¹ Ara athuk Ojok adohohina ithai ho Kristo dihide, othifeyethe asang hothohide, amaji nesukari Kristo dinget h'Ojok. ² Igigilothi asang hothohide ikara hothohop. ³ Atha ethuk ithai aye, ti, esu nathai nedima ho Kristo ditha Ojok. ⁴ Ara Kristo, lowon dothai ara esu lo laleyo, ileyo ithai de honyong dang dihujon. ⁵ Athuhon nya ethayeyo asang hamonyo, asang hanya hofithoro dihap isong: eleru, amanya nebot, ehihira n'asang hothohop, awahan asang hamonyo karik audori, narwang iring aning neduhuni iring Ojok. ⁸ Asang hune isarak engere n'Ojok ainduna d'oduri h'aangan ethayiryo arami hanyahini dosong. ⁷ Isong asang hune hanya idaha ithai hosong orii lesukarik ithai ditha hosong. ⁶ Ti, ithai thedehi asang hune fodok: engere, egigilitha hamonyo, omoritha karik ocamitha homonyo hothohuthuhie hothai. ⁹ Hoidwala d'othulo loboling, anyo, ethuk ithai eloyitho ara ohothing ongejuho hoihanditha hosong, ¹⁰ Karik ethuk ithai eyofohina othulo ongejuk ditha h'atehan iring arijori no le lonya oyeu inyong lo. ¹¹ Amaji ne nawangarik Ogrithanani karik Ojudethanani, angocyo dia awangan n'angocyo ahwan, ohothing hoisuka iring ecangi, Oscythians, ongaca, othulo lesuka olefeng iring owak inyong, ti, Kristo inyong fodok karik owon ditha hosong fodok. ¹² Iyofohina, iring ohothing h'Ojok hanyimuni, ohothing hodwa karik homunoi, elik n'ahohya, ayiji dohomok, alauna n'ahwandek, awahan ayiji nohomok karik angongohina ethilauna. ¹³ Olwahyethek ahwandek. Ara ongica othulo lobo holoboling, thomehi iring nathuhorik ithai Ohobu amehina. ¹⁴ Tholohide h'asang hune fodok, iwonatha h'amuno, ahathorani n'abisan. ¹⁵ Elik n'ahap karik n'ahwandek no Kristo thoindafaithe othaja hothai. Th'elik thone inyong nanya ilongorik ithai ditha ahwan aboithe. Ofurahina ahinywarang da Lamolo. ¹⁶ Ocame lo Kristo thoisukai ditha hothai iring ebarit. Th'olofioro fodok ityeniethe ara ithai isaryo ahwandek th'oyendok thah'elulung karik h'Ohoile. Idolothik th'afurahina than'ahinywaran dithaja hothai d'Ojok. ¹⁷ Aning nehandyo ithai th'ocame dia th'adodoro, ihandyethe th'ofure thol'Ohobu Yesu. Ofurahina ahinywarang d'Omonye tholonyong. ¹⁸ Afuretho, iruhotho ondehio hothai iring nawaharik Ohobu. ¹⁹ Ondehio omunothi ofuretho hathai, hoimanatha isong ara namonyo. ²⁰ Akalifinok h'okalifinok, iruhotho arami halethemonye hahenethehathngi d'asang fodok, anyo, ithamunoyo Ohobu. ²¹ Omonyehio, hoitorohojethe othaja h'okalifinok h'akalifinok , tek ataluhoi. ²² Ongacani, ithanignyethe arami h'ohobwore hothai d'asang fodok, ikara th'ahonde dithamunoyo isong ija, ti, th'othaji thaladiri. Obangatha Ohobu. ²³ Aning nehandyo ithai, ihandyethe th'othaji d'Ohobu, ikara d'othulo. ²⁴ Itek ithai hijan ifothu ithai de th'Ohobu akanyuma n'aruthahina. Ohobu Kristo legyema ithai thonyong lya. ²⁵ Lehandyo aning nawang nabis, osarye de th'aning thanepal than'ehandyo inyong, awang ekelio thiya.