¹ Halasira iko hanasira hanaŋ, awak naŋ anyar eyyen itai, dede olot ifa monyie hohoi to hidis atta isia hillaŋ to hiji ha hari nettok. ² Ebatiso ifa hiyyo daŋ to hidis no Musa iko to hifioŋ. Enya ifa isia ŋiria no oyiri nobotie. ³ Atta hidofe daŋ mata hifioŋ inno oyiri nobotie. ⁴ Nyo amat ifa isia tara morro no oyiri nafa ejufari isia, ojo moruo nia ara Kristo. ⁵ Ati obe ifa illak illohosie etumuno Hollum, ati atta Hollum etisarrik het innohosie to tim. ⁶ Ara hirro hunna hitiriamita tohoi, hijo anyar iyyohoi ebe epal atta hiba te iyyau ojo to hirro inno orru iyya isia. ⁷ Ati hebusak iyyohoi hitihabuo no rijorihien iyya ehuma ifa illohosie. Nyo egiorok to higierita hijo, "Ettole ifa hiyyo atta daha ojo hidofe amata, atta diote atta cia nyo omuno ifa isia hirro inno somon". ⁸ Hotobiaŋa iyyohoi eyyau hirro inno somon iyya nafa ehumari isia daŋ. Oye ifa isia alif hunik ho hunik to holoŋ nobotie to hiram nia. ⁹ Hebusak iyyohoi ati heticiem Habu iyya ehuma ifa illohosie atta munok attohe isia. ¹⁰ Hebusak iyyohoi hiŋuŋunita to Hollum iyya ehuma isia ifa iyya anjilo lo ye. ¹¹ Iyyania, edoŋ hirro hunna to hosie ahitimijanita te iyyohoi. Ati egiorohini higierita esiŋari iyyohoi, hijo eliaha hisidi na fau. ¹² Niyya isiara tuŋani legigilo hijo awueta inyie, hehuma hirrira hijo hotobiaŋa inyia ohuye. ¹³ Obe nobo ciama ottu ta hatai na nobe owuon to hiyyo. Ati olibo Hollum ati obe iso inyia oremik ebusak nobo hisusuta nottu ta hatai na agalik golon nahatai, ati lawoŋ nobo hisusuta esio iso inyia ta hatai nobo hikoi nerisari itai hijo anyar edihu itai. ¹⁴ Itai hunna amuno naŋ, irwuata ade tara hitihabwo no rijorihien. ¹⁵ Ero naŋ ta hatai iyya hiyyo hullo ilofere. Itiŋot rori innanaŋ to wati te innahatai. ¹⁶ Ikobo inna ejahari iyyohoi, obe ati ne ara bwanya no hoto no Kristo? Imune ne nebwanya iyyohoi, obe ati inyie ara bwanya no tuba to Kristo? ¹⁷ Nyo owuon imune nobotie, era iyyohoi nobotie emonya ida hido iyyohoi. Edaha iyyohoi nobotie daŋ imune nohonyie ta mai nobotie. ¹⁸ Itiwolo to hiyyo inno Isarail: obe ara ilia illa adaha hibulucita ara daŋ hadahak ta altari? ¹⁹ Nyo woyyo no hiram nero naŋ inni? Ara rijori anyo? Hara ŋiria nesio hiyyo to rijori anyo? ²⁰ Ati ajo naŋ, esio paganohien hihumita to jiohin ati hotobiaŋa ara to Hollum, abe naŋ awak itai hotorriahai iko johin. ²¹ Hotobiaŋa itai eremik mata te ikobo na Habu iko te ikobo no johin. Hotobiaŋa itai eremik daha to terefeja na Habu iko to terefeja inno meniaŋa. ²² Etijoria mahu iyyohoi Habu hijo hatahaino? Egol mahu iyyohoi luŋa iyya inyia? ²³ "Oremik hiyyo hihuma hirro bi daŋ ati obe hirro innia olwuak isia. Oremik hiyyo hihuma hirro daŋ ati "Obe hirro inia etibolo isia ahide". ²⁴ Hotobiaŋa lobo osiaha hirro innohonyie ati hetisiahai hirro inno olibo inno onyihari honyie. ²⁵ Itidahai hirro hunna etinyiaŋa hiyyo to suk ati ibaŋa efia higigilita innahatai. ²⁶ Nyo "Ara fau na Habu iko hirro daŋ inno owuon dia". ²⁷ Lellilloŋu lobo lobe ara heruhoni itai to nobo daha, eijo itai ewak efi, itidihai hirro inne esio isia to hosiere hatai eijo itai ebe efia hifiita inno higigilita. ²⁸ Lojo lobo ta hatai, "Ara daha inna nesio hiyyo to rijori," ibaŋa adaha inyia. Ara nia to hiram no tuŋani lelimak itai, ojo hidofe to hiram no higigilo. Ara hirro inno owuon ta fau inno Habu. ²⁹ Abe naŋ ero to hiram to higigilo, ati to hiram no lobo. To hiram no nyo eŋot itai hiram no lobo? ³⁰ Ladaha naŋ to mune, no nyo emoro hiyyo naŋ to hiram nia ajo naŋ ifa esio humo? ³¹ Tonia kuyya edaha itai eijo hidofe emata, ati to hirro inne egiama itai, igiama daŋ to ohuo no Hollum. ³² Hotobiaŋa lobo esio hipali to Yudea iko to Grik, kuyya hidofe te ikelesia no Hollum. ³³ Iticiem iyya aciem naŋ hitumuno Hollum to hirro bi daŋ. Abe naŋ asiaha iwahiti innanaŋ, ati inne iluluŋ. Egiama naŋ hijo anyar etilohini isia.