¹ Kuya ero nayya to hirori no anjilohien ati kuyya abe nayya amuno hiyyo, ara nayya iyya kwatan no bilet. kuyya iyya baha no himeri. ² Kuyya aremik nayya ekilu, hidofe amijak hirro daŋ hunna eŋofohini, iko hunna owuon iko ofioroho daŋ, kuyya awuon naŋ iko hiruk no obolo inna oremik hitihuut doŋiok, ati kuyya abe nayya amuno hiyyo, ara inia daŋ asai. ³ Esio da hido nayya idahiti innanaŋ to lo ciaŋak hijo hatanya, kuyya hidofe esio naŋ wan nanaŋ hijo hotosuwak hima, ati abe naŋ amuno hiyyo ara inia daŋ asai. ⁴ Ara mune dihan iko nyalami. Ati, obe mune ara hayini iko hitidara. ⁵ Mune, obe omehita, obe egiama to wan lohonyie, obe ejoria kuwak iko hihuma no hipalita. ⁶ Obe mune omuno irruti. Ati omuno inyia hirro hunna ara dedde. ⁷ Odihu inyia rori daŋ, eruk inyia rori daŋ, eyyik inyia to rori daŋ hidofe odik hirro bii daŋ. ⁸ Obe mune eccuŋ. Ati lo owuon hikilita, opuwak iso hikikilita tuŋ. Esionohini iso hirrorita hunna olufa ojo ofioroho atta litai hijo tuŋ. ⁹ Nyo emijak iyyohoi ŋati inno hirro ja. ¹⁰ Ati la fanu hirro daŋ, essaha iso ŋati no hirro inia. ¹¹ Nafa hara nayya ahiito, ero naŋ iyya hiito, egigilo naŋ iyya hiito, ojo hidofe ero nayya iyya hiito. Ifa abolo naŋ, ebusak naŋ rori inno durre adde. ¹² Ati iyyania erriŋa iyyohoi to miraya inna oriok ohidis, ati egonyu iyyohoi to homomite inno hiyyo. Iyyania amijak naŋ hirro kayi. Ati attu nayya amijak daŋ iyya nia omijahini Hollum nayya. ¹³ Ati ta saŋ to huna hunik; hiruk, higigilita no moi iko mune. Ati obolo mune agalik isia daŋ.