¹ Ati owon nya obo atulo, afure honyi Anania bwo ŋorwoi honyi Safira, itinyyaŋak nya amana hosi. ² Ati omwanak nya latulo olo agurusi omuk bwo ette isyarana lefahat ofitot bwo omijak nya ŋorwoi honyi. ³ Ati ojo Petro jihonyi, Anania, nyo itufutak Sitan ataji hoi igyosomori jyo Oloyiri ol Olibo ette mwanana anus huno agurusi hun inyyaŋarik amana? ⁴ Hebeŋ iye itinyyaŋak amana ana, obeŋ nya inyi ara ahonohoi? Bwo litinyyaŋak iye, obeŋi agurusi hunia arai ahunohoi ihaniere ihwa iwak iye? aŋai igigilo iye itaji hoi ihaniere ihwania? Ibeŋ iye igesem jyo laati ati jyo Hollum luŋa. ⁵ Ninya litaniŋu Anania ekyanita huna, akwaharo inyi ifau ette ye. Attati abaŋi on obolo jiŋana itajya wati hul itaniŋuni’to eram ana. ⁶ Odyotoi monyomiji ette bubunana inyi ette iyaro ilet inuhaniere. ⁷ Ihalu asahyen hunihoi afany ŋorwoi honyi on otimo jo anyo idwoŋ jyo habi honyi. ⁸ Ojo Petro jihonyi, Iramak ani, itinyyaŋana tai amana ta agurusi huna kuyya obeŋ? Itarraŋ inyi ojo, Afe, ta agurusi hunia. ⁹ Ojo Petro jihonyi, Aŋai igigiloti tai arabotye iryafyere Oloyiri olo Hollum? Imija aati anuhak habi hoi hutte kat. Eyarai iye ahana. ¹⁰ Kwak teyya akwaharo inyi ihosyere hejek Petro ette ye. Ania, ette monyomiji fwanna nyurana inyi laye ette iyaro inyi ilet linuhaniere iger habi honyi. ¹¹ Attati abaŋi on obolo bebe ’tuna jyo eklesyah daŋ iko jyo aati daŋ hinya itaniŋuni’to erre hunia. ¹² Ihwania ihanie lefahat etamijanita iko edwariti arryai ihiji wati bwo ottubanie isi ihiloŋoni ono Solomone. ¹³ Bwo aati omuk abaŋi ifwonniere jihosi nyo itahabuye aati isi bebe. ¹⁴ Ette aati ifwonnitta hul iruhi jyo Hobu ittubari ikosi, alyawa iko aŋorwo arryai. ¹⁵ Akafattai isi aŋwak te ejotiti hosi ikoi jo oŋida el elor Petro tolya kuyya ara bati hottirok inyi abali hwan honyi jihosi. ¹⁶ Bwo fe aati hutto misihi hutteger Yerusalem ette fwanna iyaŋunie iko aŋwak hosi iko hul oŋiye ajohin ette isi daŋ ŋidari. ¹⁷ Ati ahain ehumani ol obolo’to bebe iko laati honyi hul anyai’to Saducehyen, ¹⁸ ette isi inefuna lefahat ette ifitana isi ibabus. ¹⁹ Ati ta arwe ottu anjelo olo Hollum ette ŋa ekatin babus bwo iyaŋuno isi ilet ette jaran jihosi, ²⁰ Ifwatta ihaji imojit eneittok ittata wotya dia ittiyeniere ekyanita huno nesu. ²¹ Tania ta amotye hanyik ojiŋani isi ihaji imojit eneittok ittiyeniere. Attati ehumani ol obolo’to fwanna iko aati honyi ette iloŋuna eleittaha hulo aati Israele bwo ifak oseŋer ibabus iyaŋuniere isi. ²² Afanyi oseŋer dia, onyurani isi abeŋi, ette isi caharu ette jaran, ²³ Enyurak hohoi ababus ihyana bwo errirryak owotyai ikatin ati al eŋa hohoi ekatin enyurak hohoi labeŋ tulo ’totwa''. ²⁴ Ninya litaniŋu eleittok olo oseŋer iko ehumani ol obolo’to ekyanita huna ette isi illilliha ojori, Aŋai idwoŋi erre huna? ²⁵ Ati ottu obo iramaniere isi ojo, Aati hyoŋole ifitana tai ibabus ittiyenie aati ihwania ihaji imojit eneittok. ²⁶ Attati eleittok iko oseŋer honyi fwatan iyaŋuniere isi ati obyaŋara ta agolon nyo abaŋi isi ŋadi aati irwoŋye isi. ²⁷ Iyaŋunie isi lefahat ette itawojihina isi ihosyere hewwak hirre ette ehumani ol obolo’to ifiyo jihosi ojo, ²⁸ Eramak nya hohoi itai jo, hettiyeniete ta afure ana, ati itufutana tai Yerusalem te ettiyenita hatai bwo fe iwahata ŋotonia naye ono atulo alya jihohoi.'' ²⁹ Ati itarraŋi Petro iko lefahat jojo, Oŋida eniŋyo hohoi Hollum agalik aniŋyo laati. ³⁰ Hollum olo hohonyok hohoi inyi itubuhu Yesu linya ittohoro tai te esihonia hatai inyi ikruce. ³¹ Itubuhu Hollum inyi ette ititoŋonia inyi ihani iŋet honyi bwo fe ihanak inyi Eleittok iko ahetalahani olo Israele isyoryere jihosi eloico ono ataji iko ahohina ono eyyata hosi. ³² Era hohoi daŋ iko Oloyiri ol Olibo ahetamijanak hulo nerre huna nyo isyo Hollum Oloyiri jyo hul oniŋye’to inyi. ³³ Itaniŋuni isi hunia ette isi iloŋojita bebe bebe ette jaran ettoho isi. ³⁴ Ati owon nya obo dia olo Farisei afure honyi Gamalio. Ara inyi ahettiyanani bwo fe ohu nya nafure honyi jyo laati. Ette inyi wotya bwo ifak lefahat ofwoi do ilet. ³⁵ Ofwoi isi ette inyi jaran jyo hul iwwahai eram ania ojo, Itai aati Israele, ihumata mijo anyo ihaniete tai jyo aati hulo. ³⁶ Nyo imijana tai oŋitek hunya odyotori Tadeo linya ojo’to jo ara inyi eleittok bwo fe ijifatye nya aati esiha aŋwan inyi, ati oye inyi bwo aati honyi ette isarrahina. ³⁷ Bwo ihalu odyoto Yuda olo Galilea to oŋitek hunya ihenierek aati. Ijifatye omuk laati inyi ati laye inyi ette aati honyi isarrahina. ³⁸ Tania eramak ni itai te eram ana, idehina aati hulo. Nyo al igyamai isi ta awahan ono aati isarrahi adi eram hosi asai. ³⁹ Ati kuyya igyamai isi ta awahan ono Hollum ibyaŋata adi itai iremehina itihuna isi. Bwo fe ihumata igigilo ŋadi irata amyorok hulo Hollum. ⁴⁰ Tania iruhi isi ekyanita honyi. Attati iloŋuna lefahat ette ifodok isi ifodok bwo iramani isi jo oŋida isi obeŋi inyyahi ittiyenio ta afure Yesu, ette isi hohina isi hefwahi. ⁴¹ Obusani isi eleittaha ta amuno nyo osiru jihosi idihuniere ettigemita ta afure ono Yesu. ⁴² Bwo oŋitek daŋ ittiyenie isi ihaji imojit eneittok iko ihaŋitek daŋ jo ara Yesu olonyimoto olo Hollum.