¹ Isiara mune hatara sihin ne esiaha itai, ati anyar esiaha hidofe itai hisiorita inno oyiri anyar ekilari itai. ² Tuŋani le ero ta ŋadief obe inyia ero to hiyyo ati ero inyia to Hollum. Ati obe iso lobo tuŋani oremik hiyyen inyia le ero inyia, nyo ero inyia hirro hunna eŋofohini to Oyiri. ³ Ati to tuŋani le ekila, ero inyia to hiyyo hehuhumahini isia na anyar, hijo anyar esiŋ inyia isia ojio hidofe ettito isia. ⁴ Tuŋani le ero to ŋadief, oduho inyia wan nohonyie, ati tuŋani le ekila, oduho inyia ikelesia. ⁵ Iyyania, egigilo idda nayya hijo ne ero ida itai daŋ to ŋaadiefa. Ati na agalik nia, awak ida nayya hijo ne ekila ida itai. Agalik tuŋani le ekila tuŋani le ero to ŋadiefa (olibo ida le eloito lobo hiram nohonyie anyar eyiyenu ikelesia tara honyie). ⁶ Ati iyyania, halasira, la awoŋ nayya ta hatai atta nayya hiro ta hatai to ŋadiefa, ho luak iso hiro nanaŋ itai jai? Abe nayya aremik hiluak itai, man etuhutahini nayya ta hatai hirro inne ero nayya, kuyya to ofioroho, hikila, iko to hitiyana. ⁷ Edolo hitidolita no olibo- iyya ciwali, iko doŋi, obe isia oremik ehumu nobo hidoli no olufa, horemik iso lobo tuŋani hiyyen hijo olufa nobo tara nobo jai? ⁸ Le edolo ikakan to nobo hidoli no olufa, hoyyen iso lobo tuŋani jai hijo eba fere? ⁹ Ara daŋ ta hatai ania. Le eroru itai nobo hiro no obe obis, ho oremik iso lobo tuŋani hiyyen jai hirro inne eor iyye? Ero iso iyye no obe lobo tuŋani oyyen hiram nohoi. ¹⁰ Owuon hirorita inno hiyyo ta fau arria, ojio hirorita inia daŋ owuon he imana nohosie. ¹¹ Ojio la abe nayya ayyen imana no hirori nyia, atta iso nayya hira ahatamononi to herarani, ojio herarani ara hidofe ahatamononi ta hanaŋ. ¹² Erri iso hidofe iso daŋ ta hatai ania. Iyya esiaha itai igemita inno Oyiri, itisiahai inia inno oremik huluak ikelesia atta higol itai bi daŋ. ¹³ Lamojo lobo to ŋadief no olufa, isia inyia heloito ta halu ho mojo nohonyie. ¹⁴ Ojio la amojo nayya ta ŋadief no olufa, omojo hidofe oyiri nanaŋ, ojio higigilo nanaŋ obe egigilu hirro niyya. ¹⁵ Hegiem iso nayya nyo? Amojo iso nayya to loyiri hanaŋ, ati amojo iso hidofe naŋ to hoo nanaŋ. Edolo iso nayya to loyiri nanaŋ, ajo hidofe nayya edolo to hoo nanaŋ. ¹⁶ Ati le etahuo iyye Hollu, to Loyiri nohoi, hojo iso tuŋani lo olufa jai "Amen" le esiara iyye humo, ojio inyia obe oyyen hirro inne ero iyye" ¹⁷ Eremik iyye hisio humo binno na anyar, ojio tuŋani lara obe eyiyenu tara hoi. ¹⁸ Esio nayya humo to Hollum hijo ero nayya ta ŋadiefa inno olufa agalik itai bi daŋ. ¹⁹ Ati to hotwe he ikelesia, ero nayya hirro miet ija ho hiyyen hijo anyar etuhutak nayya illak, agalik hiro ne ero tuŋani alif tomon ta ŋadief nohonyie assai. ²⁰ Halasira, hotobiaŋa itai era iyya durre to higigilita innahatai. Ati to hiram no run, ituwuana