¹ Ihwania ani Paulo, elolya ni jihatai ta ahwan hoŋ, ta anyalami iko abijon ono Kristo. Ati ojori omuk laati afyaha ni ihomomite hatai, ati eŋere ni al alama ni jihatai. ² Esiŋyo ni itai jo al attu ni oŋida abeŋ ni eŋere jihatai ihwa an eŋerejitari adi ni jyo omuk laati hul ojori jo edaha hohoi te ewahiti huno ahwattek hohoi. ³ Nyo dwadi bu edaha hohoi ta ahwattek huna, obeŋ arrem hohoi ara ta ahwattek huna. ⁴ Nyo obeŋi erremiti hohoi arai ahuno ahwan, ati ara agolon hosi ono Hollum, tania oremehini isi itatturyo elyatiha hun ogoli’to. ⁵ Etattur hohoi egigilita iko erre daŋ hun itadarai’to itihyere amijana Hollum. Bwo efitak hohoi egigilita daŋ ihwa apiti iniŋyere Kristo. ⁶ Bwo fe ebak adi hohoi amyosok daŋ to oloŋ an iniŋyete tai ahode. ⁷ Igigiloti te erre huna. Kuyya ojo obo atulo ahode ara inyi olo Kristo, ijara inyi inyyak igigilo ta ahwan honyi jo era hohoi ahulo Kristo bwo fe ihwa inyi. ⁸ Nyo dwadi ajo ni etadara ni bebe te elaballok hohoi, abeŋ ni eloriri, nyo ara Hobu al isyo jihohoi elaballok itaboloryere itai, obyaŋara itatturyere itai. ⁹ Ati abeŋ ni awak itabaŋyere itai ta awaragat hoŋ. ¹⁰ Nyo ojori isi jo, Ikyana inyi ta agolon iko efiriwa ta awaraga honyi, ati ofyaha inyi to homomite hohoi bwo emyana hohoi ekyanita honyi. ¹¹ Ijara laati ihwa hulo omijani ana, jo erre hun egyoro hohoi iwaragat al ebeŋ hohoi ewon ikatai, efwonni adi hohoi ihanio al efany hohoi jihatai. ¹² Ebeŋ hohoi eŋere itarrijoryere ahwattek hohoi iko omuk laati hul ojori’to eyyu isi. Ati obeŋi ofyoro jihosi al itarrijye isi ahwattek hosi iko omuk, bwo al okemye isi ahwattek hosi iko laati omuk. ¹³ Ati ebeŋ adi hohoi etadara ihwa ellaŋ hohoi ekori, ati ihwa isyo Hollum hohoi ekori honyi, afany ekori ania many jihatai. ¹⁴ Ati ebeŋ hohoi ellaŋ ekori hohoi al egyama hohoi ihiji hatai, nyo efany nya hohoi jihatai ahosyere daŋ iko asayyo hun oyiji’to huno Kristo. ¹⁵ Ebeŋ hohoi etadara ta egyama ono laati omuk ihwa ellaŋ hohoi ekori ati eyihi hohoi jo al obobolororo neruk hatai, obobolororo bwo fe egyama hohoi ihiji hatai agalik. ¹⁶ Tania eremik hohoi ittiyenio asayyo hun oyiji ifauhyen huttohosyere miji hatai. Nyo ebeŋ hohoi etadara te egyama an ihanio obo atulo jyo obo amaji. ¹⁷ “Ati lya al itadara’to ijara inyi itadara to Hobu.” ¹⁸ Oleyo ayiji ono atulo al itahuyo Hobu inyi. Obyaŋara lya al itahuyo’to ahwan honyi.