¹ Orumu lonyihu far lo mugatihin kuna lida ikukumati to ibula na lilolongoti ojo far lo Rangaru (Paska) ² manyu kadwarak kuna hitoha ko katiyenak kulo cik orumu otahitati kikoi lo kiniefuno ko kifadaru Yesu tonyio obang icieng cio. ³ Oto sitan orute katwa lo Judas Iskariot na lara lobito to kiji lo tomon ko are, ⁴ Judas ko loro diho kadwarak kuna hitoha ko kabolorok kulo kaririak kulo kaji lo Lobanga ko loro kikukuma ko icieng kikoi na ngatobohinore inyi Yesu diho icieng. ⁵ Okwama icieng manyu iruhiti kicwara inyi robia. ⁶ Iruk inyi odeya dong tik na ngapotohinore inyi Yesu diho icieng irumu ilulung oru. ⁷ Oto olotu far lo mugati kuna lida ikukumi to ibula far na longotorihin kirieho kulo Paska. ⁸ Ocule Yesu Petero ko Jon ocik icieng ojo, “ifwo ikukumahiti diho ohoi faji lodahare karama lo Paska”. ⁹ Itifi icieng ojo, “Aji ngohikukumahinore ohoi karama?” ¹⁰ inyiahahi inyi ojo, “kalirutoro ite Jerusalem kitiric ca tungani na liyuhita moti lo kifi ite. Ijifata inyi many kaji na lorute inyi. ¹¹ Ito hati ijo diho monye lo kaji, ‘ojo katiyenani aji faji na ngadahare nan karama ko jayona kunitole?’'' ¹² Kitotorohi ca ite kaji lo kai na ilalat na lotuba ikukumahino, ikukumahiti karama ija”. ¹³ Ofwo icieng orumu sangite fad iya na lotenyare Yesu. Oto icieng ko kikukuma karama lo Paska. ¹⁴ Kololotu tik, Yesu ko jayona kunenge orumu ongoniti daha. ¹⁵ Oto ojo diho icieng, “Orumu nan akodomo to tau nei daha ene Paska ko ite orihe ida larumu kidak. ¹⁶ Ahirihohi nan ite ida ca nan arihe anyia ari many kalorumu kitifuta lo fotiri nenge iyo okabwe lo Lobanga”. ¹⁷ Langun lodumu kubaya, icio kwama ko jimitan, “Ikai ene itikor ite fad. ¹⁸ Tonyio ahirihohi ite ida ca nan arihe amat vino ari many kololotu okabwe lo Lobanga”. ¹⁹ Odumu mugati icio kwama ko benya, ko kicwara icieng ojo, “ken nei ene na licori to ite; itiyoto jii kiiunitare nan”. ²⁰ To na kikoi bito koloru daha, odumu kubaya ojo, “Ara ene kubaya cik ngejuk to okoto nei na lijuhori to ite. ²¹ Ati kana lo na ca lohitob nan ongon ko nan kai lo meja. ²² Olo ca kito lotungani iya na likukumarihin ati kidak diho katoboni nenge. ²³ Iciak icieng kitifiaru ake ake ani tokiji neicieng lolo ca kitiyo na tic. ²⁴ Olotu rija ongon kiji neicieng lo jimitan ani to kiji neicieng lobolo ilany fad. ²⁵ Ojo Yesu diho icieng, “Kabolorok kulo misiok, olanyu icieng cio to golun manyu kuna longon ko obolore to kiji neicieng ilolongoroti ojo katiyok kuna ijiri to cio. ²⁶ Ati ida ite itum iri ji. Ati nahitok ilany to kiji ningi owak ara nasidi tur, manyu na lolanyu iya karwaani ²⁷ kode ani lobolo na litongo meja kode na lirwaa? Ida na longon iyo meja? Ati angon nan kiji ningi iya karwaani. ²⁸ Ite kuna lohiwoita ko nan diho kidak nei. ²⁹ Manyu ahicio nan ite okabwe iya na lohicwarare Apa nan ³⁰ ojit mute idaha ko mata ko nan iyo okabwe nei manyu itongo to segeri kulo obolore ingoto tenya diho imaniti tomon ko are kulo Isirael. ³¹ Saimon, Saimon, owak sitan kiyoyonga ite iya ngamang. ³² Ati lalifa nan to isi Saimon jimitan ida kiruk nino odoi manyu kaliitu ca isi, itigolo recera kunino. ³³ Ati ifotu inyi ojo, “Lahitok akukumahino nan lo loro ko isi kileng ngara mabus kode wei”. ³⁴ Ifotu Yesu ojo, “Ahirihohi isi Petero, orihe ikokor ida likok orumu isi liberu nan kakeny uni”. ³⁵ Oto Yesu itifi icieng ojo, “Lafar kalahicule nan ite oru ko ogogori, robia kode kamuha ongon afa lobo tohi longoromahino diho ite?” Inyiahahi icieng ojo “oru”. ³⁶ Ojo diho icieng, “Ati jija, na longon ogogor ingohi totek manyu koloru