¹ Ihwania itaniŋuni lefahat iko eruhok daŋ hinya owoni’to ifau Yudea jo ifwotuni paganohyen ekyana Hollum. ² Tania alo Petro imiji Yerusalem ette aati hul ijifatye’to efahi ono aŋoto itaŋalafyo inyi jojo, ³ Nyo ilo iye jyo hulo hobeŋi’to oŋotoi bwo iŋiyete ikosi? ⁴ Ati iramak Petro eram ana jihosi ojo, ⁵ Awon nya ni imiji Jopa. Hamojo ni dia ette ni igonyuna ta arigya obo ariŋ ihwa amilaya an ililyefuni ta arukuni aŋwan ette fanyan jihoŋ. ⁶ Ajo ni ami atwa ette ni igonyuna acaŋi iko anyanya, bwo amunok iko aheny. ⁷ Bwo ottu obo ekyana jihoŋ on ojo, Petro, otte, abaha obo bwo oŋiye. ⁸ Bwo ni ette jaran, Hobu obeŋ, nyo nya beryen many iko ahana abeŋ ni alimok obo ariŋ on odwa kuyya bu on ofyaha ihutuk hoŋ. ⁹ Inyak nekyana ’tuna t’edou ojo, Erre daŋ hun italibo Hollum hejo odwari isi. ¹⁰ Ihanie nya ana enyyahita hunihoi bwo inyyahi pihoro asaŋ hunia daŋ idou. ¹¹ Ta asaa ania afanyi aati hunihoi ihaji en etoŋori ni hinya ifahuni jihoŋ to miji Cesarea. ¹² Ojo Oloyiri jihoŋ, Ilo itihata ikosi, hetila. Ette ni fwatan iko illarak hoŋ hulo ille ette hohoi jiŋana ihaji Kornelio. ¹³ Bwo itahutak inyi hohoi egonyuna honyi anjelo linya owotya’to lihaji honyi ette jaran jihonyi, ifak omuk aati imiji Jopa iloŋuniere Simone al ifurani Petro. ¹⁴ Bwo iramak adi inyi asayyo jihatai hun italahuni adi itai, iye iko aati daŋ hutta haŋ hatai. ¹⁵ Hetteryo ni ekyana jihosi ette Oloyiri ol Olibo isuruna jihosi ihwa jihohoi tetteri. ¹⁶ Bwo fe ette ni giluna ekyana ono Hobu on ojo, Ibatisyo Yoane ta aari ati ebatisyo adi ni itai to Oloyiri ol Olibo. ¹⁷ Ati ihwania, kuyya isyo Hollum jihosi esyoryo ihwa ninya isyaraniere inyi jihohoi te eruk hohoi jyo Hobu Yesu, aremik attadi ni itik Hollum? ¹⁸ Itaniŋuni laati hutto Yerusalem eram ana ette isi dwahino bwo itahabuye Hollum ojori, Ahode, isyo bwo fe Hollum jyo paganohyen eloico tajya. ¹⁹ Owoni nya aati arryai hul ofuhoi’to ettigemita hun itterye ta naye Setefano. Ofuhoi isi many jyo afau ono Fenisia, iko Ciporo iko Antioka ette isi iramana asayyo hun oyiji jyo aati Yudea hama. ²⁰ Ati ofwoi omuk eruhok, isi aati hulo Ciporo iko Cirene, afanyi nya Antioka ette isi ikyana jyo paganohyen asayyo huno Hobu Yesu. ²¹ Bwo fe owon adwaran ono Hobu jihosi ette aati arryai iruk ette iloit atajya hosi jyo Hobu. ²² Tania ofodoŋunie asayyo huno laati hulya many jyo eklesya otto Yerusalem. Teyya ifahini isi Barnaba many imiji Antioka. ²³ Al afany inyi dia igonyu inyi amehino ono Hollum jyo aati hulya ette inyi muno bebe bwo odulo ittittoyo isi ojo, Itagoloto atajya hatai igolihiniere jyo Hollum. ²⁴ Bwo ara nya Barnaba atulo ol oyyu al ifut iko Oloyiri ol Olibo bwo neruk, ette laati arryai fwanna inosoniere iko Hobu. ²⁵ Ihalu olo Barnaba imiji Tarasa ittifyari Saulo, ²⁶ ette rumana inyi ette iyaŋuno inyi Antioka. Ittiyenie isi dia aati hutte klesya iko omuk arryai te eŋa abotye. Ati to miji Antioka itterye laati iloŋo eyiyanak a Kristyanohyen. ²⁷ To oŋitek hunia ofwonni omuk eyak sayyo to Yerusalem many Antioka. ²⁸ Ette obo abotye dyoto afure honyi Agabo ette ikila ta adwaran ono Oloyiri ol Olibo ojo, Ottu adi ahure on obolo ifauhyen daŋ. Idwoŋ nya ania to ninya arari Klaudia eleittok. ²⁹ Tania ojori eyiyanak, Efak adi hohoi esyorita ihwa eremik adi hohoi ilwahyere illarak hohoi hutto Yudea. ³⁰ Ihanie isi ihwania ette ifahina Barnaba iko Saulo isyoryere esyorita hosi jyo eleittaha hulo eklesya.