¹ Ninya lawon adaha Italya ta ababur eyarai nya Paulo iko lomuk ababus jyo eleittok olo oseŋer hulo Agusto, afure honyi Julio. ² Ejiŋak hohoi jyo ababur ninya ottu’to to Adramito bwo ojo nya inyi alo jyo omuk amisihi hutta fau Asia ilotifor hari. Tania ebusak nya hohoi olotifor ette fwatan ta ababur iko lobo latulo olo Tesalonika ifau Masedonia, afure honyi Aristako. ³ Nya motye efany hohoi Sidon. Ati omehino nya Julio jyo Paulo ette harana inyi hetelo jyo mottyarak honyi liŋiyere. ⁴ Ninya ebusak hohoi amaji ania edaha hohoi ta ababur iwoyo Ciporo nyo ohuco oyyami bebe. ⁵ Ette hohoi ’laŋan aari etteger Silisia iko Pamfilia ette fanyan jyo Mira ifau Licea. ⁶ Dia onyurak eleittok olo oseŋer ababur obo ono Alesandria on olo Italya ette itajiŋana hohoi dia. ⁷ Edaha nya hohoi kai kai to omuk oŋitek ati efany hohoi Cindo ta nettigemyo on obolo. Ninya arasari oyyami hucere bebe ebeŋ hohoi eremik fanyan dia ati edaha hohoi iwoyo Kreto iger Solomone. ⁸ Ta nettigemyo ono oyyami edaha hohoi kai ette fanyan jyo amaji an ifurani amaji yiri ilyaha amiji ono Lasea. ⁹ Nyo allaŋi oŋitek arryai bwo fe oyeyer nya adaha hosi, allaŋi bwo fe oŋitek huno aferuna. Ihwania ojo Paulo jihosi, ¹⁰ Hotto hulo, egigilo ni orroho adi jihohoi el efwo hohoi ihwania. Olitohi adi ababur iko erre daŋ huttotwa bwo fe ara heye hohoi. ¹¹ Ati eleittok olo oseŋer obeŋ itaniŋu ekyanita huno Paulo ati oniŋyo inyi ekyanita huno monye babur. ¹² Iwwahai isi ette jaran, Oyyu adi lefwo hohoi kwak nyo orroho amaji ania itoŋori ta ameyu. Kuyya el efany adi hohoi Finis, amiji ono Kreto ottohide, oyyu adi itoŋori dia ta ameyu. ¹³ Ninya al ottu oyyami kai to wor ojori isi oyyu adi adaha ihwania ette isi busana amaji ania ette fwatan ilyahari olotifor ono Kreto. ¹⁴ Ati ihalu kai odyoto oyyami on obolo’to bebe an ifurani Erekilo. ¹⁵ Attati inef ababur ette iloit inyi ette iyaro addi. ¹⁶ Iyaro oyyami hohoi kokwak ilyaha ilotifor ono obo aful an ifurani Kauda ette hohoi ifitana atogol ono ababur. ¹⁷ Okemye isi ihuhumaniere atogol on ogol, ati ihalu al ohuco oyyami bebe bebe abaŋi isi jo ŋadi isi esyak amorwoi ette isi houna aboŋo ono ababur bwo oyyami ette hutaru isi hama. ¹⁸ Nya motye, nyo eyaro oyyami ababur bebe, ette isi itteryo ibiryo hirre hun iyatye isi ihari. ¹⁹ Ihalu amotye nya inyyahi isi ibirotya asenuhi iko nerre hutto babur. ²⁰ To oŋitek arryai obeŋ nya oloŋ afaŋ kuyya bu elelyefi nyo obolo asiŋit attati aati byaŋan inyyak igigilo ta nesu. ²¹ To oŋitek arryai obeŋi isi oŋiye, attati Paulo dyoto ’tehiji hosi ette jaran, Hotto hulo, oyyu dwo kuyya itayiryete nya itai ani. Kuyya erasa nya hohoi Kreto ebeŋ dwo hohoi enyurak ettigemita ihwo huna. ²² Ati