¹ Halasira hanaŋ, awak naŋ hijo hotobiaŋa itai ettumo hiram no hisiorita inno Oyiri. ² Eyyen ifa itai hijo, ta nafa hera itai paganohien, ejufuta ifa itai rijorihien inno obe ero iyya orihita ifa isia itai. ³ Ajo naŋ ta hatai hijo obe lobo tuŋani le'ero to duaran no Oyiri no Hollum oremik hipita Yesu, ati obe lobo oremik hijo ara Yesu Habu aracie to duaran no Oyiri lo' Olibo. ⁴ Iyyania owuon hisiorita inno olufa ati Oyiri lobotie esiara isia. ⁵ Owuon hidofe higiemita inno olufa ati ara Habu lohoi lobotie. ⁶ Owuon hidofe hikoita inne egiamari inno olufa, ati ara Hollum lobotie le'egiama hirro daŋ to hiyyo. ⁷ Ati esiarahini to hiyyo daŋ gele gele Oyiri hijo hotoluak iluluŋ. ⁸ Esio Oyiri to lobo ofioroho, ojo hidofe to lobo hiyyen no hirro to Oyiri nobotie. ⁹ Esio inyia to lobo iduariti inne ehumari, ojo to lobo hisiori no hitilibo no hiyyo to Oyiri nobotie. ¹⁰ Ojo to lobo esio hisiori no golon, ojo to lobo hikila. Ojo to lobo esio hiyyen no Oyirihien inno olibo iko inno orru. Esio inyia to lobo hirori no olufa ojo to lobo hiloito ta ŋadief. ¹¹ Ati egiama Oyiri lobotie hirro hunna daŋ, hidofe atta aharak to hiyyo gele gele iyya awak inyia. ¹² Iyya owuon wan nobotie, ati owuon to honyie ŋacio arria, ojo ŋacio inia arria ottuba to wan nobotie. Ara isia daŋ iyyania inno Kristo. ¹³ Nyo to Oyiri lobotie ebatiso iyyohoi to wan nobotie, kuyya era ida hido iyyohoi illo Yudea ojo illo Grik, kuyya piti, kuyya ebe era piti, ewuon iyyohoi daŋ iko Loyiri lobotie. ¹⁴ Nyo obe wan ara ŋati nobotie, ati ara inyia ŋacio arria. ¹⁵ Kuyya ojo heju hijo, obe naŋ ara ŋati no wan inna nyo abe naŋ ara hani. Obe ati inyia ara ŋati no wan dede? ¹⁶ Kuyya ojo hiyyok hijo, abe naŋ ara ŋati no wan nyo abe naŋ ara honyek. Obe ati inyia ara wan dede? ¹⁷ Kuyya lara ida wan daŋ tamai honyek, etidaha iso inyia jai? Kuyya lara ida wan daŋ hiyyok, heŋuada iso inyia jai? ¹⁸ Ati iyyania, ehumak Hollum ŋacio daŋ inno wan iyya awak inyia. ¹⁹ Lara isia daŋ ŋati nobotie, howuon iso wan jai? ²⁰ Iyyania, owuon ŋacio arria ati ara wan nobotie. ²¹ Obe honyek oremik hijo ta hani hijo, "Obe nobo igem nanaŋ iko hoi." Obe hidofe hoo oremik hijo to heju hijo "Obe naŋ awoun he igem iko hoi." ²² Ati ewak iyyohoi ŋacio inno wan inne elik. ²³ Ojo hidofe, ewak iyyohoi ŋacio inno wan inno oliew agalik, ojo emuhok iso iyyohoi ŋacio inne obe elahaman. ²⁴ Obe ŋacio inne elahaman inno wan awak emuhohini. Ati attubak Hollum wan nobotie hijo anyar efwotu ŋacio inno obe elahaman hitahabuta agalik. ²⁵ Hijo hotobiaŋa bwanya owuon ta wan, ati anyar olwuak ŋati nobo te igemita nobotie. ²⁶ Kuyya lodiaha ŋati nobotie, odiaha ŋacio inno wan daŋ tamai. Kuyya lo omune nobo ŋati, ojo ŋacio daŋ atta hitihabwo nobotie. ²⁷ Iyyania, era itai iyya wan no Kristo, hidofe era itai daŋ iyya ŋacio inno wan inno ottuba to honyie. ²⁸ Onyimu ifa Hollum hiyyo ille egiama te ikelesia; lefahat to hosiere, hitarrihi hettittok, ojo hetiyenak. Onyimu inyia hidofe ille ehuma iduariti, hetilibok haluahak, haŋotok ho hirro, ho hiyyo ille ero hirro daŋ ta ŋadiefa inno olufa. Hara isia daŋ lefahat? Hera iso mahu iyyohoi daŋ a hettittok? Hera iso mahu iyyohoi daŋ a hetiyenak? ²⁹ Hera mahu iyyohoi daŋ hekilak? Hera mahu iyyohoi daŋ a hegiamak iduariti? ³⁰ Horemik iso hiyyo daŋ hitilib haŋuak? Heremik iso mahu iyyohoi hiro daŋ ta ŋadiefa? Heremik iso mahu iyyohoi daŋ tamai hiloit ŋadiefa? ³¹ Ati itisiahai hisiorita inno hide to golon inno olibo agalik. Atta iso naŋ ŋetuhutek itai hikoi no'olibo na agalik.