¹ ínaba'ŋ dááríŋ mitíl: îsa namás mitíl taan, asi dííg dʉó namá ínaba rogo, namás tirje piá ná tereere mereere kollíŋí, namá dʉ́ló appâ kʉrto alá ínaba dée–lé ká̱wyɨ́lɨ, na dog jaǎno'ŋ dakki tʉmo, namás kááríntá kwǎ'ŋ taŋgît kwǎ kerŋa táŋgíteŋ káwe, Yé namá ma̱sɨŋa'ŋ nyaŋá. ² ǎlbá gedde'ŋ tin paago, namá dééŋ táárí dʉŋo díg–sí ádden piá áláŋ kééŋ dʉléŋá'ŋ lóóle ínaba bǎw. ³ Dáárí'ŋ taŋgît kwǎ namá kɨ́rbɨ́e ná ka̱ldɨ́e ná pʉttô ádden káwe. ⁴ Dáárí dʉŋo namá táárí dʉŋo keer áddenpiá, dáárí'ŋ taŋgît kwǎ naŋ dog tʉbʉ ka̱ldɨ́e na soŋŋâ ká̱nyʉ́ŋʉl. ⁵ Dáárí dʉŋo naŋ asi keer táátí dʉŋo ádden piá, namá ka̱wŋɨ. namá táárí kwǎ ádden pi–ii táárí dʉŋo bára'ŋ ka̱rɨ'ŋ.yeeŋ namábá kalde na dǐi–sí ná kɨrewe. ⁶ Dáárí dʉŋo namás kwě kee tog ila déllin asá yé saa soŋá kǒil. Lia namá dééŋ ila–sí dáárí'ŋ taŋgît kwǎ–le ádden piá, ɨdɨ̌ŋ na yé dééŋ ta̱bʉ'ŋ in jáwrítíeŋi–i áláŋ mati ba̱gɨ káwa. ⁷ Marraŋ yeeŋ namás suúrŋá–sí in aáŋé, soog dííg in ínaba'ŋ dáárí–sí áláŋbá yé tɨ̌ɨ âl kaw náis mɨrod kɨŋa̱ sayí. ⁸ In nálaŋ namás dáárí dʉŋo'ŋ kwě–sí kɨ́rbɨ́e nás ka̱wŋɨ, namás dééŋ kʉʉl–sí kábé nás ínaba'ŋ paál kamíŋíe. ⁹ Bɨŋa ay–ii gîs lóŋ dáárí dʉŋo áláŋ kaa piyá? Yé bá'ŋ éla ná kila taŋgît kwǎ–sí puu. Namá ínaba'ŋ dáárí kwa kerŋa–sí íní. ¹⁰ Na bɨ́ ása tullên diŋ kwě'ŋ baluŋ, Wʉ́o'ŋ domboreŋa toya in beléŋá? Dɨ́tó ila alá alá jʉtʉ́mó dʉŋo íríŋí, naa námáŋ yé–ii ná dɨ́tó'ŋ dórgí eŋa ¹¹ In a̱rɨ ni–ii ná loŋpii piá na yé kééŋ kʉ́ŋɨ́–les dom lóŋíti. ¹² Ta̱bʉŋa namás tullên diŋ kɨ́wé âl îsa dɨ́eŋꞌíŋ ŋi–ii ná risíŋ. Namá kôili áláŋ kéya. Marraŋ ɨdɨ̂ɨŋ ná kwa soŋŋâ–sí ka̱lɨ kawiŋ–ii. Namá kundíe ná keěŋé. ¹³ Dɨgɨnɨ̂e'ŋ jaa: Namá Páásíŋá na Hiródíŋá dîi îsa–lé ádden káwe áláŋ kí kééŋ ʉʉŋa keěyal, ¹⁴ Namá dêlé kéle nás in aáŋé, " Gʉʉdpáálí kɨ́ása kalʉŋ jɨ́ âl lême jaŋ, âl kwa nyét–sí arrá ba̱gɨ jaw ná in kerker ás jawba âl yé ani–ii naŋ ʉʉ́ŋ seeŋa jírsiŋ ǎl Wʉ́o kwǎ áláŋ kwa in nálaŋ kawe. áisa juwa ába kuri Gaysâr–sí dɨgɨnɨ́eŋa kawrítisáŋ wala á síŋ kawrítiba" ¹⁵ îsa namás ɨwo yeeŋ âl kila kwa gé ǎl dû kúndiŋa, Namás in kwǎ, " Kaáŋ uúŋŋi–ii alá bóil áláŋ bʉ́go? áisa dinâr búlŋi . ¹⁶ Namás dinâr kééle namá ɨŋo, "In kiǐŋ–sijaluŋ–ii na kin kiǐŋ–sikona gé dééŋ írí" Namá in kawíe ása ába kuri Gaiysârꞌíŋ ge. ¹⁷ Namás in kwǎ ába kuri Gaisâsr–sí âl a̱rɨ ɨd baní ǎl dééŋ–ii na Wʉ́o–sí âl a̱rɨ ɨd baní ǎl dééŋ–ii. ¹⁸ Kwa–sí namás îsa'ŋ ʉʉ pirje eŋa: Sadúsa–sí ná sállá jeeŋꞌíŋ kɨ́ɨ́ŋʉl Saduúsaŋa see á kééliba ása kwa sállá kɨndélíŋá abá kʉ́sɨŋɨ, ¹⁹ Namá dǐi îsa–lé kéle namás in aáŋé Gʉʉdpáálí, Mûsa âl in kwǎ abás dʉó dʉónyâ nyáŋá ná way–ii na dogólá ájúndíba ila bɨrmɨ̂t–sí áláŋ bás dééŋ kóná jee na dogólá aláŋ bás dééŋ bára'ŋ gé ǎl way–ii,' ^{21 20} âl asi díg kwa suurꞌíŋ bârŋa oson na a̱w ka̱ɨ́ŋ, waar kʉŋo namá dʉónyá nyaŋá namá way–ii na kwě tog dog ás kéŋaba. v21Dééŋ bára ǎl dééŋ soór ʉ́ndʉl namás dééŋ bára'ŋ bɨrmɨ́t–sí nyaŋá yé dog naŋ way–ii, naŋ kwě tog dog ás kéŋaba. Namás ɨɨs kʉŋo nyaŋá ǎl dééŋ soór ʉŋɨ ila ʉʉ namás yee–sí dog eŋa. ²² ila ʉʉ namás kila bârŋa oos na a̱w–sí nyéttin in nálaŋ eŋa. ²³ Na abás kwa sállá kɨndeli in dʉó yáa kiǐnníŋi–ii? asá suúrꞌíŋ bârŋa oos na a̱w nyé keéŋé." ²⁴ îsa namá in jáwí, "Dɨ́eŋ belé kw nyéttin âl korroŋ–ii, bɨ́ ása á baluŋba, Wʉ́o'ŋ domboreŋa toyya kaa gîs pulŋítíya? Na dog ás baluŋba Wʉ́o'ŋ kʉrro'ŋ ere a̱rɨ tóg dog ása á–baluŋba ²⁵ Kwa abá sállá kɨŋɨ yáaŋa ása á kanníyába, áláŋbá in kɨŋɨ–ii ni–ii ná melega jaawíl. ^{26 27} Bɨ́ ása baluŋ âl kwa ka̱ɨ́ŋ nás sállá kɨŋɨ, bɨ́ âl Mûsa'ŋ dombore–lé árdenbâ, ǎl ila bûs síŋ risíŋ asá sʉɨ́ŋá, ila aldí alá in kwǎ, 'Ká âl ila Wʉ́o aŋ alá Birâim na Isâ na Yagûb gîs kʉmé '? Yé waytóólá'ŋ Wʉ́o ála áiba âl sálláŋa'ŋ–ii. Bɨ́ Sa̱dʉ̂sa dɨ́eŋ belé âl nyéttin korroŋ–ii." ²⁸ Káálíntá'ŋ appâ kuŋo Mûsa'ŋ dáálíŋá'ŋ da̱ó namá dííg éa ila dɨo alá îsa kéŋá ná kí Saadûsa'ŋ galda pa̱eŋi–ii. ǎlbá já̱gɨ́la ná îsa jawí tullê jáwí. Namá ɨŋo káálíntá'ŋ appâ kʉŋo ây–ii kuŋo–ii? ²⁹ îsa namá in jáwí, "Káálíntá'ŋ appâ kʉŋo âl in beéŋ Israîl kwǎ, 'Bɨ́ ása bá loŋ pii tog déllin baiŋ. ³⁰ Bɨ́ áláŋ yee kí kɨ́eŋ kilmaŋa na kí kɨ́eŋ kʉo na kí kɨ́eŋ ta̱bʉŋa na kí kɨeŋ surŋa soŋŋâ boiŋí.' ³¹ Na dáálí'ŋ appâ a̱w kʉŋo âl in beléŋ, âl jɨɨrán–sí dog in jóil ni–ii ná ǎl dɨ́ɨ́ŋ suur–sí jóil,' Dáálí keer ála á–keba ná kin a̱w~lé soŋá appâ–ii." ³² Ila dʉó alá Mûsa'ŋ dáálíŋá'ŋ gʉʉdpáálíŋá le–ii namá in jáwí, "Gʉʉdpáálí dɨ́ɨ́ŋ belé âl se–ii! alá jámiŋ Wʉ́o ǎlbá tog bɨ́rr–ii ná keer á keba âl se–ii áláŋ ³³ Wʉ́o–sí kí kɨ́eŋ kilmaŋa na kʉo na ta̱bʉŋa na kʉrro boiŋí, Na áláŋ dog kwa kerŋa–sí dog in bóil nii ná álá kɨ́eŋ suúrŋâ–sí bóil, kin káálíntá'ŋ gubbuŋa na janíŋá–le karra ǎl soŋá tullé ge kila ǎl kɨ́ kérrég ka̱rɨ́ŋél." ³⁴ îsa almíŋ já̱gɨ́la ná ila dʉó'ŋ jawí riyâ kééŋá, namás in kwǎ, "Jɨ́ Wʉ́oŋ kuriŋ–lé karra álá jaŋba."Liya kwa–sí namá kʉrro jʉ́ŋe áláŋ jɨ́ŋoŋa kerŋa kɨ́ɨ́ŋol. ³⁵ Jááso–dʉŋ na Da̱ûd: ila dɨo ǎl îsa toŋ tiyyâ'ŋ dɨó kééŋ nás kwa–sí risíŋá,namás in kwǎ," Mûsa'ŋ dáálí'ŋ gʉʉdpáálíŋá indálaŋ ay–ii kámiŋa âl Jááso dʉŋo ába kuri Da̱ûdꞌíŋ órréŋ kwa lé–ii ǎl úndul. ³⁶ Kʉo tiyyáŋa ása Da̱ʉ̂d–sí ta̱bʉ'ŋ póye, áláŋ in kwǎ," Wʉ́o loŋ pii, ása dúíŋ loŋpii–sí in kwǎ áláŋ dúíŋ soór'ŋ eré jôŋn Nama nîŋ kɨ́ɨ́ŋ gârima–sí kɨ́ɨ́ŋ tarŋa'ŋ dû aa." ³⁷ Abá ába kuri Da̱ûd dg Jááso dʉŋo–sí loŋ pii ta̱rɨ́ɨŋ, Jááso dʉŋo dééŋ kwě ay–ii sîŋ–ii kwa soŋŋâ kila ǎl ɨ́de ka̱ɨ́ŋ ná ká̱wɨŋ–ii nás kelkaame, Namá îsa'ŋ írí kilmaŋa bát sɨmmó ɨŋɨ ǎl kee ná risíŋ. ³⁸ îsa Mûsa'ŋ dáálíŋá'ŋ gʉʉdpáálíŋá–sí lóómeŋ piá: ila dɨo ǎl îsa kéŋá ná risíŋá, ná in, "kwǎ ásáŋ Mûsa'ŋ dáálíŋá'ŋ gʉʉdpáálíŋá–sí dʉoŋ baw, ǎl kôili áláŋ wéeleŋa'ŋ tawraŋa–lé kí jʉrɨŋa kurráŋaŋ kɨloŋe, ³⁹ Na áláŋ oroŋa–lé dóŋá kanníyá, Na Yaúda'ŋ daaraŋa–lé âlbá kʉtɨŋ ta̱bʉ kwǎ–sí kóili. ⁴⁰ Na sǔbuŋa'ŋ lóó–le gal bá kʉtɨŋ bárŋa'ŋ túlé kwǎ–sí kôili, na kwa sís jʉ́ma kurráŋa kawe, nás in káwlítíyá âl yeeŋ tagiŋa–gé. namá kɨ́eŋ abarmíta–sí ta̱bʉŋa kaame nás kɨ́eŋ toŋa ká̱bɨya, yeeŋ–sí áláŋ kwa nyét–le soŋá nyálnyíleŋ káwa." ⁴¹ Bɨrmɨttꞌíŋ janí : îsa bá toŋ tiyyá'ŋ dɨó kéŋá ná janíŋá'ŋ sa̱ndʉ̂gꞌíŋ kíli áwɨŋɨ ná la̱ʉ ǎl kwa kɨ́eŋ janíŋá ka̱bɨ́tɨ́eŋ–ii namá já̱gɨ́la ná kwa kawâjja soŋŋâŋ ere sôŋgoŋa soŋŋâ kiŋítíyá. ⁴² Ka̱rɨ'ŋ eré namá birmît pa̱gɨrɨ ela ná minimíniŋa dollê a̱w jíŋí kila ǎl Taarípa'ŋ sabba ɨndeli. ⁴³ îsa namás kééŋ majira–sí in kwǎ," ásáŋ dorol káwa namás in kwǎ ká áísa kí see'ŋ see uúŋ see ámiŋ in birmît pa̱gɨrɨ âl kwa nyét–le soŋá já̱bɨ́. ⁴⁴ Kwa bi kwa kerŋa bá a̱rɨ ɨd ka̱bɨ́e alá yeeŋ á kôiliba kɨ́eŋ mâla'ŋ dɨó, yé saa soŋá pa̱gɨrɨ–ii marraŋ lótá nyét jáá asá kééŋá na naa walá taarípa tog dog ásaíba áláŋ dééŋ írí amí."