¹ Obusak Yesu amaji ania ette caharu imiji hosi bwo fe leyiyanak honyi ijifarai inyi. ² Ninya lattu sabato ette inyi itteryo ittiyenio ihaji imojit, ette laati illilliha bebe al itaniŋuni isi inyi. Ojori isi, Orumak inyi ettiyenita hunia aja? Aŋai omijak atulo alya erre huna? Aŋai ihanio inyi edwariti hun obolori’to? ³ Obeŋ ara inyi ehuhumani bau, lonyi Maria, bwo fe illarak honyi Yakobo, Yose, Yuda iko Simone? Bwo fe obeŋi haniarak honyi amanyai aŋati jihohoi? Ette isi ihara inyi. ⁴ Attati Yesu jaran jihosi ojo, Owon etahabuyo jyo eyani sayyo, ati imiji hosi bwo fe ihaŋ hosi obeŋ etahabuyo. ⁵ Obeŋ inyi oremik ihanio obo ariŋ dia ati ottirok inyi ahas honyi jyo aŋwak kai ette isi ŋidari. ⁶ Ette inyi illilliha ta abyaŋan hosi iruk. Attati inyi leten jyo amisihi hutteger ittiyeniere. ⁷ Attati inyi ikyana jyo leyiyanak honyi ’tomon harrihai ette ifahina isi arrihai arrihai imisihi bwo fe isyo jihosi nadwaran daŋ ababo igalihiniere ajohin hun orrohoji’to. ⁸ Iramak inyi isi hobyaŋahi iyarai obo ariŋ ta adaha hosi arari elluhi hama; obeŋ aŋirya, obeŋ akis, obeŋi agurusi itwa jafi hosi. ⁹ Oŋida isi ofwoi ta amuha hama hutto hejek bwo fe obeŋi iyarai agamisi arrihai. ¹⁰ Ette inyi inyyak iramana omuk jihosi ojo, Al itoŋoti tai jyo obo aji arasati dia many ibusaniete tai amaji nya. ¹¹ Kuyya ihari omuk laati jyo obo amaji efonyo itai, bwo fe ihari isi itaniŋuna ekyana hatai, al ibusana tai amaji nya iddiddyaŋata attuduha to hejek hatai hetera etamijani jihosi. ¹² Attati leyiyanak fwatan ittittoyo aati jo oŋida isi iloiti atajya hosi t’eyyata hosi. ¹³ Bwo fe ifuhari isi ajohin hun orrohoji’to bwo fe itaŋidari laati hul oŋwai’to te eyali an iyalyerek isi. ¹⁴ Itaniŋu hobu Erode te eram Yesu nyo elyece laati daŋ afure honyi. Attati isi jaran, Yoane Batista ibuhu to ye bwo fe ihanio Yesu nedwariti honyi. ¹⁵ Bwo fe ikyanai omuk ojori, Ara inyi Elija. Bwo fe omuk ojori, Ara inyi aheyani sayyo ihwa eyak sayyo hinya beryen. ¹⁶ Ati ninya itayiru Erode erre huna ojo inyi, Yoane alya linya oŋotuni ahou addi, inyi al ibuhu’to alya to ye. ¹⁷ Nyo inyi Erode alya inya ifak’to oseŋer inefuniere Yoane ette ifitana inyi ibabus. Ihanio inyi ihwania itamunoyere Erodia, ŋorwoi illanyi Filipo, nyo ayama Erode inyi. ¹⁸ Nyo ojo nya Yoane jyo Erode, Obeŋ oyyu jihoi imanyari iko ŋorwoi illa hoi. ¹⁹ Attati Erodia iloŋojita jihonyi bwo fe awak ’tohoro inyi ati obeŋ inyi onyurak obo ekoi ittohori. ²⁰ Ati abaŋ Erode Yoane nyo omijak inyi ara inyi atulo ol oyyu’to bwo fe odwa. Attati Erode isiyo Yoane. Al itayiru inyi nekyana Yoane ette inyi ijiriŋa bebe, ati awak Erode itayiryo nekyanita honyi. ²¹ Attati neyom ’tuna ono oloŋ ninya isiunierek Erode, bwo fe ihuhumak inyi aŋiyo jyo hobwok iko oseŋer honyi bwo fe jyo eleittaha hulo Galilea. ²² Attati ŋarri Erodia jiŋana ette hya ihiji hosi, attati inyi itamuno Erode iko hul itoŋoi’to ikonyi. Ette Erode jaran jyo odwoti, Ifiye ani to omuk erre hun iwak iye. Esyo adi ni jihoi. ²³ Attati inyi coronia ettuŋo honyi ojo, Esyo adi ni iye erre daŋ hun ifiyo iye dwadi aŋati ono olobye hoŋ. ²⁴ Ette odwoti leten ilet ette ifiyo honyonyi ojo, Anyo riŋ adi efiyo ni jihonyi? Itarraŋ honyonyi ojo, Ijara awak ni ahou Yoane Batista. ²⁵ Attati inyi caharo kokwak jyo hobu Erode ette jaran jihonyi, Awak ni iye ihwania isyo ani ahou Yoane Batista itwa sahan. ²⁶ Attati hobu jiriŋa bebe ati obeŋ inyi iha odwoti