¹ Kí mooŋ'ŋ sog díg íssa namá pa̱rɨ́sɨ́ŋ'ŋ ta̱bu dígin tóŋ nyáŋa áláŋ nʉŋ kámíal kwa namás kayé nás íssa sí nʉ́ŋí keneli ² namá duó díg dééŋ tabʉ́ŋ eré kééŋa nás tarŋa kurunta leye, ³ íssa namá pa̱rɨ́sɨ́ŋá na músaŋ dalíŋa gʉʉd páálíŋa sí ɨŋo dáálí le tullê lai áláŋ kí mooŋ'ŋ sog dáweŋ kawe, wala tullê áiba? ⁴ Killa kuwa nyét namá dʉm kʉ́ʉ́l. íssa namá ila duó sí tɨǒ ná dáwen piá ná nyŋá?" ⁵ íssa namá killa kuwa sí in ɨŋo abás dɨ́en dió duo kwě kee wala gal nuuŋ ná kí mooŋ'ŋ sog róó poí bát kí kajal áŋ jee bâ ná rááŋ ⁶ walá belé as kuméba álaŋ ǎŋal. ⁷ ísa namá já̱gɨ́la nás sóólá lóóŋá bárŋ'ŋ tulléŋa kééli namás yeeŋ sí in mitíl taaŋ ⁸ Abái duo bɨrsɨlɨŋ sǔbu lé imaŋa lóó tullê lé ajóóŋba, mat níŋ duó díg sí kameŋi náŋ dɨ́le soŋá sagal li ⁹ Abá ináŋ eŋa jɨtɨ́ré duŋo báŋ él náis in kuwǎ in duo sí dɨ́ɨ́ŋ kutɨ janí namáis tabu tʉ́ɨ namá joo ná lóó jʉ́rus díg le jóŋ. ¹⁰ Marraŋ abái kamaŋe bá lóó abrŋaŋ kussê díg le jôŋ eláin abá dɨ́ɨ́ŋ jɨtɨ́ré duoŋo él bagísíŋ jɨ in kuwǎ japǎg kǎl itírig lóó barŋ'ŋ tulle les jawnyíŋí lia jɨ sí námáis sóólá nyétin daar lé bagɨ kulŋíel ¹¹ ɨdɨ́ɨ́ŋ ná abá duó dééŋ suur sí appá pii baŋ dalʉ̂l kawal na abá duo dééŋ suur sí dalʉ̌l pii báŋ appá káwal". ¹² lia íssa namás dééŋ jɨtɨ́ré duoŋ sís in kwǎ abá kuwa sí kí dáaŋ wala gal kí ar'ŋ namɨ́ŋ jamaŋakɨ́eŋ anpára wala kɨ́eŋ bârŋa wala gal aala kawája sí a jamaŋba na abá inálaŋ jaá yeeŋ dog bágín kameŋe námái dɨ́ɨ́ŋ kawíya. ¹³ Marraŋ abá jɨ́ namɨ́eŋ sǔbu jaw kuwa ǎl jɨ́ jemeŋel bá aw ná pa̱ga̱rɨŋa na martala na mersoŋa na kuruŋa gé na ¹⁴ lia jɨ́ bas assô jomíti yeeŋ kí see kɨ́ɨ́ŋ kɨyo ágíŋ kawǐyaba jɨɨ kɨ́ɨ́ŋ kɨyo báíŋ jató kawíya asá kuwa warɨga sálákéŋítá ¹⁵ ǎlbá killa kuw'ŋ dɨo dig ela belé sí kelamí alá sidâbiŋ túga ka̱ɨŋ ná káwɨŋi namás íssa sa sí in kwǎ assô duó ɨt dɨ́ŋi áláŋ wuóŋ kʉrɨ le namɨ́ya amí ¹⁶ íssa namás in kwǎ duó díg namɨ́ya appûŋ sǔbu piá na kwa soŋŋâ emeŋa ¹⁷ Ila sǔbuŋ tin lé namá dééŋ ko ii sí adeŋ piá áláŋ kila kwa sí ta̱rɨ́ piá ǎl kameŋe nás in kwǎ bél ótóŋá nyét asila gé; ¹⁸ Yeeŋ nyét namás kawé ná gabalaŋa kǒeli duó waar kuoŋ namá in kwǎ ká naa daki rǎy ula namá weel