¹ Ara ana enyyahi etahunihi an attuniere ni jihatai. Te etuhe huno etamijanak arrihai kuyya hunihoi iruhi adi laati ekyanita. ² Eramyo nya ni laati hul iyyauni’to iko hul omuk daŋ ninya awanari ni ikatai ta attuna hoŋ etarrihi, bwo fe ihwania enyyak ni iramana isi al abeŋ ni jihatai, jo al attu ni abeŋ adi ni enyyak mehino jihosi. ³ Ekyana ni ihwania nyo ittifyati tai etamijani on ojo ikyana Kristo toni. Obeŋ inyi ilik jihatai ati igyama inyi ihiji hatai on ogol. ⁴ Nyo isihoni inyi al ilik, ati isu inyi ta adwaran ono Hollum. Bwo elik hohoi ikonyi, ati esu adi hohoi ikonyi ta adwaran ono Hollum. ⁵ Ottifyati itajya hatai imijaniere kuyya owon neruk jihatai. Okemyete atajya hatai ahode. Ibyaŋata tai imijana jo owon Yesu Kristo itajya hatai? Kuyya ibyaŋata tai irata aduri hulo Hollum ahode. ⁶ Ati eyihi ni jo imijana tai era hohoi aduri hulo Hollum ahode. ⁷ Ihwania amojo ni jyo Hollum jo oŋida ibyaŋata tai ihaniete on orroho. Obyaŋara jo oŋida egyama hohoi osiru, ati oŋida itai ihaniete on oyyu dwadi ojori laati jo ebeŋ hohoi era aduri hulo Hollum ahode. ⁸ Nyo ettallik hohoi itihyo nelahode ati egyama hohoi ta nelahode. ⁹ Nyo emuno hohoi al igoloto tai dwadi elik hohoi. Bwo emojo hohoi ta ana, jo oŋida itai iboboloroto. ¹⁰ Tania egyoro ni erre huna al abeŋ ni jihatai, ŋadi attu ni ikyana jihatai on ogol ta adwaran an isyo Hobu jihoŋ itagolyere itai, obyaŋara itatturyere itai. ¹¹ Ihwania illarak te esidi, humotina. Ijara atajya hatai ogoli ta neruk bwo fe ilihi, itoŋoti te egigilo abotye, amanyati ta nelik tajya, bwo owon adi Hollum olo namuno iko nelik taji jihatai. ¹² Itifonyana illarak hatai ta ahas. ¹³ Itifonyai aati Hollum daŋ itai. Ijara amehino ono Hobu Yesu Kristo iko namuno ono Hollum bwo narryaha ono Oloyiri ol Olibo hatawana jihatai daŋ.