¹ Orute Yesu Jeriko orumu ongon ringaru. ² Ongon tungani lobo ija na lobara Zakaio, ara inyi lahitok lo katisofok kulo mocoro manyu obara noo. ³ Owak orumu inyi yenun Yesu inyi ngai, ati to suhon nenge, itilanyu ilulung inyi. ⁴ Oto inyi ife ketemoni olo irwok ciani bule ojir adeunore Yesu tonyio orumu olotuno Yesu ara fotiri lona bule ⁵ Kolo goru Yesu na faji ko deya kai ko jimitan diho inyi, Zakaio iculuno kof deu, aloro nan kitongo kaji nino ene far. ⁶ Oto inyi iculuno deu deu ko kifotuno Yesu kaji nenge to kwerun lo tau. ⁷ Odeu cio fad icahi ngungunita ojo, “lolo inyi ara weloni kaji lo kapalani” ⁸ Ati owoju Zakaio ko jimitan diho Lahitok, “tode Lahitok jija acio ca nan nusu lo sangite kunei diho kakidahak, manyu kalatimumun afa nan tungani iyo lobo tohi, anyahahi ca nan kakeny ongon. ⁹ Ojo Yesu diho inyi, “ene far lolotu lwaharu ene kaji, tonyio ara manyu ene tungani lo tata lo Abraham. ¹⁰ Tonyio olotu kito lo tungani tahita ko lwaha kuna lorii”. ¹¹ Kolorihe oningoti ene, osodoro inyi foro kitisirani lobo diho icieng tonyio orumu inyi lonyiharu Jerusalem manyu ibuha cio ojo loloro ca okabwe lo Lobanga boto tarany. ¹² Ojo inyi, “lobo tungani kaboloroni afa ko loro lobo kof iloma ojir ofihi inyi ara kabu aitu hati. ¹³ Oto inyi ilolongu karwaak kunenge tomon ico icieng robia tomon ojo, ‘itiyoreti kuno robia tujar manyu alotu nan’, tenya na lorihohi inyi karwaak kunenge inyi na. ¹⁴ Ati orumu cio kulo kof nenge oberu inyi oculari cio omot nenge ojo ida ohoi kiwak ene tungani ara kabu niyang. ¹⁵ Ofwori ofihi lrok ara kabu, oitu kang. Inyi ko kilolonguno karwaak kunenge kuna ngole afa licio inyi robia lodeunore tohi na litii icieng to kuna robia. ¹⁶ Olotu lo ketemoni ojo, ‘Lahitok, lorumu robiati nino kuna kude tomon’. ¹⁷ Inyiahahi lahitok nenge inyi ojo, “itii isi otoc karwaani nei na ijir, tona ligenorore isi to sangite kuna sidiha tolanyu isi kangite tomon. ¹⁸ Olotu lo are ojo, ‘Lahitok lorumu robiati nino kula kude miet’. ¹⁹ Ojo lahitok nenge diho inyi, to lanyu isi kangite miet. ²⁰ Oto lobo karwaani bito olotu ojo, Lahitok, robiati nino ene, adumu afa nan abubur to kyela aricahi. ²¹ Ahibang orumu nan isi tonyio isi tungani na logol koditi, idumarita isi tohi na lida isi ifik, manyi idengo faji lafa lida isi iihi kinyemo. ²² Inyiahahi Lahitok nenge ojo, ‘Ahingotohi nan isi tenya to tenyi tenyi kulo kutuk nino, isi ene karwaani ikaru irohoi, iyen isi kode jimitan ogol koditi nei, adumarita nan tohi na lida nan afik, manyu adengo faji na lida nan aiihi kinyemo? ²³ Nyio hati afa lohitik isi fiha robiati nei benge ojir ngole ajo nan alotu arumu loborengi? ²⁴ Oto ko rihohino kuna lo woita inya ojo, ‘itodume robiati nenge to kana nenge icwarata diho na longon ko robia tomon’. ²⁵ Ojo icieng, ‘Lahitok lotehita manyu inyi tomon kulu’. ²⁶ Inyiahahi inyi ojo, ‘Ahirihohi ite, diho tungani na lotehita , osodohini ojo diho tungani na lorujore, kileng lobo sidi lotehita inyi odumari’. ²⁷ Ati kuna merok kunei lida owak nan ara kabu neicieng, iyaunoti icieng ene ifadeiti icieng to ketemoni nei” ²⁸ Kolokeru Yesu tenya kuno, ko loro iya ketemoni ara kaloroni iya Jerusalem. ²⁹ Langun lonyiharu Betapeg ko Betani iyo donge na lojimi donge lo Olive, ocule jayona kunenge are ketemoni ojo diho icieng, ³⁰ “ifwo na kang to ketemoni ningi, langun lirutoro ite, ifwo ca ite irumu kito lo sigiria otora ija na lorihe ida tungani irwok. Itilahu iyauno ene ³¹ kalohitifia tungani ite ojo nyio ilaha ite inyi? itorihohi inyi ijo owak Lahitok inyi”. ³² Kuna loculari ketemoni, ofwo orumu iya na lorihohinore inyi icieng. ³⁴ Kololaha icieng kito lo sigiria, itifi monyeri icieng, ‘nyio ilaha ite kito lo sigiria?’ ³³ Inyiahahi icieng ojo, ‘owak Lahitok inyi’. ³⁵ Iyauno icieng diho Yesu, ofetahini kyelani kuneicieng korwong nenge ko kiti rwohohino Yesu. ³⁶ Kalolot inyi, ofetahi cio kyelani kuneicieng kikoi. ³⁷ Kologoru faji na liculorore kikoi to donge lo Olive, ilulung lo kajifitak kunenge ko kicaha maja Lobanga to kwama to ogorohin kuna ikwati to tanguhin fad kuna lodeu icieng. ³⁸ Ongon gum diho kabu na lolotu to karana lo Lahitok kisiliban ongon kai ko deyo ongon kai noo! ³⁹ Kude Parisihin to katwa lo ilulung ko jimitan diho Yesu, ‘katiyenani, irienga kajifitak kunino!’ ⁴⁰ Inyiahahi inyi ojo, “Ahirihohi ite kalobuho icieng igore ca morutok”. ⁴¹ Kolonyihuno inyi Jerusalem lodeu kang na hitok, icira inyi to Jerusalem oto ⁴² ojo, “Ngara ba iyen isi ene far tohi na ngiyauno diho isi kisilibanati jija iduhari to konyeha kunino. ⁴³ Olotu mute far na lofwonunore merok kunino oduhi kigilita iyo isi kiriti isi kiculati isi to fajihit fad ⁴⁴ kibirohini isi kof, isi ko tee kuna longon katwa lo kiwata nino. Ida mut ongerihini moru icodoho kai lo kaletoni tonyio ida afa isi iheru faritin kulo lotuno lo Lobanga diho isi”. ⁴⁵ Ko rutoro Yesu kaji lo Lobanga, ko kicaha kifuhita cio kuna lorumu itiloto ija. ⁴⁶ Ojo diho icieng, “Igero ojo, ‘itongo mute kaji nei ara kaji lo kilifa’ ati litirak ite ara kunom lo kabelak” ⁴⁷ Faritin fad itiyena orumu inyi to kaji lo Lobanga, ati kadwarak kuna hitoha, katiyenak kulo cik ko kabolorok to kiji lo cio orumu otemati kifadaru inyi. ⁴⁸ Oto hati ida icieng orumu kikoi lo kifada inyi tonyio cio pili okodomoti ningo tenya nenge.