¹ Halasira, awak ida naŋ hijo anyar egilu itai sayye inno olibo innafa etiyena naŋ ta hatai innafa etiru itai atta itai attunak isia ta tajia innahatai eijo hidofe itai ewuetari. ² Ara to hiram to nia nafa etilohini itai, legocie itai hiram nafa etiyana naŋ ta hatai, ara iso huruk nahatai assai. ³ Elimak naŋ ta hatai ifa hosiere rori innafa etiru naŋ: hijo oye Kristo to hipalita innohoi iyya etisiru higierita, ⁴ hijo onuhak ifa hiyyo inyia, atta inyia ŋebuhu to hitahunihi no holoŋ iyya egioro to buk no Hollum ⁵ Ojo higierita to buk nohonyie hijo oliew ifa inyia to Kepas do, atta hidofe aliew te efahat illohonyie hullo tomon ho lohorik. ⁶ Oliew inyia to halasira iko inasira to okit nobotie hullo agalik hisiha miet. Hemunya hawuarak innohosie, ati afire hinak innohosie. ⁷ Niyya oliew inyia to Yakobo, ojo hidofe te lefahat daŋ. ⁸ Hucuŋi nohonyie, oliew inyia ta hanaŋ lafa esini iyya hiito lafa esini to holoŋ nepal. ⁹ Nyo ara naŋ luŋa hucuŋi ne efahat ojo ta hanaŋ, abe naŋ asiru hijo hellilloŋoi hiyyo naŋ lefahati, nyo etigiama ifa naŋ ikelesia no Hollum. ¹⁰ Ati to hamehini no Hollum, inyia nia aracie naŋ eina elefahati lohonyie. Ojo hamehini nohonye ta hanaŋ obe ara assai. Ati egiama ifa naŋ binno agalik isia bi daŋ. ¹¹ Ojo hidonyie obe ara naŋ ati hamehini no Hollum nia lowuon ta hanaŋ. ¹² Lelimak iyyohoi hijo owuon iyya ebuhu Yesu, ojo ŋai enyiak hidofe hijo obe tuŋani oremik ebuhu to ye? ¹³ Ati lobe ebuhu to ye, etuhutek hijo obe hafa Yesu ebuhu to ye. Owu hitiyana nohoi iko huruk nahatai assai. ¹⁴ Ojo lobe Kristo ebuhu to ye, ara ati hitiyana noohoi assai, ojo hidofe huruk nahatai ara assai. ¹⁵ Ojo lobe hayok ebuhu to ye obe hidofe Yesu ebuhu daŋ atta iyyohoi hira telerrok to Hollum, hijo etubuhu inyia Kristo ati nobe ara dede. ¹⁶ Ojo lobe hayok ebuhu, obe hidofe Kristo oremik ebuhu. ¹⁷ Ojo hiyyata innahatai arasa. ¹⁸ Ojo hiyyo illo loye iko Yesu atta alitek. ¹⁹ Lara ida higigilo inna egigilo iyyohoi to wuaran nohoi to Yesu, amurie ati iyyohoi agalik hiyyo hullo daŋ ²⁰ Ojo iyyania dede, ebuhu Yesu to ye orrumhini huwo hitierita illo haŋer illafa oye. ²¹ Iyya nafa ottuni ye tara tuŋani lobotie efi iso hidofe iyyohoi arrumu hebuhu tara tuŋai lo oye. ²² Iyya nia oyeri hiyyo daŋ to hiram na Adam, efu iso hidofe iyyohoi ebuhu to Yesu Kristo. ²³ Orrumu iso tuŋani lobo innohonyie, ara Kristo haŋer hitierita, ojo haŋer illo ara illohonyie atta arrumu wuaran la'acohini inyia. ²⁴ Atta hisio lobie do Hollum lia lara a Monye inna attohu inyia hitattur ettaha iko igoliti inno okuma nohose ojo hidwariti. ²⁵ Ottu iso inyia hilohittok many oriehini miorok illohonyie lawoŋ inyia etatturok atta arriek ta fau. ²⁶ Hucuŋi lo mereni lohonyie lottu inyia hitattur inyia ye. ²⁷ Nyo "ariek inyia hirro daŋ to hejek innohonyie." Ati leijo inyia hijo atuhohini hirro daŋ to honyie. Etuhutek hijo Hollum lia otuhok hirro daŋ to hejek innohonyie. ²⁸ Ati lowuana hirro bi daŋ to honyie, Niya atta iso Lonyi honyie to wan nohonyie to hirro bi daŋ te inyia. Owuon iso hirro hunna hijo hatara Hollum a Monye to hirro bi daŋ ta mai. ²⁹ Iyyania, lobe ida hebuhu, hehum iso illia ebastiso to ye no Yesu hijo nyo? Lobe ida hayok