¹ To oŋitek hunia iniafatyo hobu Erode omuk hulo eklesya ta agolon. ² Ottoho inyi Yakobo illa Yoane ta afere. ³ Ninya ligonyu Erode jo omunoi Yudea nehanio honyi ania, ette inyi bwo fe inefuna Petro. Arai nya oŋitek huno neyom ono emune on obeŋi bula. ⁴ Inefu Erode Petro ette itifitana inyi ibabus bwo ihanak eluluŋ oseŋer aŋwan irrirryari inyi, oŋida iyaŋunie inyi jyo laati ihalu eyom ono Allaŋan Anjelo. ⁵ Tania itoŋo Petro ibabus bwo odulo eklesya mojo bebe jyo Hollum tenyi. ⁶ Ta arwe an alari Erode iloŋori Petro, hojoto inyi al ifita ta aririk arrihai ihiji oseŋer arrihai, bwo omuk oseŋer irrirrya ekat babus. ⁷ Teyya oleyo anjelo olo Hollum ette itafaŋ ababus. Anaŋ inyi Petro oloho itahenyere inyi ette jaran, Otte, kwak, ette aririk douna to has honyi. ⁸ Attati anjelo jaran jihonyi, Iyyafak aboŋojin hoi iko amuha. Ihanio Petro ihwa ojo inyi. Ette inyi jaran, Agamak aboŋo hoi bwo waŋ te ehalu hoŋ. ⁹ Attati inyi leten alet bwo Petro ette jifaro inyi. Ati obeŋ nya Petro omijak jo arai erre hunia ahode. Ati arai jihonyi ihwa arigya. ¹⁰ Ninya allaŋi isi amaji etabotye ono errirryak bwo fe etarrihi, afanyi isi jyo ekat otto bilat on olo’to itwa miji, ette inyi ŋa hama. Ojiŋari isi ilet bwo ofwoi ikoi ette anjelo busana inyi. ¹¹ Ihwania omijak Petro jo arai erre huna ahode ette jaran, Ihwania amijak ni jo ifak Hollum anjelo honyi litalahuniere ani to has Erode iko erre hun igigiloi Yudea jo ehanio adi isi jihoŋ. ¹² Ninya howon inyi iko negigilo ana ette inyi leten ihaji Maria honye Yoane al ifurani bwo fe Marko. Ottubanie aati arryai dia hul omojoi. ¹³ Illilloŋo inyi te ekat haŋ attati obo odwoti negyamani ’tuna, afure honyi Roda. ¹⁴ Oheru inyi etuk Petro ette muno bebe ati obeŋ inyi aŋa ekat. Acaharo inyi jyo laati hya iramaniere isi jo Petro lyo owotya ikat haŋ. ¹⁵ Ojori isi jihonyi, Isita iye. Ati ojo inyi, Inyi lya ahode. Ojori isi, Kuyya ara anjelo honyi. ¹⁶ Ati odulo Petro illilloŋo. Ati ninya aŋai isi ekat, ette igonyuna inyi ette isi illillihai bebe. ¹⁷ Ati itadwa inyi isi ta aani honyi ette iramana isi aŋai iyauno Hobu inyi to babus. Ette jaran, Ifwatta iramana Yakobo iko illarak hohoi hul omuk daŋ. Ette inyi leten jyo obo amaji. ¹⁸ Al afaŋ amotye ihawwai oseŋer jo, anyo idwoŋ jyo Petro. ¹⁹ Itiloŋo Erode inyi bwo obeŋi isi onyurani inyi tania ifiyo inyi errirryak ette ifahina omuk hottohorohi errirryak hulya. Attati inyi leten addi to Yudea many Cesarea ette rasahino dia. ²⁰ To oŋitek hunia iloŋojita Erode jyo aati hutto Turo iko Sidon. Ette isi fwanna jyo Erode ifiyere inyi te etoŋo dee nyo inyyaŋai aati hutta fau hosi aŋiyo hosi jyo hobu. Ette isi fwanna itanyalamuniere Blasto legyamani olo hobu. ²¹ To obo oloŋ on onyimu Erode iyyafak inyi aboŋojin honyi huno imiri ette itoŋo iseger honyi ette ikyana jyo laati. ²² Iwuwoŋitai isi ojori, Etuk Hollum ania, obyaŋara ono atulo. ²³ Teyya kwak ette anjelo olo Hollum ibak inyi nyo obeŋ inyi itahabuyo Hollum ette inyi ye ka ahuru. ²⁴ Ati ihuhut nekyana ono Hollum ette bolori. ²⁵ Ojo teyya, ocohunie Barnaba iko Saulo to Yerusalem ninya atuhi isi erre hunya ifahinierek isi, bwo iyaŋunie isi Yoane al ifurani Marko.