¹ Ati arasa nya Saulo igigilo ibahyere bwo ittohyere leyiyanak hulo Hobu. Teyya olo inyi jyo ehumani ol obolo’to, ² ifiyere awaraga jyo laati hulo asik imojiti hutto miji Damasko, ojo inyi jo al anyurak inyi omuk laati dia hul ijifatye ekoi ono Hollum hul arai alyawa kuyya bu aŋorwo, efituno adi inyi isi Yerusalem. ³ Ninya lafany inyi iger Damasko, teyya kwak ette afaŋan t’edou itafaŋ amaji ania. ⁴ Attati inyi kwaharo ifau ette itaniŋuna ekyana on ojo, Saulo, Saulo, nyo ittigemyo iye ani? ⁵ Itarraŋ inyi ojo, ngai iye, Hobu? Bwo inyi ette jaran jihonyi, Ani Yesu al ittigemyo iye. ⁶ Ati otte, ojiŋak imiji bwo iramani adi jihoi anyo adi ihanio iye. ⁷ Ati laati hunya adahai’to ikonyi owotyai bwo obeŋi ikyanai nyo itaniŋuni isi ekyana ati obeŋi isi igonyuni obo atulo. ⁸ Odyoto Saulo bwo aŋai oŋite honyi ati obeŋ inyi igonyu obo ariŋ. Orihoroi inyi teyya ta aani many Damasko. ⁹ Attati inyi itoŋo oloŋodo to oŋitek hunihoi bwo obeŋ oŋiyo ara dwo bu amaco obo ariŋ. ¹⁰ Owon nya obo leyiyanani imiji Damasko afure honyi Anania. Attati Hobu leyehino jihonyi ette jaran, Anania. Itarraŋ inyi ojo, Ani olo Hobu. ¹¹ Bwo Hobu ojo jihonyi, Otte, ilo jyo ekoi an ifurani Ibisa bwo ittittifa aji ono Yuda. Owon obo atulo dia olo Tarasa afure honyi Saulo, lyo hodulo omojo. ¹² Bwo igonyu inyi to rigya honyi obo atulo afure honyi Anania ottu iyyabana ahas honyi jihonyi isyoryere inyi amijo. ¹³ Ati itarraŋ Anania ojo, Hobu, etaniŋu nya ni enyyahita arryai eram ono atulo lya. Ihanio nya inyi arrohoji on obolo jyo aati hoi hutto Yerusalem. ¹⁴ Bwo fe ottu inyi dini iko nefahi ono ehumak eleittaha ifitaniere hul ilyece’to afure hoi. ¹⁵ Ati ojo Hollum jihonyi, Ilo, nyo ara inyi ahegyamani al anyimu ni itisarrahiniere afure hoŋ jyo paganohyen iko hobwok bwo jyo aati Israele. ¹⁶ Bwo fe etahutak adi ni inyi ettigemita hun odihu adi inyi ta afure hoŋ. ¹⁷ Tania olo Anania ette jiŋana ihaji ania. Iyyabak inyi ahas honyi jyo Saulo ette jaran jihonyi, Saulo, illaŋ, Hobu Yesu oŋole oleyo’to jihoi te ekoi hettu iye, ifahu ani oŋida iye inyyak mijo bwo oŋida iwon iko Oloyiri ol Olibo. ¹⁸ Teyya kwak okwahunie omuk asaŋ to hoŋite honyi ihwa abohonyita hwan ette inyi mijo. Odyoto inyi ette ifwotuna batisimo. ¹⁹ Attati inyi ŋiyo ette ahwan honyi golon. Arasa Saulo dia imiji Damasko iko leyiyanak to omuk oŋitek. ²⁰ Attati inyi leten ihaji imojit ittittoyere ta afure Yesu ojo, ara inyi Lonyi Hollum. ²¹ Ati hya hul itaniŋuni’to nekyana honyi illillihai bwo ojori, Obyaŋara atulo olo etatturoni wati hul ilyece’to afure Yesu imiji Yerusalem? Bwo obeŋ nya inyi ottu dini iyari aati ifitaniere ihosyere