¹ Kolodeya Yesu, odeu kabarak icwara robia katwa lo sanduk na longon kaji lo Lobanga. ² Odeu manyu lobo ngorwani lafuserito kakidahani ofihahi girisi are. ³ Oto ojo, “Ahirihohi nan ite tenya lo dede ene lafuserito kakidahanin lofik ilany cio fad. ⁴ kuno cio kude fad icwarati robia itutumo bara na longonore icieng ati inyi to kidak na longonore inyi icio fad kuna lotehita inyi to warun nenge.” ⁵ Kude to kiji lo kajifitak kunenge orumu otenyati duho ko dwarujon lo kaji lo Lobanga, na loduhi to morutok kuna litibibilarihin ko kicwara lo kicorita diho Lobanga. Ojo Yesu, ⁶ “kalara to kuno sangite lideya ite ene, olotuno far na mute lida ongerihinorehin lobo moru icodoho kai lo kaletoni icieng fad osuruni ca kof”. ⁷ Itifi icieng inyi ojo, “katiyenani, itiihino mute kuno sangite anu? Adi nyio mute litotoro jimitan lonyiha icieng itiihino?” ⁸ Inyiahahi ojo, “Iririati kecio kinonongi. Tonyio becek kuna ca lofwonu to karana nei otenyati ojo ‘inyi nan’ kode ‘lonyiha tik’ kejif icieng. ⁹ Kalining ite tenyi tenyi kulo rem ko jorehin kebang, ocam kuna sangite re itiihino ketemoni ati ida ca lohicungi oruk lotuno”. ¹⁰ Oto ojo diho icieng, “Orem ca kof ko kof manyu okabwe ko okabwe, ¹¹ ongon mute otirahin kuna hitoha, kingaco ko johijohi fajihit kuna iborengi, ko ticitici kuna litirima ko kitotorita kuna hitoha, to kai. ¹² Ati orihe kuno fad icahi lo kiyeyela ite. Kiyari ca ite ketemoni lo lotubarihin ko mabus manyu kiyauni ca ite ketemok kulo kabunok ko gavunahin to karana nei. ¹³ Itongo ca ene diho ite ara lo rahun sadeni diho icieng. ¹⁴ Ati keco ite iudo jimitan kiteny ca nyio? Kijo aja? ¹⁵ Tonyio ahicio ca nan ite tenyi tenyi ko genyun na lida kileng kadorok kuningi kitum peha ko ite. ¹⁶ Kitob ca ko katomonok, recera, kajeba ko morot ite manyu kude tokiji ningi ifadari ca. ¹⁷ Cio fad kiberu mute ite to nan. ¹⁸ Ati kileng fofiti lo kweci kuningi ida ca ori. ¹⁹ To woita to golun irumu ca ite warun. ²⁰ Kalideu ite karemok lirit Jerusalem, itiyen jimitan lonyiha kisararu nenge. ²¹ Dong ingohi kuna longon Judea ife iya dongeco, ingohi kuna longon Jerusalem torutu, keco kuna longon oleng orute Jerusalem. ²² Tonyio ara kuno faritin kulo kidak lo kitifuta kigero kulafa ligeri fad. ²³ Bolojun ha re lo kidak lo kuna faritin diho ngorwo kafongak ko katinahak! Obolo ca kidak ene kof fad ko kilongo lo Lobanga diho kuno cio. ²⁴ Ifadi ca icieng to latubot manyu iniefari ara mabusi kofi kofi fad. Onyion ca misiok Jerusalem manyu otumohino faritin kulo misiok. ²⁵ Ongon mute kitotorit iyo kolong, ofa ko kanger. Cio kulo kofi kofi fad itoyoti mute oiha taulo to kitirita ko kifoloha lo nam. ²⁶ Ihihirita mute cio ko bangun tohi na lolotuno kof tonyio golun na longon kai itinieniengi mute. ²⁷ To nu tik odeuni mute kito lo tungani olotuno to idis to golun mo deyo na hitok. ²⁸ Kalicak kuno sangite kitiihino itiwoju iting kweci kai tonyio lonyihu lahuno ningi”. ²⁹ Oforohi icieng ene kitisirani; “itide ciani lo bule ko cianitok kuna kude fad. ³⁰ Ko lo lit bene ito manyu ite ideu jimitan lonyiha kamieu. ³¹ Ori manyu jii, kalideu ite kuno sangite ongon kitiihino ojir iyen ijo lonyiha okabwe lo Lobanga. ³² Ahirihohi ite tenya lo dede ida ca ene kofiangiti oringe many itiihino kuno sangite fad. ³³ Oringe mute kof ko kai ati tenya nei ida mute oringe. ³⁴ Itigeny, kode keco taulo kuningi ogoli, ruma ko kiudo lo warun, oto cia nu far kimuhi ite iya kitu. ³⁵ Tonyio olotuno na far to cio pili kuna longoni ene kof. ³⁶ Itongoti iriria faritin fad manyu ilifa ojir ifur iyo sangite pili kuna mute lofwonu kitiihino manyu ojir mute itum woita ketemoni lo kito lo tungani”. ³⁷ Faritin fad orumu Yesu itiyena to kaji lo Lobanga ati to kurou olorita geto donge na lojimi donge lo Olive. ³⁸ Manyu ofwonunita cio to kiwanyi ningo tenya nenge kaji lo Lobanga.