¹ Tania iruk Saulo hotottohorohi inyi. To oloŋ ania itteryo ettigemyo on obolo jyo eklesya imiji Yerusalem bwo itisarrahini eruhok daŋ ifau Yudea iko Samaria, arari lefahat hama. ² Omuk hulo eruhok iyarai Setefano inuhaniere ette isi ihanana atwari tenyi. ³ Ati itattur Saulo eklesya. Ojiŋak inyi asik daŋ bwo ipihuta alyawa iko aŋorwo ihanata ibabus. ⁴ Attati hul itisarrari ittittoyo ekyana ono Hollum. ⁵ Alo nya Filipo limiji obo ono Samaria ette ittittoyo jihosi eram Kristo. ⁶ Bwo eluluŋ wati ette fwanna arabotye jyo Filipo. Itaniŋuni isi ekyanita honyi bwo fe igonyuni isi etamijanita hun ihanio inyi. ⁷ Ta nelulwo, ofuhorutai nya ajohin hun orrohoji’to addi jyo laati hul isitaji’to, bwo hul ogolyori hwattek iko aŋurak ette ŋidari. ⁸ Tania owon nya amuno on obolo jyo amiji ania. ⁹ Ati owon obo atulo dia afure honyi Simone al ara ahebwanani bwo odemyo inyi, attati laati illilliha bwo ojori jo ara inyi atulo eleittok. ¹⁰ Bwo fe iruhi isi jihonyi jo, Atulo olo, ara inyi ol odwara olo Hollum. ¹¹ Iruhi isi inyi nyo igonyuni isi amuroyo honyi many beryen. ¹² Ati al itaniŋuni isi Filipo ittittoyo asayyo hun oyiji huno olobye Hollum iko ta afure Yesu, iruhi isi ette ifwotuna batisimo, alyawa iko aŋorwo daŋ. ¹³ Attati Simone bwo fe iruk ette ifwotuna batisimo bwo adahai inyi iko Filipo igonyuniere etamijanita iko edwariti hun ihanio inyi. Ette inyi illilliha bebe. ¹⁴ Ninya litaniŋuni lefahat hutto Yerusalem jo ifwotuni laati Samaria ekyanita huno Hollum ette isi ifahina Petro iko Yoane dia. ¹⁵ Lafanyi isi dia ette isi mojo ta aati, oŋida ifwotuni Oloyiri ol Olibo. ¹⁶ Nyo hobeŋ nya inyi ottu jihosi, ati ibatisye nya isi ta afure ono Hobu Yesu. ¹⁷ Tania iyyabani isi ahas hosi jyo laati itifwotuniere isi Oloyiri ol Olibo. ¹⁸ Ninya ligonyu Simone jo isyori Oloyiri te eyyabana lefahat ahas hosi, awak inyi inyyaŋa adwaran jihosi ta agurusi, ¹⁹ bwo ojo inyi jihosi, Isyatta bwo fe ani adwaran ana oŋida bwo fe lya el eyyabak ni ahas hoŋ jihonyi ifwotu Oloyiri ol Olibo. ²⁰ Ati ojo Petro jihonyi, Olitohina iko agurusi hoi ihima on osyo fur, nyo igigilo iye inyyaŋari esyoryo ono Hollum ta agurusi. ²¹ Obeŋ amaji jihoi dini te egyama ana nyo orroho ataji hoi to hosyere Hollum. ²² Iloito ataji hoi to ’rohoji bwo omojoi jyo Hollum ibusaniere ewahiti hoi hun orrohoji’to hunia. ²³ Nyo egonyu ni ahaini otto taji hoi bwo ifitani eyyata hoi ihwania iye. ²⁴ Itarraŋ Simone ojo, Omojoi jyo Hobu toni jo hetebyaŋahi erre hun ikyana iye hunia idwoŋi jihoŋ. ²⁵ Ihwania ninya latuhoni Petro iko Yoane iramana neram Hollum iko netamijanita hosi, acaharai isi Yerusalem bwo ittittoye asayyo hun oyiji’to jyo aati hutto misihi omuk daŋ huno Samaria. ²⁶ Ati ojo anjelo olo Hollum jyo Filipo, Otte, ilo te ekoi otto hani iŋet, inyi ekoi on ottu’to to Yerusalem many Gasa. Owon ekoi ania litwa mur. ²⁷ Odyoto Filipo ette leten. Ihwania owon obo atulo olo Abasa, egyamani olo Kandase nobu an ara Abasetanani. Ara inyi aherrirryani gurusi daŋ. Ottu nya inyi Yerusalem imojori. ²⁸ Attati inyi caharu. Ninya hetoŋo inyi litoromile honyi, ihenio nya inyi ekyana ono Hollum ninya igyorok eyani sayyo Isaya. ²⁹ Ojo Oloyiri jyo Filipo, Ilo, adak jyo atoromile ania. ³⁰ Oŋer Filipo jihonyi bwo itaniŋu inyi lya ihenio ekyanita huno eyani sayyo Isaya. Ette ifiyo inyi jo, Itaniŋu iye ekyanita hun ihenio iye hunia? ³¹ Itarraŋ atulo alya ojo, Aŋai etaniŋu ni bwo tulo ani ebeŋ etahutak? Attati inyi iloŋuna Filipo hotojiŋu itoromile itoŋori ikonyi. ³² Ekyanita huna hun ihenio inyi ojo, “Orihoroi nya inyi ittohori ihwa aker ol ofwoi ’tohoro. Obeŋ nya inyi ikyana omuk erre ihwa lonyo ker ol obeŋ amala ihosyere herrirryabani honyi. ³³ Iholoŋ on omoryerek laati inyi obeŋ aŋoco honyi obis. Bwo ŋai adi igonyu awoyo honyi? Nyo iyari isi nesu honyi addi to fau.” ³⁴ Ojo atulo alya jyo Filipo, Arai ekyanita huno eyani sayyo alya tenyi kuyya ikyana inyi to obo atulo? ³⁵ Ette Filipo ikyana jihonyi ette itter jyo ekyanita hodwo iramaniere inyi asayyo huno Yesu. ³⁶ Ninya hadahai isi likoi afanyi isi jyo obo aari bwo ojo atulo alya jyo Filipo, Imijye aari ana. Aremik ni ifwotuna batisimo? ³⁷ Ojo Filipo jihonyi, Iremik iye al iruk iye ta ataji hoi daŋ luŋa. Itarraŋ inyi ojo, Eruk ni jo ara Yesu Kristo Lonyi Hollum. ³⁸ Ette inyi itawoj atoromile. Ette isi isuruna litwa hari ette Filipo ibatis inyi. ³⁹ Lafwoni isi totwa hari inef Oloyiri olo Hobu Filipo ette iyaro inyi addi bwo obeŋ atulo lya inyyak igonyuna inyi. Bwo olo inyi imiji hosi ta namuno on obolo. ⁴⁰ Ati idwoŋ nya Filipo imiji Asoto ette inyi leten ittittoyo asayyo hun oyiji imisihi daŋ many Cesarea.