hehumak leittaha? ²² Ati oboboloruno nya agolon ono Saulo to oŋitek hwa bwo itadwahi inyi Yudea hul amanyai’to Damasko itahutaniere jihosi jo ara Yesu a Kristo. ²³ Ihalu omuk oŋitek igigiloi Yudea ittohori Saulo. ²⁴ Ati itaniŋu Saulo jo arratye isi ikatin ta arwe bwo fe ta afanni ittohori inyi. ²⁵ Attati leyiyanak honyi iyaro inyi ta arwe ette itusuronia inyi otto lohitir ta agufa. ²⁶ Ninya lafany Saulo Yerusalem awak inyi itoŋo iko leyiyanak ati abaŋi isi inyi nyo obeŋi isi iruhi arahan honyi aheyiyanani. ²⁷ Ati iyaro Barnaba inyi jyo lefahat ette iramana isi aŋai nya igonyu Saulo Hobu te ekoi al ikyana jihonyi, bwo fe aŋai ittiyenio nya Saulo te eŋere ta afure Yesu imiji Damasko. ²⁸ Tania adaha nya inyi ihiji hya hutto Yerusalem, ²⁹ ittiyeniere te eŋere ta afure Hobu. Bwo fe ittittoyo inyi ette itiwwahyo laati Grik bwo isi ette jaran ettoho inyi. ³⁰ Ninya lamijani leyiyanak eram ania ette isi iyaru Saulo limiji Cesarea bwo ifahini inyi teyya Tarasa. ³¹ Tania ahayimai nya eruhok hutto Galilea iko hutto Yudea dee, ette boboloruno. Tania olwaji nya laati bwo adahai isi ta abaŋi Hobu iko ta etalwahuna ono Oloyiri ol Olibo. ³² Ihwania al adaha Petro ihiji heruhok daŋ afany inyi many jyo aati hul olibori’to hutto miji Lida. ³³ Owon obo atulo dia afure honyi Aneya, al iluro amaji abotye al arrohoja ta aŋasi hottohunik. ³⁴ Ojo Petro jihonyi, Aneya, itaŋida Yesu Kristo iye ihwania. Otte bwo obubuna ejotit hoi. Teyya kwak ette inyi dyoto. ³⁵ Bwo aati daŋ hul amanyai’to Lida iko Saron igonyuni inyi ette isi iloit atajya hosi jyo Hobu. ³⁶ Ihwania owon bwo fe imiji Jopa obo aŋotte eyiyanani, afure honyi Tabita, an iloŋoi aati Grik inyi Dorka on ojo ’lyawa. Oyiji nya ehanita honyi nyo olwahyo inyi aati. ³⁷ To oŋitek hunia inef oŋwai inyi ette inyi ye. Illillai nya isi ahwan honyi bwo itaferehini inyi ihaji on oduhoni ihide hanie. ³⁸ Owon amiji Lida iger Jopa bwo al itaniŋuni leyiyanak jo owon Petro dia, ifahini isi aati arrihai dia iloŋuniere inyi ojo, Waŋ jihohoi kwak. ³⁹ Tania odyoto Petro ette fwatan ikosi. Ninya lafanyi isi dia iyarai isi inyi jyo aji ania. Owotyai ayyok aŋati; isi obiloŋi ŋorwo. Itahuce isi aboŋojin hunya ikaico Dorka hesu inyi. ⁴⁰ Ati ifak Petro isi daŋ alet ette rigoŋi imojori. Oyito inyi jyo ahwan ŋotte ania ette jaran, Tabita, otte. Ette inyi ŋa oŋite honyi. Al igonyu inyi Petro ette inyi dyoto. ⁴¹ Inef Petro aani honyi bwo itadet inyi. Iloŋu inyi eruhok iko obiloŋi ŋorwo ette isyarana inyi jihosi an isu. ⁴² Isarrahi eram ana imiji Jopa daŋ bwo iruhi aati arryai jyo Hobu. ⁴³ Itoŋo Petro imiji Jopa oŋitek arryai ihaji Simone egyamani ’yoni.