¹ Ati aŋotonio ataji hoŋ jo abeŋ adi ni enyyak ’tuna mijyere itai te ejiriŋa. ² Nyo kuyya esyo ni jihatai ejiriŋa, ŋai adi isyo jihoŋ amuno? Obyaŋara itai hul ijiriŋati’to te ekyanita hoŋ? ³ Egyoro nya ni ihwa ania jo oŋida al attu ni jihatai abeŋ ni inyyak ijiriŋa to hulya hul awak ni muno. Nyo eyihi ni tetai daŋ jo ara adi amuno hoŋ ahanatai bwo fe. ⁴ Nyo egyoro nya ni jihatai te ejiriŋa on obolo iko adyaha taji bwo ta neyyo hun olwaji. Abeŋ ni awak itajiriŋ itai, ati oŋida itai imijana namuno on obolo an amunori ni itai. ⁵ Ati kuyya iyaŋuno obo atulo ejiriŋa, obyaŋara jihoŋ hama. Abeŋ ni awak ikyana bebe ati ahode isyo inyi adyaha jihatai daŋ. ⁶ Jyo atulo alya, oremik abahyo an abahyerek laati hul olwaji jihonyi. ⁷ Tania oŋida itai iloitoti jihonyi ibusaniere inyi bwo itilihata ataji honyi ŋadi inyi olo ihanio obo ariŋ on orroho te ejiriŋa honyi on obolo. ⁸ Tania elolya ni jihatai itahutaniere namuno hatai jihonyi. ⁹ Te eram ana egyoro nya ni jihatai ikemyere itai imijaniere kuyya iniŋyete tai te erre daŋ. ¹⁰ Al ibusana tai obo atulo, abusak adi ni inyi bwo fe. Erre hun abusak ni, kuyya abusak ni omuk erre, abusak ni te eram hatai ihosyere Kristo. ¹¹ Ehanio ni ihwa ania ŋadi Sitan ottu galihina hohoi nyo ebeŋ hohoi etimo egyamita honyi. ¹² Ninya attuniere ni Trosa ittiyeniere asayyo huno Kristo, aŋa Hobu ekat ihosyere hoŋ, ¹³ ati obeŋ oloyiri hoŋ itoŋo dee nyo abeŋ ni anyurak illaŋ Tito, tania abusak ni isi ette leten Masedonia. ¹⁴ Ati humo jyo Hollum ol olwahyo’to hohoi igalihiniere erre daŋ to Kristo, bwo tohohoi itisarrahi inyi amijana hiram honyi ihwa ariŋ on oŋwo’to gir gir imasik daŋ. ¹⁵ Nyo era hohoi arya ono Kristo on oŋwo’to gir gir jyo Hollum ihiji wati hul italahuni iko ihiji wati hul oyei’to. ¹⁶ Jyo hulya hul oyei’to oŋwo arya ihwa aye an iyaŋuno’to naye; bwo jyo hul isui, oŋwo arya ihwa nesu an iyaŋuno’to nesu. Ŋai ol oremik’to ta nerre huna? ¹⁷ Ebeŋ hohoi era ihwa aati hul olwaji hul iloice’to ekyana Hollum itipalyere laati, ati ettiyenio hohoi ta abyaŋan inyobyo ihwa laati hul ifahu Hollum, bwo to hoŋite Hollum ekyana hohoi ta adwaran ono Kristo.