1
Paulo, lafa ellilloŋu Yesu Kristo anyar ara efahati to wahan no Hollum ojo Sostene halasi hohoi.
2
Egiorok iyyohoi to ilulung no heruhok ilo owuon to Korinto, illo ehumak Kristo ahaliborok, anyar ellilloŋo hiyyo ahaliborok, iko illo ellilloŋo bi daŋ fure no Habu Yesu Kristo to misihi daŋ, Habu lo hosie iko lohoi.
3
Isiara hamehini iko himwara hotowuanai ta hatai tara Hollum Monye hohoi ojo Habu Yesu Kristo.
4
Esio nayya humo to Hollum lalaŋ te itai holoŋitek daŋ, nyo ta hamehini no Hollum nafa esio Yesu Kristo tohoi.
5
Esio inyia tohoi ibariti tokoi arriai, to hirorita ojo iko to higigilo.
6
Esio inyia tohoi ibariti, ofe iyya hituhuti no ojo Kristo inyia lara ille dede to hiji hatai.
7
Hidofe, obe itai eremik puahan he innak hisiorita inno oyiri iyya nia etilari itai ta Habu lohoi Yesu Kristo anyar oliew.
8
Etigol iso inyia itai man to hicuŋi, anyar itai obe ara a hepalak to holoŋ no Habu lohoi Yesu Kristo.
9
Ara Hollum lo olibo, ille ellilloŋu itai anyar ettuba iko Lonyi honyie, Yesu Kristo Habu lohoi.
10
Attana nayya itai halasirak iko hanasirak hanaŋ, to fure na Habu lohoi Yesu Kristo, hijo anyar itai eruk wati innahatai, ojo hotobiaŋa nobo higigiala owuon to hiji hatai. Ero nayya hijio anyar ettubahini itai nobotie to hosi innahatai ojo te iwahiti innahatai.
11
Elimak illak ta nayya ta haŋ ho Klu hijo, owuon bwanya to hiji hatai.
12
Etiru nayya hijo, ojio lobo tara hatai hijo, "Ara nayya ahejufutani la Paulo," ojo lobo ojo, "Ara nayya ahejufutani la Appolo," ojo lobo ojio, "Ara nayya ahejufutani lo Peturu, ojo lobo enyiak hijo, "Ara nayya ahejufutani lo Kristo."
13
Hobwanya Kristo? Hara mahu Paulo lafa esiyohini to kuruce te itai? efwotu ifa itai batismo to fure no Paulo?
14
Esio nayya humo to Hollum nyo, obe nayya ifa etifotok batisimo to lobo tuŋani ara ifa to Krispas iko Gayos hame.
15
Ettaluk lobo hijo, efotu ifa itai batisimo to fure nanaŋ.
16
(Dede etifwoto ifa nayya hilahaŋ ne Stifen. ati, ettaluk nayya egigilu lobo tara hatai le etifwotok nayya batisimo to honyie.)
17
Obe ifa Kristo efahu nayya etifwotori ati anyar attu nayya hitiyena sayye inno olibo no obe ara to ofioroho inno tuŋani, hotobiaŋa ye no Kristo to Kuruce obe owuon ho nobo golon.
18
Ara sayye no Kuruce ahibolit to hiyyo illo oyeyeta, ati to hiji illo etilahu Hollum, ara golon no Hollum. Iyya egioro hijio,
19
"Etihar iso nayya ofioroho inno bolitok; ojo etihar iso naŋ hiyenita inno owuon to hiyyo hayenak."
20
Tahu ati tuŋani le elofere?
Tahu hetiyanani lo hifahita? Tahu hegigilok inno ŋasi huno? Hobe ara Hollum emak hibolit to ofioroho inno fau ina?
21
Man to beren, to ofioroho inno Hollum lafa etik hiyyo amijahini inyia to ofioro inno hosie. Ati etilohu Hollum heruhok to sayyejin inno ettitto iyyohoi, hunno ojo hiyyo hijio ara, "Hirro asai.''
22
Efia Judei iduariti inno hitihututa ojo Girik efia ofioroho.
23
Ati etiyana iyyohoi sayye no hesiohini no Kristo, isia sayye inne eyyik Judei hidofe ara ahirro asai to Girik.
24
Ati, te ilia ellilloŋini to hiji ho Judei iko Girik, ara sayye nia to hosie Kristo, lara to golon iko ofioroho tara Hollum.
25
Nyo, sihin no oliew iyya hibolit no Hollum agalik ofioro inno tuŋani, ojo hilik no Hollum agalik golon no tuŋani.
26
halasirak iko hanasirak, iko hegigile ewuon ifa itai jai ifa beren, nafa ellilloŋu Hollum itai. Obe ifa itai daŋ ara a aloferejok illo hiyyo, a hetihutak, obe ifa itai era a hiyyo hullo obis man to hesini nahatai.
27
Ati, onyimu Hollum hirro inno bolitok inno fau huno anyar esio irri to hiyyo ille egigilo hijo egol isi.
28
Onyimu Hollum hirro inno ofiak inno fau inna iko hirro inno obe ara-anyar etifiak hirro inno olibo inno fau inna,
29
Anyar obe lobo tuŋani etidara to hosiere honyie.
30
Ati te inyia awuana itai to Yesu Kristo, lo ottu te iyyohoi to ofioroho tara Hollum- lara ibisti innohoi, libe nohoi, iko hetilahani.
31
Ati, iyya egioro: "Idek lia etidara wan hetidarai ta Habu.''