¹ Lobo far kalitiyena inyi cio to kaji lo Lobanga ko kititima layomit na ijir, kadwarak kuna hitoha ko katiyenak kulo cik ara lobito ko lohitwaha ko fwonuno dih inyi. ² Ojimi diho inyi, ‘kirihohi ohoi tani twero itiyore isi kuno sangite? Ngai lohico isi ene twero?’ ³ Inyiahahi inyi ojo, “Ahitifi manyu nan ite kitifit, kirihohi nan. ⁴ Kibatisa lo Jon, olotu afa to kai kode diho cio?” ⁵ Oteny icieng ake ake ojo, “kolohijo ca to kai ojo ca inyi, Nyio hati afa ite ida iruk tenya lo Jon? ⁶ Ati kolohijo diho cio, oto ca kuno cio fad kicak ohoi to morutok tonyio oyen icieng fad jimitan ara afa Jon kamocani”. ⁷ Oto dong icieng inyiahahi ojo, “ida ohoi kiyen faji na loreunore kibatisa lo Jon”. ⁸ Ojo Yesu, “ida manyu ca nan ahirihohi ite twero na latiyore nan kuno sangite”. ⁹ Osodoro inyi forohino cio ene kitisirani , “Itibul afa lobo tungani mana lo vino nenge, ko itipangahino diho cio kude ko loro faji na iloma. ¹⁰ Kologoru ofahin kulo ngak, ocule inyi karwaani nenge ojo ojir olo iyauno kude ngak. Ati olum kapangak inyi ifuhari oite to kac. ¹¹ Ocule lobo karwaani ari, kileng na olumi itidahahini riri ifuhari oite to kac. ¹² Ocule ari kiti uni itikorongani na ifuhari oleng. ¹³ Ojo dong monye lo mana , ‘Adim ca nan aja? Aculahi ca nan kito nei na lamaru nan, kuya obangiti ca inyi’. ¹⁴ Ati ojo kapangak odeu inyi otenyi ake ake ojo, ‘kalunyoni ene, ifwonu ngafadeti ojir tohi lo lunyo nenge ara niyang. ¹⁵ Inyi na ko ki biroroti inyi to manahatwa ko kifadaru inyi. nyio dong ca itii monye lo mana diho kuna kapangak? ¹⁶ Olotu ca inyi ifade kuna kapangak ko kicwara mana nenge diho kude”. Koloning cio kuno tenyi tenyi oto ojimi ‘keco hati kuno ori jii’. ¹⁷ Oto Yesu ode icieng tok ko kitifia ojo, “Nyio hati dong fotiri lone tenya ligero ojo, ¹⁸ Tungani fad na lourohino iyo na moru igigilaru ca ati na lodohi na moru ken nenge ibonyaru ca”. ¹⁹ Katiyenak kulo cik ko kadwarak kuna hitoha ko tahita kikoi lo kiniefa inyi deu tonyio oyeniti jimitan ofor inyi ene kitisirani to icieng. Ati obangi orumu icieng cio. ²⁰ Kaliriria icieng inyi, oto oculari katidak diho inyi kuna litetema jiran. Otahita ojo ojir kiniefu Yesu to tohi na loteny inyi ojir kicorihinore inyi diho golun ko twero lo gavona. ²¹ Dong itifi kulo katidak inyi ojo “katiyenani kiyen ohoi jimitan itenya manyu itiyena isi tohi na ibehi manyu ida isisio ati itiyena kikoi lo Lobanga na lijifita dede. ²² Ocam re diho ohoi sofo mocoro diho Cesar kode ida? ²³ Odeu inyi owic neicieng ko jimitan, ²⁴ “kitotorohi nan robiati. Longai ene kitiriri ko kigero longon ija?” ²⁵ Inyiahahi icieng ojo, ‘lo Cesar’ ojo dong inyi diho icieng, “Dong icorihiti Cesar sangite kulo Cesar ko Lobanga manyu kulo Lobanga”. ²⁶ Ida icieng itweru lohuno inyi to tenya na loteny inyi tinya to ketemoni lo cio fad. Manyu ipanyiti tenya na linyahu inyi ko buhoroti. ²⁷ Kude sadusihin kuna lojo oru kibuhuno ko fwonuno diho Yesu ko kitifit. ²⁸ Ojimi diho inyi, “katiyenani, iger afa Moses diho ohoi ojo kolowei rece lo tungani ongerihi ngorwani ati oru tee, ojir inyi ojung ngorwani otomonu tee kuna lara kulo kaweyani. ²⁹ Ene ongon afa recera mietare. Oyem ketemoni ngorwani ati owei oru kito longerihi, ³⁰ Lo are ³¹ manyu lo uni ojung inyi, inyi na kikoibito, kuna cio fad mietare oweiha oru kolobo kito. ³² To kifwongi owei manyu ngorwani, ³³ Adi dong to kibuhuno mute ara mute inyi ngorwani lo ngai ati kuno cio fad mietare litong ko inyi.” ³⁴ Inyahahi Yesu ojo, “cio kulo ene kof loyema manyu itiyemati. ³⁵ Ati kuna likeni manyu ocam to nu warun ko kibuhuno to kiji lo kaweyak, ida oyema kode itiyemi. ³⁶ Manyu ida orihe owei tonyio ori icieng iya malaikahin, ara icieng tee kulo Lobanga tona lorahare icieng tee kulo kibuhuno. ³⁷ Ati to tenya lo tim na locura kileng Moses oyen ojo ibuhu mute kaweyak tonyio ilolong inyi Lobanga ojo Lobanga lo Abraham, lo Isak ko lo Jakob. ³⁸ Ida inyi ara Lobanga lo kaweyak ati lo kawarak, tonyio diho inyi owari pili”. ³⁹ Inyiahahi kude kulo katiyenak kulo cik ojo, ‘iteny isi otoc katiyenani’. ⁴⁰ Ida dong lobo tungani inyahat kitifia inyi lobo kitifit. ⁴¹ Tinya ojo Yesu diho icieng, “Aja re ojimi ojo ara kristo kito lo David? ⁴² David token lotulu iyo buk lo woleco, ⁴³ ‘ojo Lahitok diho Lahitok nei: Itongo to ngati lo iteten nei, manyu afik nan merok kunino ara seger lo kejuha kunino. ⁴⁴ David ilolong inyi ojo Lahitok, aja hati manyu ara kito nenge?” ⁴⁵ Koloningo cio fad ojo Yesu diho kajifitak kunenge, ⁴⁶ “Itigeny katiyenak kulo cik. Imaruni kingalita ko kyelani kuna ikariti manyu imaruni fonyo lo cio to fajihit kulo cuk manyu onyumoti segeri kuna hitoha to lotubarihin ko fajihit kulo kiwora to karamahin. ⁴⁷ Orujoti kajihit kulo lafuseritohin oto hati itotoroti kenite to kilifa na ikarit, koditi lo kuna cio obolo mute kitigema neicieng.''