itagoloto atajya hatai nyo obeŋ adi obo alatai oye. Olito adi ababur hama. ²³ Nyo ta arwe ana owotya anjelo olo Hollum ihosyere hoŋ, inyi Hollum al ara’to a Hobu hoŋ el etahabuyo ni. ²⁴ Ojo inyi, Paulo, hebaŋ, nyo iwotya adi iye ihosyere Cesare bwo fe italahu adi Hollum aati daŋ hul ledahati’to ikoye. ²⁵ Ihwania itagoloto atajya hatai nyo eyihi ni jyo Hollum jo idwoŋ adi ihwa ikyana nya inyi jihoŋ. ²⁶ Ati oŋida hohoi dwo ewotya jyo obo aful. ²⁷ Ihalu oŋitek ’tomon haŋwan iyaro oyyami hohoi ta arwe ihiji hari an ifuri Adria. Ihiji harwe igigiloi aati hul igyamai’to ababur jo elyaha hohoi jyo obo olotifor. ²⁸ Tania okemye isi awudori hari ette nyurana inyi ayardahyen atomwana aŋwan. Ihalu kai inyyahi isi kemyo awudori ette nyurana ayardahyen atomwana hunihoi. ²⁹ Abaŋi nya isi jo ŋadi isi esyak amorwoi ette isi itadohina abilat aŋwan hun iryatani ta aririk hun odiŋi ’tehalu babur hun inefi’to ababur ifau ette isi mojo jo ijara afaŋan hetettu. ³⁰ Bwo fe ojori omuk hulosi efuho to babur itwa togol on odiha. Itusuruni isi atogol ania itwa hari, ojori efwo adi isi inefuna omom ono ababur ta abilata iko ta aririk. ³¹ Ojo Paulo jyo eleittok olo oseŋer iko oseŋer, Al obeŋi aati hulo daŋ arasai itwa babur obeŋi adi itai italahuni. ³² Tania oŋoti oseŋer ofi huno atogol ette atogol leten addi itwa hari ahania. ³³ Ninya ilyaha afaŋan motye, ojo Paulo jihosi, Iŋiyete obo aŋiyo nyo ara ahana oŋitek ’tomon haŋwan an ibyaŋata tai iŋiyete ta abaŋi. ³⁴ Ihwania iŋiyete aŋiyo itagolyere ahwattek hatai nyo obeŋ obo ofiti to hosi hatai olito. ³⁵ Ojo inyi ana ette iduhuna emunio ette jaran humo jyo Hollum ihosyere hosi ette ibibeny ette ŋiyo. ³⁶ Attati isi daŋ itagol atajya hosi ette ŋiyo bwo fe. ³⁷ Era nya hohoi daŋ awati esiha arrihai iko omuk atomwana hattarik heille itwa babur. ³⁸ Ninya ifoŋi isi daŋ ibironi isi ema daŋ itwa hari jo oŋida ababur itawwaha. ³⁹ Ninya afaŋ amotye igonyuni isi olotifor ati obeŋi isi omijani ara inyi afau anani. Ati igonyuni isi obo egu iko asuluŋayo ette isi jaran eruharo ababur dia. ⁴⁰ Teyya ohouni isi abilat iko aririk ’totwa hari ette kafana aboŋo ono oyyami ette ruharo ababur ilotifor. ⁴¹ Ati ninya ilyaha olotifor, isyak ababur asuluŋayo iko amaji on obeŋ owudo. Iryet awoyo otto homom babur isuluŋayo bwo ehalu babur ette wuro te epipoŋi hari iko oyyami. ⁴² Ojori oseŋer ettoho ababus ŋadi omuk riŋyarai itwa hari many ilotifor ette fuho. ⁴³ Ati itik eleittok isi nyo awak inyi italahuna Paulo. Iramak inyi hul omijani ariŋita ihari oŋida isi olluhini ihari iriŋyari ilotifor. ⁴⁴ Bwo hul omuk inefuni abauhyen iko omuk asaŋ hun owurunie’to to babur ette fwatan ilotifor tesi. Ihwania efany hohoi daŋ ilotifor.