latubot nino lo lobo, itilote kiela inyangu. ³⁷ Igero ojo ‘ikenahini inyi ko kapalak’ manyu ahirihohi ite ojo itiihino ca ene diho nan. Ibo sangite fad kuna ligero to nan ogoruno kitifuta”. ³⁸ Ojo jayona, “Tode Lahitok latuboti are kuno”. Ifotu inyi ojo, “otum kuna.” ³⁹ Olo Yesu iya langun; donge lo Oliv ko jayona kunenge ijifita inyi ⁴⁰ kalogoruni nu faji, ojo diho icieng, “Ilifati ojir ida iurohino iyo laba”. ⁴¹ Isol tinya diho icieng many fajii na ngotum moru dohino kalibirori, ogung kof ilifa ojo, ⁴² “Apa kaliwak isi, todume ene kubaya diho nan, ati ida ara wahun nei, ati nino itiihino”. ⁴³ Oboto malaika to kai diho inyi itigol inyi. ⁴⁴ Tona longonore inyi iyo kidak noo ilifa to tau fad oto cora nenge ododo kof ara okoto. ⁴⁵ Kolowoju inyi to lohilifare olo diho jayona, olo orumu icieng logetoro loniamaha to kitoyo. ⁴⁶ Itifi icieng ojo, “Nyio igeto ite? Itowoju ilifati ojir ida iurohino iyo laba”. ⁴⁷ Kolorihe inyi otenya, ofwonu ilulung manyu tungani na lobara Judas, lobito to kiji lo tomon ko are inyi lorihita icieng, ko loro ojo oji amaruk Yesu. ⁴⁸ Ati itifi Yesu inyi ojo, “Judas itob isi kito lo tungani to kimaruha?” ⁴⁹ Ko lodeu kajifitak kulo Yesu tohi na loloro kitiihino, ojimi diho inyi, “Lahitok kingod icieng to latuboti kuniyang? ⁵⁰ Lobito to kiji neicieng ko ngoda karwaani lo kadwaarani lahitok ongute kiyok nenge iteten. ⁵¹ Ati ojo Yesu, “Kerihe isodohi” ko tiro kiyok lona tungani ko kitifurioro. ⁵² Yesu ko jimitan diho kadwarak kuna hitoha, kulahitoha kulo kaririak kulo kaji lo Lobanga ko lohitwaha kuna liyomuno inyi, “Arihita nan kasasuok ifwonunore ite ko latuboti ko iluhi? ⁵³ Faritin fad angonita nan ko ite kaji lo Lobanga manyu ida ite kitir nan. Ati tik ningi ene kololanyu lokimuyuk kof”. ⁵⁴ Tinyia kiniefunoti inyi ji ko rihoroti inyi iyari kaji lo kadwarani lahitok. Ijifita Petero lo lomaje. ⁵⁵ Ati kalinohahini kima kiji lo sita manyu itongohinoti ara lobito, itongohino ko icieng. ⁵⁶ Lobo kito karioni karwaani ko deuno Petero to wangun lo kima itongo ija. Oto ko hera inyi otoc ko jimitan, “ongon ade ene tungani ko inyi”. ⁵⁷ Ati oberu inyi ojo “ngorwani ida nan ayen inyi”. ⁵⁸ Orihe gaa, odeu manyu lobo tungani inyi ko jimitan, “ira isi lobito to kiji neicieng”. Inyiahahi Petero ojo, “ele ida nan ayen”. ⁵⁹ Kolorang tik lobito, ojo manyu lobo, “Dede ara lerok lobito tonyio ara manyu inyi Galileani”. ⁶⁰ Inyiahahi Petero inyi ojo, “ele ida nan ayen tohi na litenya isi “. Orihe inyi otenya jii, ikok ikokor. ⁶¹ Lahitok ko ngolo ko deya konyeha kulo Petero to ken. Petero ko kiiuno tenya na loteny Lahitok diho inyi ojo, “Orihe ikokor ida likok irumu isi liberu nan kakeny uni”. ⁶² Ko rutoro oleng olo icir bebe. ⁶³ Iciak kuna asegere likura Yesu kwenitare ko lumo inyi. ⁶⁴ Imuhi konyeha kunenge olumi kode onangi itifi hati ojimi, “Imoca, ngai lohilum isi?” ⁶⁵ Otenyitenyi tenyi becek kulo kwenitare ko moro inyi. ⁶⁶ Kiwanyi berien, lokiho lo lohitwaha kulo cio, kadwarak kuna hitoha ko katiyenak kulo cik ko kifuro ara lobito, ko kiyaunoti Yesu ketemoni neicieng. ⁶⁷ Oto icieng ojo diho Yesu, “Kalira isi Kristo irihohi ohoi”. Inyiahahi Yesu ojo, “Kalahirihohi nan ite ida ca ite iruk tenya nei, ⁶⁸ manyi kalahitifi nan ite ida ite itirang. ⁶⁹ Ati kicaha tone far itongo ca kito lo tungani iteten lo Lobanga na lilany fad”. ⁷⁰ Itifi icieng fad ojo, “Ira hati isi kito lo Lobanga?” Inyiahahi inyi ojo, “Ibehi ite jimitan inyi nan”. ⁷¹ Oto ojimi. “nyio manyu kirihe kitahitare lobo saden? Lohining manyu ohoi to kutuk nenge”.