¹ Anyahi nang dohoi ahani nahothai Febe negyema di hang n’Ojok di Cenkrya. ² Difothu ithai inyong na th’ofure thol’Ohobu, iring nehandyere ohoiruhok d’Ojok. Olwahyethe ara ithai isarak do nyong aning nawak inyong thothai; inyong na nya ahalwahani nayyu d’ohothing olwarai karik do nang. ³ Asulak nang emanda hindang do Prisilla karik Akwilla, ohoigyemak ho nang d’egyema no Kristo Yesu. ⁴ Aindehi isong eryafuna dilwahuna, ikara nang hamaring. Alwahuni dang ahangithek h’Ojok h’ohothing hoikela th’Ojudei. ⁵ Emanda hindang dang d’ahang n’Ojok nasuduha di hang ho song. Emanda hindang d’omotte hindang loko, Epeyeto, othulo l’amiji no Asiya, lonya iyak eruho do Kristo. ⁶ Emanda hindang do Maria, athulo negyema bebe thoithai. ⁷ Emanda hindang dang do Androniko karik do Yuniya, Ojudei iring nang, honya ifithahini ho nang. Otehi nya isong ohoifahak; isong ecak awonan ara okristyani thonang. ⁸ Emanda hindang do Amplyato, omotte hindang d’elulung n’Ohobu. ⁹ Emanda hindang do Urbano, ohoigyemani ho nang d’egyema no Kristo; emanda hindang dang do Stakio, omotte hindang. ¹⁰ Emanda hindang do Apelle, lonya athemunu eruhon nanyong do Kristo. Emanda hiding d’ahang no Aristobulo. ¹¹ Emanda do Herodyon, l’Ojudei iring nang, karik d’olarok okristyiano di hang ho Narciso. ¹² Emanda hindang do Trufana karik Trifosa, ohoigyemak d’Ohobu, karik omotte hindang Persis, laleng egyema d’Ohobu. ¹³ Asulak nang emanda do Rufus, ohoigyemani lohitto d’Ohobu, karik d’ahathingi nanya indafaitho nang iring olonyi. ¹⁴ Emanda hindang do Assenkristus, Flegon, Hermes, Patrobas, Hermas karik d’okristiano fodok olarok dosong. ¹⁵ Emanda do Philologus, do Julya, do Nereo, ahani, do Olympas karik d’ohothing fodok h’Ojok howoni hosong. Imandathi emanda n’olarok. ¹⁶ Ahangithek fodok h’Ojok ho Kristo, asulak nang dothai emanda. ¹⁷ Ajo nang dothai, olarok, omijethe tuhudi d’ohothing heyanu ebwa, etharohoje etyenio nethuk ithai efothuna. Isukathi olomarai thosong. ¹⁸ Ohothing hulya ikara ohoigyemak ho Kristo Hobu; ohoigyemak hulya h’ahohya hasong. Th’ocamitha thohosong thohojak hoyyu, hoditumyo ohothing hoyyu. ¹⁹ Ethaninguni ohothing fodok eruhon nathai arami angejuho hayyu. Th’arami tho hune, amuno nang bebe thoithai. Awak nang ithai thohongo d’arami hayyu. Oyijotho disuka olamarai th’arami hamonyo. ²⁰ Owon Ojok loindu th’elik thon’othaja karik n’ahap; thonyong, oryehi de Sitan tholohop h’ahejek hathai. Alwahyo n’Ohobu lohothai Yesu Kristo, thoiwona hothai. ²¹ Timoteo, ohigyemani honang, ithamandayo ithai, Luco, Jason karik Sosipater, Ojudei iring nang. ²² Nang, Tertius, ohoigeroni l’amanini ne, asulak nang dothai emanda n’okristiano. ²³ Othulo lesuka nang di hang honyong, ahang n’Ojok. Owoni ocamitha diya. Ithamandayo ithai Gayus; Erasius, ohoendefani l’enyahwo h’abore karik lalalai, Kwartus, ithamandye ithai. ²⁴ Awang. ²⁵ Hethaboloryethe Ojok! Inyong ithakolyo ithai d’eruhon nathai arami angejuho hayyu hetyenio nang dothai tho Yesu Kristo, karik thanyahina arami hadiri hanya idima nya berien. ²⁶ Ti, arami hadiri hanya hwa ethalyehini egeritha h’ohocorok. Atehi dang amisok fodok thefahi thon’Ojok, diruk ohothing fodok, ethaningye. ²⁷ D’Ojok hama, ohongoni, ahujon thoiwona tholo Yesu Kristo mak, Amen.