¹ Ihalu omuk oŋitek miet ottu Anania ehumani ol obolo’to iko omuk amarwak bwo fe obo enyaluhoni, afure honyi Tertulo. Ette isi iwwaha errositi hosi jyo Paulo ihosyere hobu. ² Ninya liloŋuni isi Paulo itteryo Tertulo ’rosyo inyi ojo: Iye Filice, eleittok ol oyyu, nyo teye etoŋo hohoi iko nelik tajya bwo fe te ekyanita hoi efwotu hohoi egyamita hun oyiji to fau hohoi. ³ Esyo hohoi jihoi ahumo on obolo te erre huna daŋ. ⁴ Ati itayirye jihohoi do, owoni omuk ekyanita kai. ⁵ Enyurak hohoi atulo alya ol orroho bebe. Itamoryo inyi atajya Yudea ifauhyen daŋ bwo fe ara inyi eleittok olo omuk laati hul ipali’to hul ijifatye’to Anasaretanani lya. ⁶ Ojo nya inyi etarroho aji imojit eneittok ati enef hohoi inyi. Ette hohoi jaran eŋot inyi te efahita hohoi. ⁷ Ati ottu Lisia, eleittok olo oseŋer, bwo inyi ette iyaro Paulo ta agolon, ⁸ ette ifahina arrosok honyi ifwannari iwwahari jihoi. Al ikemyo iye inyi inyurak adi iye erre omuk daŋ hun errasak hohoi jihonyi. ⁹ Bwo fe Yudea hul owoni’to ikonyi ojori arai ekyanita honyi ahode. ¹⁰ Ninya aharak mandir Paulo ikyanari, ojo inyi: Amuno ni bebe iwwahari eram hoŋ jihoi nyo ira iye ahaŋotoni hirre hohoi ta aŋasi arryai. ¹¹ Imijak iye ihwania allaŋi oŋitek ’tomon harrihai hama jo noloŋ inya alari ni Yerusalem imojori. ¹² Obeŋi nya bu isi onyurani ani etaŋalafyo obo atulo kuyya itiwuwoŋyo neluluŋ wati ihaji imojit eneittok, ara dwo bu kuyya ihaji imojit iko itwa miji. ¹³ Bwo fe ihwania obeŋi isi oremehini italeyuna nelahode ono errositi hosi jihoi. ¹⁴ Ati eramak ni iye ana jo etahabuyo ni Hollum olo hohonyok hohoi te ekoi on ojori laati orroho, ati eyihi ni bwo fe efahita iko egyerita huno eyak sayyo daŋ. ¹⁵ Bwo fe eyihi ni jyo Hollum ihwa en iyihinierek isi jo owon adi ebuhuna ono ayijok wati iko arrohojak. ¹⁶ Tania ehuhumyo ni ataji hoŋ oŋitek daŋ’jo heteliha jyo Hollum iko jyo laati. ¹⁷ Ihwania ihalu omuk aŋasi, attu ni Yerusalem iyaŋuniere esyorita jyo aati hoŋ. ¹⁸ Ninya ehanio ni ihwania onyurani isi ani ol olibo ihaji imojit eneittok bwo obeŋ eluluŋ wati jihoŋ bwo obeŋi ewuwoŋita ati ofwonni nya omuk Yudea hulo Asia. ¹⁹ Oŋida dwo isi owoni dini irrosyere ani ihosyere hoi al owoni omuk erre itajya hosi. ²⁰ Ikefya hulo, kuyya onyurani nyadi isi obo ariŋ on orroho jihoŋ to ninya awotyari ni ihosyere monyomiji. ²¹ Owon nya ariŋ abotye hama an elyet nya ni jihosi ninya awotyari ni ihosyere hosi jo, ta neram ono nebuhuna ono layak iloŋuna tai ani ihosyere hatai ahana. ²² Ati omijak Filice eram ono ekoi ono Hobu attati itilliŋyeo isi ojo, Al attu Lisia eleittok olo oseŋer aŋot adi ni eram hoi. ²³ Attati isyarana efahita jyo oseŋer jo oŋida irrirryai inyi ati ohouna inyi bwo fe aharana mottyarak honyi iyaŋunie nerre hun iyahini isi inyi. ²⁴ Ihalu omuk oŋitek ocohuno Filice iko ŋorwoi honyi Durusila an ara’to ono Yudea. Ati itasaru inyi Paulo itaniŋuniere eram ono neruk honyi jyo Yesu Kristo. ²⁵ Ninya itaniŋu inyi ekyanita huno Paulo te eram ono ayiji bwo atehyo taji iko aŋoco on ottu’to, abaŋ Filice ette inyi jaran, Ilo do, kuyya al awon asiruna miji jihoŋ eloŋo adi ni iye. ²⁶ Attati inyi igigilo jo kuyya itulunyak adi Paulo inyi agurusi, tania iloŋuta inyi Paulo ikyanari ikonyi enyyahita arryai. ²⁷ Ninya allaŋi aŋasi arrihai, orutak nya Porco Festo amaji ono Filice bwo awak inyi itilik Yudea ette Filice busana Paulo ibabus.