¹ Hekyana ta agolon jyo obo amarwani, ati isiŋye inyi ta anyalami ihwa monyohoi, bwo ikyanai jyo monyomiji ihwa illarak hoi. ² Ikyanai jyo aŋorwo hun imarwahi ta anyalami ihwa honyohoi, bwo fe jyo odwo ihwa haniarak hoi ta nalibori daŋ. ³ Olwaha ehidahi ŋorwo hun arai ehidahi ahode, hun obeŋi’to owoni iko hutto woyo hosi. ⁴ Ati ehidak on owon iko aduri kuyya bu lonyirok lonyi honyi, oŋida hulo itaniŋuni jo ara ana egyama hosi etteri irrirryari laati hutta haŋ hosi iko esyok hosi, nyo oyyu ana tohosyere Hollum. ⁵ Ihwania olwaha ehidak an ara’to ahode on obeŋ’to owon iko hutto woyo hosi kuyya iyihi inyi jyo Hollum bwo odulo inyi amojo iko efiyo ta attari iko ta afanni daŋ. ⁶ Ati ania an amanya’to te ewahiti hwan honyi ara inyi ihwa aŋotte an aye’to dwadi isu inyi. ⁷ Iramak erre huna jihosi jo oŋida isi adahai ta abyaŋan ipali. ⁸ Ati kuyya obusak obo atulo aati hutto woyo hosi kuyya bu hutta haŋ hosi, bwo obeŋ olwahyo ta aŋiyo iko erre omuk, iha inyi neruk honyi, bwo orroho inyi agalik atulo ol obeŋ’to iruk. ⁹ Hegyorok iwaraga afure ehidak an hobeŋi aŋasi honyi ottubai atomwana ille, kuyya bu an ayamai nya enyyahita arrihai. ¹⁰ Oŋida laati daŋ omijani ehanita honyi hun oyiji jo ara inyi ahahoyani duri, ahalwahani heruhok tamonok, ahellillani hejek wati Hollum, ahalwahani hejiriŋak, iko ahegyamani hirre daŋ hun oyiji. ¹¹ Ati hegyorok ehidahi hun hobeŋi’to imarwahi, nyo ihalu ayahari adi isi addi jyo Kristo bwo inyyahi wahan ayama. ¹² Bwo onyurani adi isi aŋoco nyo obusani isi erre hun ocoroni isi ahosyere. ¹³ Adahatye isi ihaŋitek wati bwo isugai isi asai, obyaŋara ania ijai ati iyabai isi erre asai bwo fe idyeferi isi ikyanari erre hun obeŋi oyiji te ekyana. ¹⁴ Tania awak ni ehidahi hun hobeŋi’to imarwahi oŋida inyyahi yama, isiuni aduri, irrirryai ahaŋitek hosi, bwo obeŋi isyori obo ekoi jyo amyotononi ikyanari on orroho tesi. ¹⁵ Nyo ihwania ipali omuk addi ijifatyere Sitan. ¹⁶ Kuyya owon obo eruhoni iko ehidahi ihaŋ honyi ijara inyi olwahyo isi, oŋida eklesya obeŋ olwahyo isi nyo oŋida eklesya olwahyo hun arai’to edidahi ahode hun obeŋi’to owoni iko hutto woyo hosi. ¹⁷ Ijara amarwak klesya hul irrirryai laati on oyyu hotonyuraniehe etahabuyo iko edumit. Ati kuyya igyamai isi bwo fe ittiyeniere iko ittittoyere laati onyurani adi isi agalik. ¹⁸ Nyo ojori egyerita, “Hefitata etuk hiteŋ al igisyo’to ema.” Ojori isi bwo fe, “Osiru egyamani ifwotuniere edumit ono egyama honyi.” ¹⁹ Heruk al itisyak obo amarwani klesya, al obeŋi etamijanak arrihai kuyya bu hunihoi. ²⁰ Isiŋye laati hul iyyauni’to ihosyere wati daŋ jo oŋida hul omuk daŋ abaŋi bwo fe. ²¹ Eramak ni iye ihosyere Hollum iko Yesu Kristo bwo anjelohyen hul onyimu Hollum jo oŋida iye ihanio erre huna ta abyaŋan igigya iko ta abyaŋan ŋocyo on orroho. ²² Heyyabak ahas kwak jyo obo atulo ihaniere egyama ono Hollum ŋadi laati ojori iruk iye eyyata hosi. Amanyai on olibo. ²³ Hemata aari hama, ati amatu aari ajalaŋi kai ta adyaha hohe hoi bwo te eŋwati hoi arryai. ²⁴ Oleye eyyata wati omuk bwo itadihoroi isi iŋoco, bwo oleye eyyata wati omuk ihalu hosi. ²⁵ Ihwania bwo fe oleye ehanita hun oyiji, dwadi bu obeŋi isi oleye kokwak obeŋi oremehini idimana.