¹ Imiji Ikonio ojiŋani isi lihaji imojit ono Yudea ette ikyana jyo laati attati eluluŋ on obolo ono Yudea iko paganohyen omuk daŋ iruk. ² Ati Yudea hul ihari’to itamoryo paganohyen ette itarroho negigilita hosi jyo Paulo iko Barnaba. ³ Tania itoŋoi isi dia fur ikyanari te eŋere ta amehino ono Hobu, ette Hobu itasiruna ekyanita hosi te etamijanita iko te ellillihita hunya ihanie isi ta nadwaran honyi. ⁴ Ati owoni nya aati hutto miji iko egigilita arrihai, iruhi omuk jyo Yudea bwo omuk jyo lefahat. ⁵ Ati awahi omuk paganohyen iko Yudea bwo eleittaha ittigemyo isi, ette jaran erwoŋyo lefahat ta amorwoi. ⁶ Itaniŋuni Paulo iko Barnaba neram ana ette fuho many lifau Licania jy o amisihi Darba bwo Listara. ⁷ Ati jyo afau ania ittittoye isi asayyo hun oyiji. ⁸ Imiji Listara owon nya obo atulo al iluro ifau nyo obeŋ nya inyi oremik daha. Orrohoja nya inyi many t’esyori honyi. ⁹ Itaniŋu inyi Paulo ikyana, ati ikikorik Paulo jihonyi nyo omijak inyi jo owon inyi iko neruk lifwotuniere naŋidari. ¹⁰ Iloŋ Paulo inyi on okwat ojo, Otte te ejek hoi. Ette inyi ’lwara ahide ette daha te ejek honyi luŋa. ¹¹ Teyya ligonyu eluluŋ wati nedwarit ana an ihan Paulo iwuwoŋitai isi bebe te ekyana hosi ojori, Isuruni ajohin hulo jihohoi ihwa aati. ¹² Ifurani isi Barnaba Seo bwo Paulo Herme nyo ikyana inyi agalik. ¹³ Attati eleittok olo aji Seo ninya owon’to ihalu miji, iyaŋuno esuŋ iko ayaburita likatin lihumyere laati. ¹⁴ Ati al itaniŋuni Barnaba iko Paulo neram ana ogwasi isi aboŋojin hosi ta ajore bwo ette ŋyoron ilet ihiji iluluŋ wati ette jaran, ¹⁵ Hulo nyo ihaniete tai ihwania? Era hohoi awati ihwa itai. Efwonni hohoi dini iyaŋuniere asayyo hun oyiji’to jo oŋida iyituniete tai addi jyo erre hun ofyahaji’to hunia ittata iruk jyo Hollum leswoni, ayyani idou iko afau ojo aari bwo erre daŋ hun owoni’to jihosi. ¹⁶ Ati abusak nya inyi laati hatadahahi te ekota hosi gele gele. ¹⁷ Ati isyo nya inyi etamijani honyi nyo isyo inyi jihatai ahide t’edou bwo ette nema iko naŋer ŋijan. Isyo inyi bwo fe namuno itajya hatai ta naŋiyo on obolo. ¹⁸ Hekyanai isi ihwania ette isi itik aati ta agolon hul awahi’to ihanio obo ehuma jihosi. ¹⁹ Ati ofwonni Yudea to Antioka iko Ikonio hul isusui laati irwoŋyere Paulo ta amorwoi ette ’yatara inyi addi to miji nyo igigiloi isi jo aye inyi. ²⁰ Ati al ikoloni leyiyanak inyi odyoto inyi ette leten litwa miji. Nya motye ette isi fwatan iko Barnaba many imiji Darba. ²¹ Ittittoye isi asayyo hun oyiji jyo amiji ania ette italwajana leyiyanak arryai. Teyya acaharai isi limisihi Listara, Ikonio, ojo Antioka, ²² itagolyere atajya heyiyanak te ettittoyo hosi jojo, Oduloro daha ta neruk hatai nyo ijiŋaniere lilobye Hollum ara te ettigemita arryai. ²³ Bwo fe liklesyahyen daŋ, onyimuni isi eleittaha attati ittaŋuna isi jyo Hobu hosi ta amojo iko aferuna. ²⁴ Allaŋi isi Pisidia bwo afanyi Pamfilia. ²⁵ Ittiyenie nya isi imiji Perga bwo ette fwatan Atalya. ²⁶ Ette jiŋana ababur icahari Antioka amiji inya ifahunierek isi ta amehino ono Hollum igyamari egyama an atuhi isi ania. ²⁷ Ninya lafanyi isi dia, ottubanie isi iko aati hutto klesya daŋ ette iramana isi erre daŋ hun ihanio Hollum tesi bwo fe aŋai aŋahi inyi ekat ono neruk jyo paganohyen. ²⁸ Ette isi itoŋo iko leyiyanak fur.