iyya idoliaha. Ati to higigilo nahatai, igigile iyya maruahi. ²¹ Egioro to hifahita hijo, "To hiyyo illo olufa iko to ŋadiefa ojio to hutuhen inno hatamonok, ero iso nayya to hiyyo hullo. Ati obe isia oremik etiru nayya,'' ojio Habu. ²² Ara ŋadiafa ahituhutita, obe ara to heruhok, ati ara to hiyyo illo obe eruk. Ati ara hikila no hituhuti, obe hidofe ara nobo no hiyyo illo obe ara heruhok. ²³ Ati la awoŋ ikelesia daŋ nobotie, atta isia daŋ hiro ta ŋadiefa, ojio hatamonok iko hiyyo inno obe eruk hiba, obe iso isia ofu hijo eŋuai itai? ²⁴ Ati le ekila itai daŋ ta mai, atta ati tuŋani lo obe eruk awoŋ kuyya hidofe lobo lo olufa ottu, oremik iso inyia ta wan nohonyie huruk to hirro inne etiru inyia. Oremik iso inyia hiŋot hirro inne etiru inyia atta huruk hiram nahatai. ²⁵ Oliew iso hirro inne eŋofo ta taji honyie. To hirro inne etiru inyia, oremik iso inyia ahuyek ta fau atta hitihabuo Hollum. Oremik inyia hiŋut ta wan nohonyie hijo owuon hada Hollum to hiji hatai. ²⁶ Iyyania, halasira hanaŋ, la afanu itai nobotie, oremik lobo hidol fure, hitiyyen, etuhutek hirro inno oliew, hiro ta ŋadief ojo hidofe lobo oremik hiloito hirorita. Igiamai hirro inia daŋ anyar etigolori ikelesia. ²⁷ Le ero lobo ta ŋadief, isiara illak lohorik kuyya hidofe lohuhnik, anyar eloit lobo hiro ne ero isia. ²⁸ Ati lo obe lobo lo oremik hiloit, isia isia hotoduehini te ikelesia. Isiara lobo herara to wan nohonyie iko to Hollum. ²⁹ Isiara hekilak lohorik kuyya lohunik herara, ojio illak liyya daŋ etira to ofioroho to hirro inne ero lobo. ³⁰ Ojio lo owuana lobo iko hirro inne eitiru inyia tara Loyiri ojo inyia ettole to hiji he igem ne ikelesia, isiara lara ero wan hotoduehini liŋliŋ. ³¹ Eremik itai bi daŋ hikila lobotie lobotie anyar oremik lobo tara hatai daŋ eyiyenu atta hiyyo daŋ arrumu golon. ³² Owuon oyiri no hekilani daŋ to hekilak. ³³ Obe Hollum loohoi ara Hollum le etihara, ati ara inyia a Hollum lo humwara. Isiara inna daŋ hatara imohit no heruhok te ikelesiaha bidaŋ. ³⁴ Isiara ŋoruo hotoduehini te ikelesiaha bi daŋ. Hotobiaŋa ida isia ero. Ati isiara hotoduehini ta baŋi, iyya ojio hidofe hifahita. ³⁵ Lo owuon nobo sihin na awak isia hiyyen, isiara isia hefia to liawa illohosie ta haŋ. Ara irri to hiito noŋoruo herarari te ikelesia. ³⁶ Ottu ifa hiram no Hollum tara hatai? Itai hame le efwotu hiram no Hollum hame? ³⁷ Le egigilo lobo ta wan nohonyie hijo ara inyia ahekilani kuyya hidofe a tuŋani lo Hollum, isiara heruho hijo ara hirro inia elimak nayya inno Habu. ³⁸ Ati lebo lobo inia, hotobiaŋa lobo tuŋani hidofe oyyen inyia. ³⁹ Itai halasira hanaŋ, itisiahai hijo anyar ekila itai, hotobiaŋa hidofe itai eyyumo lobo tuŋani herara to ŋadiefa. ⁴⁰ Ati itiyyen hijo anyar egiama itai hirro inno obis iko inno olibo.