¹ Afany Paulo imisik Darba iko Listara. Owon nya obo leyiyanani dia afure honyi Timoteo. Ara honyonyi ono Yudea an ara aheruhoni bwo fe ara nya monyonyi olo Grik. ² Attati eruhok hulo Listara iko Ikonio muno Timoteo. ³ Awak nya Paulo iyaro inyi ikonyi, ati oŋot inyi Timoteo do ahosyere nyo owoni Yudea arryai imasik hunia hul omijani inyi jo ara monyonyi olo Grik. ⁴ Hadahai isi limisihi, iramani isi laati efahita huno lefahat iko amarwak hutto Yerusalem. ⁵ Attati eklesyahyen daŋ golon ta neruk bwo ofonihitai laati jihosi oŋitek daŋ. ⁶ Agalarai nya isi afau Frigia iko Galatia nyo itik Oloyiri ol Olibo isi likyanari lifau Asia. ⁷ Ninya lafanyi isi ikori miji Misya awahi nya isi afwatan ifau Bitinia ati Oloyiri olo Yesu obeŋ aŋatak isi ofwoi. ⁸ Tania amani isi Misya ette fwatan Trosa. ⁹ Irigya nya Paulo ta arwe ette igonyuna obo atulo olo Masedonia owotya ihosyere honyi ol ojo, Waŋ ifau Masedonia ilwahyere hohoi. ¹⁰ Lihalu rigya honyi ettifya nya hohoi ekoi an efwari hohoi Masedonia nyo egigilo hohoi jo awak Hollum hohoi ettittoyo asayyo hun oyiji’to jihosi. ¹¹ Teyya efwo nya hohoi to Trosa many Samotrase ta ababur, bwo nya motye efwo hohoi Nipolisa. ¹² Ati ihalu efany hohoi Filipi. Inyi obo amiji ninya obolo’to lifau Masedonia. Bwo ilettohorik nya laati Roma isi. Etoŋo nya hohoi dia to omuk oŋitek. ¹³ To oloŋ sabato efwo nya hohoi iler miji many ilotifor hari nyo egigilo hohoi jo owon adi amaji emojit dia. Attati hohoi itoŋo daŋ ifau, ette ikyana jyo aŋorwo hunya ofwonni’to dia. ¹⁴ Obo jyo aŋorwo hunia hunya itayirye’to jihohoi afure honyi Lidia, amiji hosi Tiatira. Ara inyi ahetinyyaŋani boŋojin hun emoliha bwo fe itahabuyo nya inyi Hollum. Attati Hollum iŋa ataji honyi iniŋyere ekyanita huno Paulo. ¹⁵ Ninya lifwotu inyi batisimo iko aati hutto haŋ hosi, omojo inyi jihohoi ojo, Al igigiloti tai ahode jo eruk ni jo Hobu, ifwanna itoŋoti ihaji hoŋ. Ette inyi mojo bebe jihohoi ette hohoi fwatan dia. ¹⁶ To ninya efwatari hohoi imaji imojit erwaŋanio hohoi iko obo nodwoti apit on owon iko ajok an ikila. Opocohita nya inyi agurusi arryai jyo eleittaha honyi te ekila honyi. ¹⁷ Attati inyi ijifatyo Paulo ikohoi bwo ikyana on okwat ojo, Aati hulo arai ahegyamak hulo Hollum al agalik daŋ. Itahutani isi jihatai nekoi ono netalahuna. ¹⁸ Ihanio nya inyi ihwania to oŋitek arryai. Ati omiratyo nya inyi Paulo ati iloit inyi ahwan honyi ette jaran jyo ajok, Efuha ni iye ta afure ono Yesu Kristo, ilo addi jihonyi. Ette inyi jiŋara jyo odwoti addi ta asaa ania. ¹⁹ Ati ninya igonyuni eleittaha honyi jo atuhuno ekoi on opocohitari inyi isi agurusi, inefi isi Paulo iko Sila ette ipihoro isi imargas ihosyere gala. ²⁰ Bwo ninya afanyi isi jyo gala ojori isi, Aati hulo arai Yudea bwo itarrohojye isi amiji hohoi. ²¹ Ittiyenie isi omuk emohiti hun ebeŋ hohoi aati Roma eremik ifaha. ²² Attati eluluŋ wati iŋere jihosi ette gala gwasuna aboŋojin huno Paulo iko Sila addi ette ifahina oseŋer hatabahyehe isi te elluhi. ²³ Ninya atuhuno abahyo hosi ette isi ibironia Paulo iko Sila libabus ette jaran jo olo polis, Ihuma irrirrya isi bebe. ²⁴ Itaniŋu inyi ania ette inyi ifitana isi ihaji babus on owon ihiji daŋ, ette ifit ejek hosi ta aririk. ²⁵ Ati ihiji harwe omojoi Paulo iko Sila ette idolo itahabuyere Hollum ette babus itaniŋyo daŋ. ²⁶ Teyya teyya ottu olokitik ette ohitir iko afau haji ono ababus ikikiro bebe. Aŋai nya ekatin daŋ ette aririhi daŋ douna to has babus. ²⁷ Ninya lahenyu lerrirryani babus igonyu inyi ekatin aŋai ette inyi inef afere honyi ette jaran acuhoro ahwan honyi, nyo igigilo inyi jo afuhoi babus daŋ. ²⁸ Ati ikyana Paulo on okwat ojo, Hecuk ahwan hoi, hohoi hulo daŋ. ²⁹ Iloŋo inyi laati iyaŋuniere allomo ette jiŋana libabus ette rigoŋi al ikikiro ihosyere Paulo iko Sila, ³⁰ ette iyaŋuno isi ilet ette jaran, Hulo, ehanio adi ni anyo inyuraniere netalahuna? ³¹ Ojori isi, Iruho jyo Hobu Yesu bwo italahunie adi iye iko aati hutta haŋ hoi. ³² Ette isi iramana ekyana ono Hobu jihonyi iko aati hutta haŋ daŋ. ³³ Ta arwe ania iyaro inyi isi illillayere atoŋos hosi, ette inyi ifwotuna batisimo iko aati hutta haŋ honyi daŋ. ³⁴ Ihalu iyaro inyi Paulo iko Sila ihaji honyi ette isyo aŋiyo jihosi bwo omuno inyi bebe iko aati hutta haŋ honyi daŋ nyo iruhi isi jyo Hollum. ³⁵ Ninya lafaŋ amotye, ifahini gala oseŋer hotohouniehe aati hulya. ³⁶ Iramak errirryani babus ekyanita huna jyo Paulo ojo, Ojori gala ohohina itai, tania ifwanna oŋida ifwatta ta nelik tajya. ³⁷ Ati ojo Paulo jihosi, Abahi isi hohoi asai ihomomite wati ati era hohoi ahulo Roma, bwo fe ifitani hohoi ibabus bwo ihwania awahi isi hohoi itulunyana hohina. Obeŋ oyyu. Ijara isi hetefwanniehe iyaro hohoi ta ahwattek hosi. ³⁸ Iramani oseŋer gala ekyanita huna ette isi baŋi al itaniŋuni isi jo arai isi hulo Roma. ³⁹ Attati gala fwanna jihosi ette ramana isi jo, Epal hohoi, ette iyaro isi ilet bwo ilolyahini jihosi hefwahi. ⁴⁰ Tania al ohounie isi to babus ofwoi isi itoŋori iko Lidia, ette isi ittittoyo eruhok ette fwatan.