¹ Anyahi nang arami hadiri ditho Kristo. Aang nang adwala; onyahi nang othaji hindang dihithemi h’Ohoile Lodwa ² hijan owon donang elongojitha nabolo h’adihari n’othaji hindang naang ecuhi. ³ Era nang ijyan nang thoicyenahini, ekeluni adi tho Kristo th’arami thoh’olarok hundang harwanga nang hosong th’ohofule. ⁴ Isong hulo Oisraele. Owoni isong hulo h’endafaitho, ethahuyo, asuduhe n’emora, oyano, abangi n’Ojok h’asang hayyu homwai. ⁵ Ohohonyo hosong hofuhunerek Kristo th’ohofule; inyong lo Ojok tholohide asang fodok. Inyong lo tho imamajye mak. Amen. ⁶ Ikara hijan aangi asang h’Ojok homwai hayyu. Ikara hijan ohothing fodok hotho Israele ho Israele. ⁷ Ikara dang hijan anyakwaryak fodok h’Abramo oduring honyong. Ti, “Tholo Isakko ilongoi isong onyakwarya hohoi.” ⁸ Ithaithak hijan oduring h’ohofule, ikara oduring h’Ojok. Ti, oduring h’eruhon nomwai, orwangi iring onyakwarya. ⁹ Ocame l’eruhon arami ho mwai hayyu: “D’orii lya aindu nang de; owon de Sara h’oitho.” ¹⁰ Ikara lya ti. Di holu h’ocame lya orimak ahibu Rebeka awon h’ahohye n’othulo aboithe, omonye lohothai Isakko. ¹¹ Juk kabong hoyisuni oduring, dia juk kabong hoihandye asang hayyu hahamonyong, dowoni ara arami hathuk Ojok acama, ikara th’ehandyo; ti tholonyong le longo. ¹² ojyori donyong, “Olwahyo mwai ohoboloni ottwathi.” ¹³ Ojyahitha nathuhi egeryerek nya berien, “Amuno nang Yakobo, ti aman nang Esau.” ¹⁴ Ainyong de ecama? Ipal Ojok? Ikara ahani. ¹⁵ Ojyo I nyong lo do Musa, “amehi nang de othulo l’amehi nang; nang afithok othulo l’afithok nang.” ¹⁶ Iring nang, ikara th’othulo lowak, h’othulo longero; th’Ojok ti, lo ithaithak amehina. ¹⁷ Ojyori aramo hanya athuhi egerohina do Farao, “Th’arami tho hune, ithadothu nang iye ethaithahinerek do hoi akolon hindang dotehi ofure hindang dihap fodok.” ¹⁸ Otiha, owon Ojok h’amehina d’othulo lowak inyong, esarak d’othulo lowak inyong eminge. ¹⁹ Ijyo iye de do nang, “Anyo othifeyo inyong epal? Ngai de othifoitho arami hawak inyong?” ²⁰ Okara ahani. Iye othulo. Iye ngai dithapalyo Ojok? Ocohi d’othulo l’oyeuni ajyaran d’ohoyani lonyong, “anyo iyeu iye nang ahani?” ²¹ Aang ohoyani l’amoco oyeyo th’amotong attitto h’egyemarik inyong iring owak inyong? ²² Angai bai, ainyong ira iwonan ara kabong Ojok lera ithaithahina engere karik akolon nanyong thotehi, angongok edehina arakang amothing nengere nayong nathuhi ehuhumyo ara nethaohojyerek? ²³ Ojyahitha angai ara ihandyo ahani dithaithahina abara h’ahujon nanyong th’attitto thah’amehi, hathuk inyong ehuhumyo ara h’ahujon? ²⁴ Ojyahitha angai ara ihandyo d’ohothai h’athuk inyong elonguna, ikara th’Ojudei, th’ohothing homok hamaring? ²⁵ Iring najyarik inyong d’ocame l’Osya: “Aindu nang di longo ohothing hundang karik ohothing h’omuno inyong, karik ohothing h’aang inyong omuno. ²⁶ Karik inyong nya alo d’amiji nanya ojyarik do song, “Ikara ithai ohothing hundang; diya ofuni de ilongo isong ‘oduring h’Ojok lomijo.’ ²⁷ Ekor Isayiya th’arami thoho Israele, “Ara dwo ara okalifinok ho Israele iring akujo h’owor lohittok, irahi ofithono hosong ifuna ithalwahunu.” ²⁸ Oindu de Ohobu iyanu ocame lonyong dihap thenene koko, fodok. ²⁹ Karik iring nadwo ocamarik Isayiya, “Ara kabong ohobu l’ohoiriryak hoidehi dohothai onyakwarya, era ifuna ijahitha Sodom, eloyitho ara Gomoro.” ³⁰ Angai de efunu ijyaran? Ofuni de ijaran ohothing hoikela th’Ojudei, ohothing hawang otahitha abisan, arimahina abisan th’eruk. ³¹ Ti, Israele nathifoitho oyano habisan kabong hoidwong diya. ³² Anyo othifoitho Israele oyano h’abisan th’egyamathik, ikara th’eruk? Ebosoi d’omorwong lo ibosorik. ³³ Iring nathuhi egerohinerek, “Ingengela, nang lethahi di Zione omorwong loibosorik, omorwong lohittok l’omorit. Othulo l’eruk do nyong, aang de ahu hojwu.