilwuak inyia to hikoi no' olibo, anyar ottu inyia ta hanaŋ to hilik na taji, nyo etila naŋ inyia he ilasira hanaŋ. ¹² To hiram ne ilasi hohoi Appolo. Erro ifa naŋ to honyie binno hijo anyar ottu inyia hiwolo itai ha halasira. Ati obe inyia awak heno iyyania, ati ottu iso inyia ta hatai lolibo to honyie. ¹³ Ihuma riŋa, itiwuetai to huruk, ihuhuma wati iyya hiyyo, itigolo tajia innahatai. ¹⁴ Igiemai hirro bi daŋ to mune. ¹⁵ Eyyen itai hiyyo hullo ta haŋ ba Stefano, hullo ara heruhok inne hitierita innafa ta fau ha Acaya, ati egiama isia luaha no hiyyo inno Hollum. Iyyania, efia naŋ itai halasira iko hanasira, ¹⁶ elolia naŋ ta hatai hijo anyar etira itai to hiyyo ilia, ati to hiyyo illia daŋ illo oluaha te igem atta higiama he iyyohoi. ¹⁷ Amuno naŋ to hiba ne Stefano iko Fortunato ojo Akaiko. Eluak isia nayya tamai nahatai. ¹⁸ Ati oluak isia oyiri nanaŋ iko innahatai, Iyyania, itiheru isia ho hiji hatai. ¹⁹ Etifonya ikelesiaha inne Asia itai. Ati etifonya Akwilla iko Prisilla itai ta Habu, ojo ikelesia no owuon ta hajik innohosie. ²⁰ Etifonya halasira iko hanasira daŋ itai. Ehuma efonyak wati innahatai to hifonya no olibo. ²¹ Nayya Paulo, egioro nayya inna ta hass innanaŋ. ²² Kuyya lowuon lobo lobe omuno Habu, isiara hipit hotowuana to honyie. ²³ Habu lohoi, woŋ! Isiara hamehini na Habu Yesu Kristo hotowuana ta hatai. ²⁴ Hotowuana mune nanaŋ daŋ hatai to Yesu Kristo. Amen.