¹ Iring dothai, ethuk ithai nya aye ditha h'omanyitha hothai homonyo h'eyatha. ² Ditha nya hoisukaitha homonyo karik eyatha isuka ithai thoisukaitha thah'ahap na. Isuka ithai nya th'osaritha thoh'ohoindefak h'aloiri, ohoile l'egyema ditha olonyirok h'amesio. ³ Esuka ohothai nya fodok dihiji h'ohthing hulya, ara ohothai ihandyo asang hamonyo hawak oisuket lohothai l'eyau, karik ohothai ihandyo asang hawak ahwan karik ahu. Thoisuket, ohothai nya oduri h'engere, iring elathulo fodok. ⁴ Ti, obara Ojok amehina, anyo, obolo amuno nanya omunorik inyong ohothai na. ⁵ Dihide nya hoisukaitha hohthai homonyo hulya, esarak ohothai thoisukai ara ohoisuok ditha ho Kristo - th'alwahio thananya ithalwahunerek ithai. ⁶ Adohok ohothai Ojok dihide fodok ho Kristo, karik ethawonik ohothai fodok dith'amasok hothohide ditha Kristo Yesu, ⁷ dara d'operi hofuni, doindu inyong ithaithahina ohothai abolori bebe nebarithi h'alwahio nanyong naleyo ditha h'ayiji nanyong d'ohothai dithai Kristo Yesu. ⁸ Th'alwahion thon'Ojok, ethalwahunu ithai th'eruk. Ikara thothai oindu alwahio ne. Inyong na alwahio n'Ojok. ⁹ Alwahio n'Ojok ikara th'egyema oindu, Awang othulo lethadara thonyong. ¹⁰ D'ohothai elulung n'egyema n'Ojok, ayehi Ojok ditha ho Kristo Yesu thoihandye asang hayyu hathuk Ojok ehuhumahina arabo nya berien thohothai, defunu idaha ditha hosong. ¹¹ Hekwothi hijan ikela ithai nya th'Ojudei. Ilongoi ithai nya ara ohothing hakabong hongocye. Ilongoi ithai nya ara "awangan n'angocio". Awangan n'angocio th'ahinang. ¹² D'omiru hule ekeluni ithai nya tho Kristo. Ithai nya ohodahak d'ohothing ho Israele. Ithai nya ohodahak d'emorathik h'acocio. Awang eyihina nabo nathai do mwai. Awang ithai nya iwon h'Ojok dihap. ¹³ Ti, ditha ho Kristo, ithai honya ilama th'Ojok hulo, eyanai ithai iindehai th'ahotho thono Kristo. ¹⁴ Inyong lo elik n'ahwan karik ahap nahothai. Athunak ohothing arehai ara aboithe. Th'elathulo thananyong athuk ahecyo oilyethe l'elamerok lonya athuk ohothai ebwayo. ¹⁵ Inyong na, athuk eduhuna adi oyano h'efahitha h'osaritha d'oyeu inyong othulo ongejuk ditha honyong diyanerek elik n'ahap karik n'ahwan. ¹⁶ Ethamoryo Kristo ohothing arehai hulyan ditha ahwan aboithe d'Ojok thal'akruce, eyanu d'elamerok aye. ¹⁷ Aindu Yesu anyahi elik dothai honya olama th'Ojok karik ohothing honya oyindek. ¹⁸ Tholo Yesu erumak ohothai oyihoi ditha Ohoile aboithe Lodwa d'Omonye. ¹⁹ Th'omiru hulya, ithai ohothing hoikela th'Ojudei, awang ithai hoiwon ara ohodahak dia othohomonok. Kombwo, ewon ithai ara ohothing h'amiji aboithe karik ahang n'ohothing hodwa h'Ojok. ²⁰ Athuhi ithai aduho d'asihothe n'ohoifahak karik ohocorok Awon Yesu th'ahwan ara asihothe. ²¹ Ditha honyong osiru athwa fodok ara aboithe, aboboloruno ara Atemplo ditha Ohobu. ²² Ditha honyong dang oduhoi ithai ara amaji aboithe nesukarik d'Ojok ditha Ohoile Lodwa.