¹ Issa namás kééŋ majira sí in kwǎ tóóríg bá duó kawâj kééŋá nás in aaŋé âl dééŋ oro jáa duŋo kééŋ ótáŋá wa̱la wa̱la pii. ² Yé namás ta̱rɨ́ piyá namá ɨŋo in ka ii ǎl ká dɨ́ɨ́ŋíŋ kel aam tááríŋ jɨlóŋ gár janí na naa ká á welba álaŋ jɨ́ in tááríŋ oro jáa. ³ Ela oro jáa duŋo namás dééŋ suur sí in kwǎ na naa ká ka níŋ â ná dúíŋ sagal kóel ála'ŋ dúíŋ táárí lé kara jáwí, ká walá nii kakɨ́ré á aŋba álaŋ turíŋ táárí â naŋ gís tabu túíti áláŋ duó lé sáát â. ⁴ Ká aluŋ si ka níŋ â abá gi íne dúíŋ táárí le karʉ̂l áisaŋ kwa kɨ́eŋ toŋa lé kɨtɨ́rɨ́ŋial. ⁵ Namás jawla ná dééŋ sagalín kɨyo kwǎ sí ta̱rɨ́ piá, namá maiŋ waar kuŋo sí ɨŋo jɨ́ dúíŋ sagalíŋ ka̱yo niin se jeyá ?. ⁶ ása zatʉ́naŋ da̱ɨ píríŋá tamaŋ eyá, ela oro jáa duŋo namás in kwǎ kɨ́ɨ́ŋ kɨyóŋ gâr jabu'ŋ ná waar dû jóŋ nás piríŋá oos ja̱ɨŋó.. ⁷ Namá aw kwaŋ sí ɨ;mo jɨ́ nin si jeyá? yé namá in jáwí ása gomoŋa góldo pǐri eyá' oro jáa duŋo namás in kwǎ kɨ́ɨ́ŋ kɨyóŋ gaár jabuŋ nás wayyéŋá tammaŋ ja̱ɨŋó; ⁸ Sagal namá ela oro jáa koroŋ sí kééŋ tolomaŋ adi awsa jíŋí ɨdɨ́ɨ́ŋ ná in daldɨŋíŋ kwa soŋŋá tolomáŋa gé míŋ kí hérraŋ kwa. ⁹ Naa ká in gís amiŋ in daldɨŋíŋ máala asá táárí bá ásaŋ killa kwa sí bányíŋi ǎl jányíŋi kóeli áláŋ kíyeŋ jarauŋa beŋ in namá elaiŋ ii ná abá ela kawaja júŋo bɨŋa sí bágísíŋ toŋ luuj lé kɨtɨ́rɨ́ŋial . ¹⁰ Na duó bi duó abá a̱rɨ itî lé amaŋ nii báŋ a̱rɨ appâ dog amaŋ nii, na duó bi duó abá a̱rɨ itî lé koroŋ ii a̱rɨ appâ lé dog báŋ koroŋ ii. ¹¹ Na abá íne daldɨeŋ kawajɨŋ lé amaŋ á baŋ ba kawɨjɨŋ see lé kɨě áíláŋ see tɨ́ ii. ¹² Na abá bɨ́ duó keeríŋ ótá lé amana á baaŋba kɨ yé álaŋ kɨ́eŋ ótá íní? ¹³ Koy á keba ásaŋ taga sagala aw sí tááí piá, abá aw gé baŋ tog sí irel na ila keer sí ná kóel, wala gal baŋ tog sí írí já̱gɨ́ti na ila keer sí nás duus pii. bɨ́ wʉ́o sí kí sóŋgoŋaŋ ba̱gɨ arra taga áŋ bába". ¹⁴ parisíŋa killa ǎl soŋgoŋa si kóeli namá in belé sí nyétin kel kámê lia namá kayé nás íssa sí bǎja kawe. ¹⁵ íssa yé namás yeeŋ sí in kwǎ bɨ́ killa kwa baaŋ asá kɨ́eŋ sǔrŋá kwaŋ kʉ́ŋí le beréŋel marraŋ wʉ́o ás kilmaŋaŋ arra loom.a̱rɨ ela ǎl kwa írí kawrítiá báis dééŋ rɨɨŋ jɨt ɨɨ. ¹⁶ Músaŋ dáálí na domoŋ kwaŋ domoŋa waar sí ɨwɨ́ŋê namaŋ yáye paago. míŋ ila tin lé kwa básíŋ kwa sí wʉ́oŋ kʉrɨŋɨ́ŋ belé tullê ŋíŋ kírsiŋa namaŋ níŋ duó bi duó délé suur sí já̱gá̱ti. ¹⁷ Ela soŋŋá waar ii álaŋ jawil na suuru warɨ ɨŋɨ míŋ kí ála'ŋ dáálíŋ trim tog warɨ eeŋ. ¹⁸ Duó bi duó ná yáaŋ kwě sí júndi ná dúíti nás yáaŋ kwě keer dúíti ela bá a̱jɨlɨŋ ii ná pii na duó asá ela yáa sí dúíti alá kundê bá a̱jɨlɨŋ ii ná pii. ¹⁹ Bá duó kawâj kééŋá naŋ haríríŋ grambúboŋa tulléŋa tááráŋa jíti namá níŋ kééríg baj le kee ná namɨ́yeŋ subuŋa appa'ŋa pii. ²⁰ Dééŋ toŋíŋ tʉ̌sʉ namaníŋ paga̱rɨ díg aw ná in lazaros ka̱rɨ́ŋi , lazoros namás kíyáŋá suur keŋá. ²¹ yé namá níŋ jaaŋ álaŋ ila kawájíŋ sidab lé a̱rɨ díg pólé ná amí ásaŋa namá ʉ́nduliŋi ná síŋ lazoros sí kééŋ kiyáŋá lemeli. ²² Ila paga̱rɨ namá way meliga namá éle ná bawe nás biramíŋ kilǐ keerî. ela kawâj namá dog way namá kurɨ̂ . ²³ ǎlbá way ináŋ ná kʉ́ŋɨ́ palɨ́ namá búló ná pay'ŋ barú kee ná míneŋ ɨndel, ǎlbá nʉ́ŋɨ j'wí namá law ná lazoros sí biráimíŋ kilî kee. ²⁴ Namás jáa nás biraim sí ta̱rɨ́ pii, báa biráim kal gís dúíŋ uu itíŋ ayíŋ eeŋ ǎ̱ɨ kal lazoros sí adeŋ jáa ná dééŋ torí koró já̱bɨ́ náis dúíŋ dáálí lɨɨm ɨdɨ́ɨ́ŋ ná ká in utúŋ dɨo soŋŋá bɨ́leŋ álíŋ. ²⁵ Marraŋ biráim namá in jáwí, aw ná gi ila uu tabuŋ wa̱ŋíti al jɨ́ sálâ jaŋá ótá tulléŋa níŋ jumbɨ́ti, na lazoros násiŋ otálá jɨtɨla bʉ́lɨ́ti. naa gal kabá yé ii ná baj lé kee na jɨ́ ná kí way míneŋ jɨndel ²⁶ Kin sí nyét jundí dáíŋ tás lé kí dɨ́eŋ ga̱rʉ́l tírim appûn diŋ kayé abá duó kee ná kóel álaŋ indereŋ jee taga aŋ jee ba na endereŋ duó á keeba ála'ŋ íneŋ dááleéla. ²⁷ Jɨ gî sáát aw ká dúíŋ báa biráim lazaros sí dúíŋ báaŋ tóŋ ádeŋ jáa. ²⁸ lii ká bârŋa oos aŋ ká nás sawgeŋ piá álaŋ yeeŋ dog in bɨ́ɨ́leŋ jeŋíŋ lóó a kélalba. ²⁹ Biráim namaá in jáwí kaŋ si músa na domoŋ kwa sí nyét kaɨŋ a̱w nás dɨ́eŋ domoŋ kel kámiá. ³⁰ Yé namá in kwǎ lóó lo báa biráim marraŋ abá duó díg kuula dɨ́ɨ́lé píŋí baŋ túúbeŋ kɨŋɨ. ³¹ Biráim namá in jáwí abá domoŋ kwǎ sí kel as kameba yeeŋ taga see aŋ kiyeba aníŋ si kuula lé dóó díg sáálá eŋa."