¹ Ojo Yesu diho jayona kunenge, “sangite kuna licwara cio ourorita iyo kipal ofwonu ca ati ongon kidak diho tungani na lofwonu nitare icieng. ² Ocam inyi kibiro hino nam ko moru na hito otora murut nenge ilany inyi kicwara kuno sidiha iya kuno ourohino iyo kipal. ³ Naha iririati kenite kuningi. Kalipal rece nino irienga inyi, kalirwo, tolau inyi. ⁴ Kalipal diho isi kakeny mietare lobito far manyu olotu diho isi kakeny mietare ojo larwo nan, tolau inyi”. ⁵ Ojo jayona diho Lahitok, “tosod kiruk niyang”. ⁶ Inyiahahi ojo, “kalitehita ite kiruk kileng ngori iya kirejati lo karadali itum isi ijo iyo ene ciani, ‘to dutuno ilo itibulahino katwa lo nam otum kining isi’. ⁷ Adi ba ngongon lobo diho ite ko karwaani na loremo mana kode itibala kera, ngojo inyi diho karwaani kololotu to mwang, ‘ou dong itongohino idaha?’ ⁸ Ngida ba inyi ojo ikukumahi daha nei lo kurou ikukumahino iyauno adaha nan, amat ojo hati lakeru nan ito hati isi idaha ko mata? ⁹ Okwama inyi karwaani to kitiyo tohi na litii inyi? ¹⁰ Ite manyu kali tii sangite fad kuna lohirihohini ite ojo itiyoto, ojir ijo, ‘kira ohoi karwaak kitii ohoi tic iyang”. ¹¹ Dong kololoro Yesu iya Jerusalem, oto inyi ijif kikoi na litolita lokorare lo Samaria ko Galilea. ¹² Kolonyiha inyi rutoro lobo kang, itiric cio tomon kuna lomwai talulu inyi. owoitati lolomaje ¹³ oto hati ilolongoti to ogoro na ikwat ojo, “Yesu lahitok icwara kisa kinief diho ohoi!” ¹⁴ Kolodeu icieng ko jimitan, “ifwo itotorohiti kenite diho kadwarak”. Ojo icieng ofworo, icieng ko nyujon. ¹⁵ Lobito to kiji neicieng deuno jimitan lajir inyi ji, ko ituno omaja Lobanga to ogoro na ikwat. ¹⁶ Olotu ko urohino kejuha kulo Yesu ko kwama inyi-ara manyu inyi Samariani. ¹⁷ Itifia Yesu ojo, “Ida adi kuno cio litinyujoro fad ara tomon? Aji ha ongoni kuna kude mietangon? ¹⁸ Oru lobo loitu maja ko kwama Lobanga ara ene misiohoni keken?” ¹⁹ Oto ko jimitan diho inyi, “towoju ilo lohitijir kiruk nino isi”. ²⁰ Tolobo kalitifi afa Parisihin inyi jimitan anu olotuno okabwe lo Lobanga, inyiahahi Yesu ojo, “Ida okabwe lo Lobanga lolotuno to kiriria ningi ²¹ kode ida ca cio ojo, ‘Ene longon ene kode nu longon idi tonyio ongon okabwe lo Lobanga kiji ningi”. ²² Oto ko jimitan diho jayona kunenge, “Olotuno mute tik na lohidamare ite deya kuno faritin kulo kito lo tungani ati ida ca ideu. ²³ Ojo mute cio diho ite, oinu idi kode oine ene; kefefeita omot neicieng. ²⁴ Tonyio kito lo tungani to far nenge ori mute iya hila na linwak kai to lobito ngati oringe manyu angati. ²⁵ Ati ketemoni re ojir iticani re many oberu ene kofiangiti inyi”. ²⁶ Iya lafa to faritin kulo Noa ori manyu mute ji to far lo kito lo tungani, odaha afa cio omatati, oyemati, ²⁷ itiyemati many far na lorutorore Noa katwa lo tigol. Oto hati kifi ko fwonuno kerihino icieng fad. ²⁸ Ori manyu afa ji to faritin kulo Lot. Odaha afa cio, omatati, inyiangati, itilototi, itibulati, ifahati kajihit ²⁹ ati far na longerihinore Lot Sodom, kima ko salfa ko ca to kai ko keruno icieng fad. ³⁰ Ori mute ji token far na lobotore kito lo tungani. ³¹ Na far mute oru tungani na longon kai lo kaji nenge, sangite ongon katwa lo kaji lo lo mute odumu icieng. Iya na oru tungani longon mana lifeju ojo ayomuno lobo tohi. ³² Ibuhati ngorwani lo Lot. ³³ Tungani na lotem rica warun nenge itiri mute manyu na litiri warun nenge oricahi mute. ³⁴ Ahirihohi ite na karwe ongon mute cio are lagere lobito iyari mute otong lobito. ³⁵ Iya mute ngorwo are kirie, iyari mute lobito otong lobito. ³⁶ Ongon mute cio are mana, iyari lobito lobito otong. ³⁷ Itifi icieng ojo, “Aji Lahitok”. Inyiahahi inyi ojo, “Faji na longon tohi na iwei, otuba taruha”.