¹ Oŋida hohoi hul egol’to ta neruk edihu epalita huno elihak bwo fe ebeŋ ettifya etamunoyo hwattek hohoi. ² Ijara hohoi daŋ etamunoyo hutto lonyihari te erre hun oyiji itaboloryere isi. ³ Nyo obeŋ nya Kristo itamunoyo ahwan honyi ati ihwa igyoroni ojo, “Emoriti huno hya hul omorye’to iye emorye ani.” ⁴ Nyo erre hunya igyoroni igyerita beryen igyoroni nya ittiyeniere hohoi bwo fe itilihyere hohoi jo oŋida hohoi ewon iko eyihina bwo fe adihan. ⁵ Ihwania ijara Hollum olo adihan iko etilihyo hesyara jihatai amanya iko egigilo arabotye to Yesu Kristo. ⁶ Jo oŋida itahabuyete tai Hollum, Monye Hobu hohoi Yesu Kristo ta ataji abotye iko etuk abotye. ⁷ Tania ifwotutati illarak hatai ta arryaha ihwa inya ifwotuniere Kristo itai itahabuyere Hollum. ⁸ Nyo ajo ni jo ottu nya Kristo irari apit jyo aati Yudea itahutaniere nelahode ono Hollum bwo fe itasiruniere ecoriti hunya ocorok Hollum jyo hohonyok hohoi. ⁹ Bwo fe jo oŋida paganohyen itahabuye Hollum ta amehino honyi. Ihwa igyoroni ojo, “Tania etahuyo adi ni iye ihiji paganohyen, Bwo fe edolo adi ni ta afure hoi.” ¹⁰ Inyyak bu inyi jaran, “Itai paganohyen, omunoti iko laati hulo Hollum.” ¹¹ Ojo bwo fe, “Itai paganohyen, itahabuyete Hobu, Ijara aati daŋ itahabuye inyi.” ¹² Bwo fe inyyak Isaya jaran, “Ottu adi obo to woyo ba Yese. Lya ol odetuno’to ilettohori adi paganohyen, Iyihini adi paganohyen jihonyi.” ¹³ Ihwania ijara Hollum olo eyihina itufutak itai ta namuno iko nelik tajya ta neruk, jo oŋida neyihina hatai oboboloruno ta adwaran ono Oloyiri ol Olibo. ¹⁴ Illarak hoŋ, ani ta ahwan hoŋ eyihi ni jo ifutata tai iko nayiji bwo ofyoro daŋ hun iremehina tai isiŋyere illarak hatai. ¹⁵ Ati egyoro ni jihatai te eŋere itagiluniere itai nyo ta amehino an isyo Hollum jihoŋ ¹⁶ irari apit olo Yesu Kristo jyo paganohyen. Ara ni ihwa ehumani te ettiyenio asayyo huno Hollum, jo oŋida Hollum ifwotu paganohyen ihwa ehumi an ittaŋani ta Oloyiri ol Olibo. ¹⁷ Tania etadara ni to Yesu Kristo te egyama hoŋ jyo Hollum. ¹⁸ Nyo ettallik ni ekyana to obo ariŋarari te erre hun ihanio Kristo toni iyaŋuniere aniŋyo te ekyanita iko ehanita jyo paganohyen. ¹⁹ Ottu ana jihosi ta adwaran ono etamijanita iko ellillihita bwo fe ta adwaran ono Oloyiri ol Olibo. Tania atuk ni ettiyenio asayyo huno Kristo imisihi daŋ to Yerusalem many ifau Iliriko. ²⁰ Many beryen awak ni ittiyeniere asayyo hun oyiji’to jyo amasik huno hobeŋi’to omijani afure Kristo. Jo oŋida ani abeŋ ettiyenio jyo amaji an ittiyeniere obo atulo. ²¹ Ati ihwa igyoroni jo, “Itaniŋuni adi hulo hobeŋi’to itayiruni eram honyi. Omijani adi hulo hobeŋi’to itaniŋuni afure honyi.” ²² Inyi ana an itihotyerek ani ittuniere jihatai enyyahita arryai. ²³ Ati ihwania obeŋ obo amaji jihoŋ dini igyamari. Bwo fe ta aŋasi arryai awak ni ittuniere jihatai. ²⁴ Tania awak ni mijaro itai al alo ni Espania bwo iremehina tai ilwak ani ta adaha hoŋ al etuk hohoi abala. ²⁵ Ati ihwania alo ni Yerusalem iyari alwahyo jyo aati Hollum. ²⁶ Nyo owahi nya aati hulo Masedonia iko Akaya ilwahyere aati Hollum alocaŋak hutto Yerusalem. ²⁷ Omunoi aati hulo Masedonia iko Akaya bebe ilwahyere alocaŋak hya nyo arai isi awati horos hosi. Nyo kuyya ifwotuni paganohyen jyo Yudea erre hun oyiji huno oloyiri, ara ahoros jihosi ilwahyere isi te erre huno ahwan. ²⁸ Tania al atuk ni egyama ania bwo fe etagol ni isi ta alwahyo ana attu adi ni atta latai al alo ni Espania. ²⁹ Bwo amijak ni al attu ni jihatai attu adi ni al efut iko emuniti huno Kristo. ³⁰ Ihwania elolya ni jihatai illarak to Hobu hohoi Yesu Kristo bwo fe ta namuno ono Oloyiri; hamojoti ikoŋ bebe jyo Hollum toni. ³¹ Omojoti jo oŋida italahuni ani jyo aati hutto Yudea hul obeŋi’to iruhi. Omojoti bwo fe jo oŋida aati Hollum hutto Yerusalem ifwotuni ta amuno alwahyo an eyaŋuno ni. ³² Tania ta awahan ono Hollum ijara ani attu jihatai ta amuno bwo anyurak ayiri ihiji hatai. ³³ Ihwania ijara Hollum al isyo’to nelik tajya hatawana jihatai. Amen.