¹ Nyo emijak hohoi jo kuyya oye ahwan ana an ara ihwa aji en emanyari hohoi, ewon hohoi iko aji ono Hollum on obeŋi oduhoni ta ahas, on odulo adi fur tulaŋ idou. ² Ihwania etudeta hohoi, nyo ewak hohoi bebe ahwattek hohoi aŋejuho hutte dou hun eyyafak adi hohoi ihwa aboŋojin. ³ Jo oŋida al eyyafak hohoi isi ebeŋ hohoi ewon ahania. ⁴ Nyo ahode etudeta hohoi hul ewon itwa ahwattek huna te ehawwa hohoi. Nyo ebeŋ hohoi ewak adaha ahania, ati ewak hohoi iyyafaniere ahwattek, jo oŋida ahwattek hun isui’to orutani huna hun omuyahi’to. ⁵ Ati ara Hollum al ihuhumak hohoi te eram ana, bwo isyo inyi jihohoi etamijani an ara’to Oloyiri. ⁶ Tania ewon hohoi iko eŋere on obolo oŋitek daŋ bwo emijak hohoi jo al emanya hohoi ta ahwattek huna ebeŋ hohoi ewon iko Hobu. ⁷ Nyo edaha hohoi ta neruk obyaŋara ta amijo. ⁸ Ajo ni ewon hohoi iko eŋere on obolo, ati agalik daŋ, ewak hohoi idyaharo ahwattek huna bwo efwo itoŋori iko Hobu. ⁹ Tania owon awahan abotye jihohoi, kuyya emanya hohoi dini kuyya ebeŋ hohoi tene, ewak hohoi itamunoyo Hobu. ¹⁰ Nyo oŋida hohoi daŋ ewotya ihosyere lokiko ono Kristo ifwotuniere edumit ihwa osiru jihohoi te erre hunya ehanio hohoi ta ahwattek hohoi, kuyya ehanio hohoi on oyyu kuyya bu on orroho. ¹¹ Nyo owon abaŋi Hobu itajya hohoi tania ettittoyo hohoi laati, ati omijak Hollum atajya hohoi bwo eyihi ni jo imijana tai hohoi bwo fe. ¹² Ebeŋ hohoi enyyak itakwat afureta hohoi jihatai, ati ekyana hohoi jo oŋida iremehina tai itahuyo hohoi bwo fe iremehina tai itarraŋ jyo hulya hul itahuye ahwattek wati, obyaŋara atajya. ¹³ Kuyya esita hohoi ara inyi jo Hollum. Kuyya egigilo hohoi on obis ara tetai. ¹⁴ Nyo iniefatyo amuno ono Kristo hohoi, nyo emijak hohoi jo oye nya atulo abotye ta laati daŋ, tania oyei isi daŋ. ¹⁵ Bwo oye inyi tesi daŋ, jo oŋida hul isui’to obeŋi isui itamunoyere ahwattek hosi, ati isui isi itamunoyere lya inya oye’to tesi ette ibuhuna. ¹⁶ Ihwania ebeŋ hohoi egigilo to obo atulo ihwa igigiloi laati. Dwadi emijak nya hohoi Kristo ihwa atulo, ihwania ebeŋ hohoi egigilo tenyi ihwa atulo. ¹⁷ Tania kuyya owon obo atulo itwa Kristo ara inyi neyyet aŋejuk. Ofwoi emanyiti amarwahi ad di ati ofwonni aŋejuho. ¹⁸ Ati ofwonni erre daŋ jyo Hollum al itimoru’to hohoi jihonyi to Kristo, bwo isyo jihohoi egyama ono etimwarana. ¹⁹ Inyi ana, owon nya Hollum itwa Kristo itimoruniere aati jihonyi. Obeŋ bu inyi ihenio eyyata hosi jihosi, bwo fe isyo inyi jihohoi ekyana ono etimwarana. ²⁰ Tania era hohoi ellellahiti hulo Kristo ihwa iloŋo Hollum itai tohohoi. Elolya hohoi jihatai ta afure ono Kristo, itimwarana ahwattek hatai jyo Hollum. ²¹ Lya ol otimo’to eyyau ihuhumi inyi aheyyani imaji hohoi, jo oŋida hohoi ihuhumi ahaliborok hulo Hollum tenyi.