ááŋ oo ná agɨl a̱ɨ̂ kí gabalai yâ ¹⁹ Duó keer namá in kwǎ ká waar'îŋ'ŋ kuoŋ kansára oos ula ináŋ namá dǒra aŋ ná ani ás'ŋ járíbeŋ â a̱ɨ kí gabalai jundígǐ ná oo yâ ²⁰ Keer in kwǎ na dakki yǎŋ kwě si yɨ́o ká taga aŋ élba. ²¹ Ela koy namá waɨ́ŋa nás dééŋ sagal sí kwǎ lia toŋiŋ sɨɨd sí namá kilmá tokkê eŋa namás dééŋ koy sí in kwǎ a̱ɨ war war kájíleŋ já ná oroŋa lé joo nás pa̱ga̱rɨŋa na martála na kʉrʉŋa na mersoŋa sís jel ²² Koy namá in kwǎ sagal a̱rɨ ela ǎl gi dééŋíŋ jɨ́ŋó kǎ marr'ŋ lóó díg si ká̱ɨŋ ná palaŋi. ²³ Yé sagal namás dééŋ koy sí in kwǎ ba̱ruŋaŋ koroŋa appála na bayála lé joo nás kuwa sís kí durú jél nas dúíŋ toŋ pis eeŋ ²⁴ Ká gís amiŋ kila kwaŋ dɨo ǎl kamaŋe duó á keba áláŋ in sǔbuŋ na̱mɨ́ye iwe". ²⁵ Temeŋ áláŋ kí ii majir jaŋ kwa soŋŋǎ ka̱ɨŋ ná kí íssaŋ ka̱nɨ́ŋi íssa namá dɨ lés ja̱ŋo nás in kwǎ ²⁶ abá duó kee ná dúlé úndul ná dééŋ aba na íya na yá'ŋ kwě na kééŋ dogólá na kééŋ barŋa na kééŋ ka̱nɨ namaŋ dééŋ suur sí dog dúílé soŋŋá á kó'ŋíba ka sí bát ka̱rɨ agí lúúba ²⁷ áláŋ dúíŋ majir eeŋ duó bi duó abá dééŋ ka̱ldá̱bu á bawaba álaŋ gí ka ka̱rɨ lúo majir taga an eeŋ ba. ²⁸ Aɨ abá dɨ́eŋ dɨo duo kwa áláŋ durdʉr tʉ́mó maiŋ yé bá laŋ dû aŋ ooŋba nas jʉtʉ́moŋ óta já̱bɨ́ dɨ́eŋ temeŋ nini asaŋ ela durdʉriŋ jutʉ́mo agíya ²⁹ Naa abálaŋ innaŋ laŋ á piába taga durdʉriŋ jutʉ́mó agíya asá dééŋ díbé jabɨ́ na duo bi duo abá já̱gɨ́la bá síŋ yee bǎja piá ³⁰ ná in beleŋ in jalpâk asá durduríŋ díbé já̱bɨ́ namá toiŋo asaŋ agé. ³¹ Aɨ dog bagɨ́l abá á̱bu díg kóel áláŋ kí á̱bu keer kérol yé dû aŋ ooŋbá ná já̱gɨl kí kaldaga líríŋá waye taga pia laŋ áláŋ kalɨ íní abá ela á̱bu díg kí líríŋá wayéŋá aw úndul ³² Naa abá yé taga ta̱bu ásíŋ keerba báŋ kééŋ mirsala saba keer lé ádeŋ piá nás kééŋ káitiá asá yé kara ka̱ɨŋ nás tánaba námá ɨŋo ná dóŋá káwal. ³³ Naa námá iná laŋ tag ii dɨ́eŋ da̱ó duo bi duo ná kééŋ údóŋá nyét údóŋá á jundiba ka sí tag ka̱rɨ á gíŋ lúba. ³⁴ Kera tulleê marraŋ abá dééŋ ranyiŋ jɨ́o dééŋ ranyiŋ asi keer ai níŋ kawial lia ³⁵ Ela kera wala suru lé tullê aiba walá bɨɨs lé tullê iba marraŋ báŋ délliŋ kamíŋal duo ɨt nas kɨ́llo kee nás kel aam bá aw nás kel amí.