¹ Oto Yesu orihohi jayona kunenge kitisirani lo rihohino icieng jimitan ojir ilifati ida oniemaha. ² Oto ojo, “Iyo lobo kang afa, ongon lobo kangotoni lo tenya na lida obang Lobanga kode ibuha to cio. ³ Ongon many lobo ngorwani lafuserito na kang na locud lotita diho inyi ilelia ojo tokeru tenya nei ko katiudok kunei. ⁴ To faritin kuna iborengi oberu inyi. ati to kifwongi olot ojo diho ken nenge ake ake, ‘kileng ngida nan abang Lobanga kode abuha to cio, ⁵ Ati tonyio ocuda ene lafuserito lotita diho nan, ade ca nan tenya nenge ojir ida kitimote nan tone cuda lo lotita nenge” ⁶ Oto Lahitok ojo, “itining tenya lo nu kangotoni lo tenya irohoi. ⁷ Oto hati ca Lobanga ida ongot tenya lo tee kunenge kuna lonyumu inyi kuna licira diho inyi karwe ko far? Itiring ca inyi cularita icieng? ⁸ Ahirihohi nan ite ode ca inyi jimitan akeru tenya neicieng. Manyu okeru deu deu. Oto hati koloitu mute kito lo tungani orumu ca inyi kiruk ongon kof?” ⁹ Diho cio kude kuna lofik ojo kijiri icieng itikajati cio kuna kude, oforohi Yesu icing ene kitisirani ojo, ¹⁰ “ofwo afa cio are kilifa, lobito parisini ati lobito katisofoni lo mocoro ¹¹ Owoju Parisini ilifa to ken nenge ojo, ‘Lobanga akwama nan isi tonyio ida nan ari iya cio kude- kabelak, katiyok kulo ticitici kuna irohori, katiyok kulo lomuna kode iya ene katisofoni lo mocoro. ¹² Afaranita nan kinga kakeny are to sabit lobito, aciorihita manyu lobiton lo tomon kulo sangite fad kuna larumunita nan. ¹³ Ati owoita kasofoni lo mocoro to lolomaje ida kileng oting konyeha kai ati onanga locolo nenge ojo, ‘Lobanga kilau nan kapalani’. ¹⁴ Ahirihohi ite jimitan ene lerok ida ara ladi bito oning Lobanga kilifa nenge. Tonyio tungani fad na loting ken nenge kai iticuluni ati na litisidi ken nenge otingi. ¹⁵ Iyauno cio tee kuna sidiha diho Yesu ojo ojir inyi otir icieng. ¹⁶ Ojo jayona kunenge odeu ji, iriengi cio. Ati ilolong Yesu tee kuna sidiha diho inyi ojo, “ingohiti tee kuna sidiha ofwonu diho nan, manyu ketik icieng tonyio okabwe lo Lobanga ara lo kuno lori ko kuno. ¹⁷ Ahirihohi ite tenya lo dede jimita tungani na lida ifotu okabwe lo kai iya kito na sidi ida mute orute”. ¹⁸ Itifi lobo kalanyunoni inyi ojo, “katiyenani na ijir, nyio ba ngtii nan arumunore warun na isio?” ¹⁹ Inyiahahi Yesu inyi ojo, “nyio ilolongo isi nan ijo na ijir? Oru lobo tungni lojir ati ara Lobanga ake. ²⁰ Iyen isi cihicihi ketii lomuna, kefade, kekoko, kegulihi, tobang munyi ko ngutingi”. ²¹ Ojo inyi, “kuno fad aric nan many afa arihe nan asidi. ²² Kolonig Yesu ji, oto ojo diho inyi, “orihe ongoromahino lobito tohi diho isi, itilote sangite kuna litehita isi fad, icio diho kakidahak ito ca isi ifik bara nino kai. Ilotu hati kijif nan”. ²³ Koloning inyi ji oto itoyo noo tonyio ara afa inyi tungani kabarani noo. ²⁴ Ode Yesu inyi ko jimitan, “golun ha re diho kabarak rutoro okabwe lo Lobanga! ²⁵ Dede otanga iyo lonaga rutoro to konyek lo libira ilany kabarani rutoro okabwe lo Lobanga” ²⁶ Kuna loning ene tenya ko kitifia inyi ojo, “ngai hati dong mute lo luaharu? ²⁷ Inyiahahi Yesu ojo, “tohi na lida itweruno diho cio, diho Lobanga itweruno”. ²⁸ Ojo Petero diho inyi, “lohingerihi ohoi sangite kuniyang fad kijif isi”. ²⁹ Ojo Yesu diho icieng, “ahirihohi ite tenya lo dede, oru tungani longerihi kalenge kode ngorwani nenge, kode recera kode katomonok kode tee to tenya lo okabwe lo Lobanga, ³⁰ lida ca orumu kakeny becek iyo ene kof ojo manyu to kof na lolotuno warun na isio”. ³¹ Odumu Yesu jayona kunenge tomon ko are ko kitingadaru icieng kalele, orihohi icieng ojo, “kifworo ohoi manyu Jerusalem ko sangite pili kuna liger kamocak to kito lo tungani ofwo ca itufuta, ³² icori ca inyi kac kulo misiok, ofwo ca icieng okwenitare inyi, omori inyi, omitahini kamilak ken, olumi manyu ifadari inyi. ³³ Far lo uni owaru ari”. ³⁴ Ida jayona iniang lobo tohi diho kuno tenyi tenyi loteny Yesu. Iduharu fotiri lo tenya nenge diho icieng ida icieng oyen tohi na lotenya inyi. ³⁵ Kolo nyihuno Yesu Jeriko, lobo tungani ka ngodoni orumu itongo kalele lo kikoi ililifita, ³⁶ koloning ilulung oringaru, itifi nyio longon kitiihino. ³⁷ Orihohini inyi ojo Yesu loNazaret oringaru. ³⁸ Oto ilolong ojo “Yesu kito lo David kide nan to kisa”. ³⁹ Cio kuna litemita ko kirienga inyi ojimi ojir obuho. Ati igore noo, “kito lo David kide nan to kisa” ⁴⁰ Yesu ko woita, ko rihohino cio ojo ojir iyauni na tungani diho inyi. ojo inyi lonyihu diho Yesu itifi inyi ojo, ⁴¹ “iwak isi nan atii nyio diho isi?” Inyiahahi inyi ojo, “Lahitok awak nan deya” ⁴² Ojo Yesu diho inyi, “torumu konyeha kunino; lohitijir kiruk nino isi”. ⁴³ Deu deu inyi ko deya ko kijifita Yesu omaja Lobanga. Kolodeu cio fad ji, omaj manyu icieng Lobanga.