nyo acorok dwo bu inyi te ettuŋo bwo atamonok itaniŋuni. ²⁷ Teyya teyya attati inyi ifahina obo oseŋeritanani hetelo iyauno ahou Yoane. Attati lya leten ette ŋut ahou Yoane ’totwa babus. ²⁸ Attati iyaŋuno ahou honyi itwa sahan, attati inyi isyo jyo odwoti bwo odwoti ette isyo jyo honyonyi. ²⁹ Itaniŋuni leyiyanak hulo Yoane ette isi fwana ette iyaro ahwan honyi ette nuhana ilume. ³⁰ Ocohunie lefahatz jyo Yesu ette iramana jihonyi erre daŋ hun ihanie isi bwo fe ittiyenie. ³¹ Attati inyi jaran jihosi, Efwo ikoŋ ta ahwattek hatai, efwo jyo amaji on oyur’to iyiryari kai. Nyo adahai laati arryai dia bwo fe obeŋ asaa jihosi iŋiyere aŋiyo hosi. ³² Ihwania attati isi dahina itwa togol ette fwatan jyo amaji on oyur’to. ³³ Ati igonyuni laati arryai isi ofwoi ette isi ŋyoron to misihi daŋ ilotifor hari ette fanyan aŋati tole ahosyere Yesu. ³⁴ Ninya isuru Yesu iko leyiyanak honyi totwa togol igonyu inyi eluluŋ wati owotyai. Omehino ataji honyi tesi nyo arai isi ihwa akyoro hun obeŋi heyyahani, ette inyi itteryo ittiyenio isi erre hun olwaji. ³⁵ Al ilyaha oloŋ eddorro ette leyiyanak honyi fwanna jihonyi ette jaran, Amur ana bwo fe ilyaha noloŋ eddorro. ³⁶ Ifak eluluŋ wati imatta iko imisihi inyyaŋari erre hun oŋiye isi. ³⁷ Ati itarraŋ inyi jihosi ojo, Isyatta isi aŋiyo. Attati isi jaran jihonyi, Iwak ati iye hohoi efwo iyaŋuno emunio ta arobia omuk hun olwaji oŋida esyo jihosi hotoŋiyehe? ³⁸ Attati inyi ifiyo isi ojo, Omukaja emunio jihatai? Ifwatta imijata. Al ihenie isi ette isi iramana inyi ojo, Arai emunio miet bwo aham arrihai. ³⁹ Attati inyi iramana isi hetetoŋohi ifau jyo amiyaŋ en egara. ⁴⁰ Attati isi itoŋo ifau te eluluŋi esiha abotye bwo omuk atomwana miet. ⁴¹ Attati inyi iduhuna emunio miet bwo aham arrihai ette ibonno ahide ette jaran humo jyo Hollum, attati ibibeny emunio ette isyarana jyo leyiyanak honyi hataharaniehe jyo laati. Attati inyi harana bwo fe aham arrihai jihosi. ⁴² Oŋiye isi daŋ ette ifoŋ. ⁴³ Attati isi suduhana ofitot imunio iko aham hun oremehini ta afejin ’tomon harrihai hun ifuti. ⁴⁴ Arai aati hul oŋiye alyawa esiha atomwana miet. ⁴⁵ Teyya teyya ifak inyi leyiyanak honyi hatadahiniehe itogol hatallaŋahi aari, many imiji Beteseda ahosyere honyi, attati inyi ifahina eluluŋ wati addi. ⁴⁶ Ifony inyi isi bwo ihalu olo inyi idoŋe imojori. ⁴⁷ Ta attari ette atogol wanan ihiji hari attati Yesu wanan ilotifor, inyi hama. ⁴⁸ Igonyu Yesu isi ittigemye te eguryo hari nyo ohuco oyyami bebe. Ninya ilyaha ataŋatye motye ette inyi leten jihosi al adaha ta ahide hari. Ojo inyi agalaru atogol. ⁴⁹ Ati al igonyuni isi inyi adaha ta ahide hari, igigiloi isi jo kuyya ara inyi aŋarri jok ette isi ilulwo. ⁵⁰ Igonyuni isi daŋ ette isi baŋi bebe. Ati teyya ette inyi ikyana jihosi ojo, ''Itagoloto atajya hatai! Ani alya! hebaŋata!'' ⁵¹ Attati inyi leten jihosi ette dahina itogol attati oyyami dwa. Ihwania ette isi illilliha bebe, ⁵² ati obeŋi isi omijani awoyo hiram ono emunio nyo ogoli atajya hosi. ⁵³ Ninya allaŋi isi aŋati hari tole ifau Jenesaret ette isi ifitana atogol. ⁵⁴ Isuruni isi to togol ette aati mijana daŋ Yesu. ⁵⁵ Ette isi ŋyoron ihaŋitek ikafuniere aŋwak te ekafiti hosi jyo amaji an itaniŋuni isi jo owon Yesu dia. ⁵⁶ Ninya adaha inyi imisihi iko imatta wati daŋ, itaferehitai isi aŋwak ikoi ette isi mojo inyi ijara hotottirohe eger boŋo honyi bwo fe aati daŋ hul ottiri’to aboŋo honyi aŋidari.