ebuhu nyo ida ebatiso isia te isia? ³⁰ No nyo ewuon ati iyyohoi to sa no oyeyer? ³¹ Ta hatai halasira iko hanasira, elifo naŋ tomune nanaŋ itai to Yesu Kristo Habu tohoi hijo awuon naŋ a hayoni holoŋi daŋ. ³² Ero naŋ atuŋani hijo holibo iso nyo ta hanaŋ kuyya larrem naŋ iko sitani nia te Efisa, lobe hayok ebuhu? Hetimatai eijo edaha, nyo motie eye iyyohoi." ³³ Hotobiaŋa itai eruk hinyiaba: Nyo "Etihar iluluŋ no'rru imanyiti inno olibo." ³⁴ Itirriŋai to higigilita inno olibo! Heyyau nyo owuon hiyyo illo ottumo Hollum. Ajo naŋ ania hijo anyar etidaik itai irri. ³⁵ Ati efia iso lobo, "Ebuhu iso hayok jai?" Howuon iso wati innohosie jai?" ³⁶ Ati ara inno hififia no hiyyo hattumok! Ledulak iyye iyyania, obe iso oremik esuru man oyeri. ³⁷ Obe hirro inne edulak iyye ara wan no'ttu iso hira, ati hinyomoti. Oremik hira a geme kuyya nobo sihin no'lufa. ³⁸ Ati Hollum iso esio to honyie wan iyya lawak inyia. Ojo esio inno hinyomo hamai hamai. Obe wan erri. ³⁹ Owuon wan no tuŋani no'olufa tara ciaŋ, ojo no ciaŋ olufa tara cieŋ ojo no cieŋ olufa tara hami. ⁴⁰ Owuon wati inno ido ojo inno fau owuon daŋ ta fau. Ati owuon lohwo ne ido hamai tara lohwo na fau. ⁴¹ Owuon lohwo no holoŋ, ojo na yafa owuon, ojo na haher. Olufa ohwo no haheri tara innamuk. ⁴² Ati ara holoŋ ne ebuhu daŋ na hayok. Omura hirro inne edulahini ojo inno odioto obe omura. ⁴³ Enuhak wan atta hijiriŋa ojo to holoŋ ne hebuhu owuon mune. Ara hidula hilik, ojo diote ara golon. ⁴⁴ Onuhahini wan ojo riŋa no hiyyo, ojo lodiote wan to oholio obe lobo eremik ŋegonyu. Lowuon wan negonyu hiyyo, owuon hidofe wan nobe hiyyo eremik egonyu. ⁴⁵ Egioro hijo amanya ifa Adam atuŋani ta halu no ye, amanya to oholio. Nyo etieru ifa Hollum ayyeu wan atta ŋahudak oyiri no wuaran. ⁴⁶ Ati obe ifa manya no oyiri ottu to hosiere ati manya to wan, atta ati manya no oyiri awoŋ ta halu. ⁴⁷ Oyyeuni ifa hitieri lo tuŋani lafau to modie. Ojo tuŋani hitarrihi ottu tara ido. ⁴⁸ Iyya hiyyo hullo ta fau illo obe oyyen Hollum, era itai iyya tuŋani lafa oyyeuni ta far. Ojo hullo leruk hiram no Hollum ofwo isia to tuŋani hitarrihi lottu te ido. ⁴⁹ Iyyania ecielu iyyohoi tuŋani ille ta fau anyar hidofe ocialari ho tuŋani lia te'ido. ⁵⁰ Itai halasira hanaŋ, elimak naŋ itai hijo obe hiriŋo orutak obie no Hollum. Ojo sihin no omura, obe oremik arutak sihin nobe omura. ⁵¹ Itirriŋai, elimak naŋ itai hirro innafa obe oliew. Ebe iso iyyohoi eye ati eloito iso wati innohoi aŋejuho. ⁵² Eloito iso iyyohoi kokwak iyya rifok no honyek lohuta ihahan to hucuŋi no holoŋ. ⁵³ Etubuhu iso hayok iko wati innohosie inno omura ojo wati hunna holobe anuhahini atta hiloit wati hunna obe oremik ye. ⁵⁴ Ati leloito wan awan inna obe enyiak ye to holoŋ nia, eidoŋ iso hiram no lojo, "Eyyale Kristo ye." Adilok hiŋere ye. ⁵⁵ "Dede, tahu ati golon nohoi? Dede, tahu ati hiŋorit nohoi?" ⁵⁶ Ara hiŋorit no ye iyyau, ojo golon ne iyyau ara hifahi. ⁵⁷ Ati humo to Hollum, lesio iyyohoi hagalik ta Habu lohoi Yesu Kristo! ⁵⁸ Ajo naŋ ta hatai halasira iko hanasira, ihuma golon. Tojio innak hirro hotobiaŋa ettaŋai itai ade. Itudule te igem na Habu lohoi, nyo eyyen itai hijo obe igem nahatai ta Habu ara assai.